Suid-Afrika en China knoop verder vas

Kommentaar (0)

25/07/12

· Redaksie

Bande tussen die SA-regering en Kommunistiese China is stywer vasgeknoop met die pasafgelope besoek van pres. Jacob Zuma aan Beijing en samesprekings met sy Chinese eweknie, pres. Hu Jintao en die ondertekening van ‘n verdere samewerkingsooreenkoms tussen die twee lande. By die geleentheid het Zuma gesê dat China die grootste handelsvennoot van Suid-Afrika geword het. Volgens Chinese syfers het die land se ekonomiese handel met Afrika tot R1 405,2 miljard in 2011 toegeneem, terwyl uitvoere vanaf Afrika na China gestyg het van R47,3 miljard tot R787,5 miljard. So bv. het die Industrial and Commercial Bank van China, die grootste gelduitlener in die wêreld, tans beleggings ter waarde van bykans R60 miljard in Afrika. In 1997 het totale handel tussen SA en China met 77% toegeneem tot R363 miljard. Inmiddels word Chinese staatsbeheerde maatskappye in Afrika egter deur die Weste en sommige Afrikastate voor stok gekry oor die gebruik van ingevoerde arbeid om projekte soos paaie en hospitale uit te voer, terwyl natuurlike hulpbronne uitgepomp word en min oorgelaat word vir plaaslike ekonomiese ontwikkeling – die sg. “tjekboekbenadering.” Desnieteenstaande het Hu pas ‘n verdere R170 miljard aangebied aan Afrikastate vir lenings oor die volgende drie jaar.

Kategorie: Internasionale politiek