AfriForum takel Zim-vergrype

Kommentaar (1)

30/08/12

· Redaksie

As deel van hul SAOG-Burgerregteplan is AfriForum tans besig verskeie gevalle van menseregtevergrype in Zimbabwe te ondersoek met die oog op protes- en regsaksies. In September 2009 het AfriForum ’n suksesvolle veldtog teen die Switserse suiwelmaatskappy, Nestlé, gevoer nadat dit aan die lig gekom het dat Nestlé melk aankoop van ’n plaas wat deur Grace Mugabe, vrou van Robert, van ’n wit kommersiële boer afgeneem is. Ná ’n uiters suksesvolle drie dae van internasionale veldtogvoering op sosiale media, het Nestlé egter besluit om sy aankope van “bloedmelk” te staak. AfriForum se Ondersoekeenheid ondersoek nou bewerings van soortgelyke betrokkenheid van internasionale finansiële instellings en kommoditeitsmaatskappye by korrupte bedrywighede in Zimbabwe. Dit het bv. onlangs bekend geword dat Mugabe se ZANU-PF in 2008 'n omstrede lening van $100 miljoen (ongeveer R800 miljoen) van 'n groot Amerikaanse institusionele belegger ontvang het. Die lening het gehelp om Zanu-PF se veldtog van brutale onderdrukking in die bloedige 2008-verkiesing te finansier en is moontlik gemaak deur die New York-gebaseerde Ag-Ziff Capital Management Group. Ag-Ziff is op die New Yorkse aandelebeurs genoteer en staan onder die streng reëls van die Amerikaanse Securities Exchange Commission (SEC). Voorts word die moontlikhede ondersoek dat Zimbabwiese politici, wat voordeel getrek het uit die grondgrypprogram, hulle skuldig gemaak het aan ’n reeks vergrype wat in die Statuut van Rome, waartoe Suid-Afrika ’n party is, verbied word. Aangesien Suid-Afrika ’n party tot die Statuut van Rome is, is die Nasionale Vervolgingsgesag verplig om klagtes te ondersoek van misdade teen die mensdom wat deur die statuut verbied word.

Kategorie: