Groot ontwikkelings vir Bloemfontein in pyplyn

Kommentaar (0)

10/07/12

· Redaksie

Na berig word uit verskeie oorde, is o.m. die volgende groot ontwikkelings-projekte vir Bloemfontein op die tafel:
’n Nuwe kompleks vir die Vrystaatse Wetgewer word beplan op die ou Ramkraaltronkterrein in Mangaung, ten bedrae van sowat R560 miljoen.
Die nuwe Makro-winkel in Quaggafontein naby die kruising van die N1 en N8 wes van die stad ten bedrag van sowat R200 miljoen is feitlik voltooi.
Die Fleurdal winkelkompleks word opgegradeer teen sowat R70 miljoen, met 'n hele aantal nuwe winkels wat daarin open.
Die bou van 'n sakekompleks gekoppel aan residensiële ontwikkelings rondom die Bloemfontein Internasionale Lughawe is reeds aan die gang.
Daar is ook reeds begin met 'n reuse vertoonlokaalkompleks van 9 000 m² langs die Bainsvleipad, oorkant Langenhovenpark en Fruit & Veg.
Planne is gevorderd vir 'n nuwe winkelkompleks met Checkers as ankerhuurder by die ingang na Woodland Hills, 'n woongebied wat steeds met 'n spoed uitbrei.
Opgradering van die Seisa Ramabodu Stadion in Mangaung teen ongeveer R280 miljoen is op die huidige begroting van die Mangaung Metro Munisipaliteit (MMM).
So ook opgradering van die Vrystaat Atletiekstadion teen R10 miljoen tot internasionale standaard.
Die munisipaliteit beplan voorts ook verskeie groot projekte, soos die volgende, maar of dit tot uitvoering gaan kom of by 'n wenslys gaan bly, moet nog gesien word:
Die ontwikkeling van die N8 aktiwiteitskorridor oos van Bloemfontein en wat insluit nuwe woonbuurte sewe keer die grootte van Langenhovenpark.
Die herontwikkeling van Naval Hill met o.a. 'n kabelkartoerismefasiliteit.
Sewe geïdentifiseerde ekonomiese klas residensiële ontwikkelings suid en oos van Bloemfontein in die omgewing van Pellissier om o.a. sg. “apartheidspatrone” te breek.
Die munisipaliteit werk teen 'n maandelikse bedryfsverlies, het oningevorderde skuld van sowat R1,3 miljard en sukkel erg met dienslewering.
Ander ontwikkelings waarvan daar al lank sprake is, maar wat nog nie op die horison verskyn het nie, is die ontwikkeling van Tweedelaan in Westdene deur die Georgiou Trust in aansluiting by die Waterfrontkompleks, asook die ontwikkeling van 'n agri-landgoed op die geskiedkundige plaas Brandkop van die Fichardt-familie wes van die stad.
 

Kategorie: Ontwikkeling