Godsdiens word belangrik in Amerikaanse verkiesing

Kommentaar (1)

11/09/12

·

“’n Storm in ‘n teekoppie.” So beskryf die Christian Science Monitor (CSM) die “per abuis” weglaat van God uit die beleidsdokument van die Demokratiese Party by sy konvensie waar Barack Obama sy aanslag begin het vir ‘n tweede termyn as president. Die Republikeine beskuldig die Demokrate al dekades lank daarvan dat dié party “Godloos” is en dit sal interessant wees om te sien of dit nou ‘n impak op die verkiesing gaan hê. ‘n Tweede “blaps” van die Demokrate was om ‘n verwysing na Jerusalem as Israel se hoofstad te verwyder. Die Demokrate voer aan dat die party sy beleidsdokumentasie bloot in pas gebring het met dié van die Amerikaanse regering, waar beide Republikeinse en Demokratiese administrasies Tel Aviv as hoofstad erken en waar die VSA ambassade ook geleë is. Die fokus oor die kwessie het egter verdiep deurdat die Republikeinse kandidaat. Mitt Romney, beloof het dat die VSA sy ambassade na Jerusalem sal verskuif. Die VSA sal dan maar sowat die derde land wees wat dit doen. Die hele kwessie oor God kom teen die agtergrond van verskeie Republikeinsgesinde state en hul goewerneurs om die VSA in wetgewing en gebruike, soos die uitroep van ‘n dag van gebed in Arizona, “vir God te herwin”. Die CSM meen egter die hele godsdienskwessie word verdwerg deur die eintlike verkiesingskwessie – die Amerikaanse ekonomie.

Kategorie: