Wêreledrenosterdag gevier

Kommentaar (1)

27/09/12

· Redaksie

Vyf renosterspesies vir altyd!  Dit is die tema van vanjaar se Wêreldrenosterdag wat op 22 September gevier is. Wêreldrenosterdag word van 2010 af jaarliks gevier om die publiek bewus te maak van die lot van renosters wat stropers ten prooi val. Suid-Afrika, wat nou die grootste bevolkings van swart- en witrenosters huisves, word toenemend deur stropersindikate geteiken. In 2007 is slegs 13 renosters in die land gestroop, in 2008 was dit 83, in 2009 122, in 2010 333 en verlede jaar 448. Vanjaar is tot dusver reeds meer as 400 stropings uitgevoer. Die WWF het SA onlangs in ’n verslag ’n geelkaart gegee oor sy hantering van bedreigde spesies. In die verslag loop veral Viëtnam deur as sondebok as bestemming vir renosterhoring, terwyl Thailand ’n rooi kaart kry vir gebrekkige wetgewing en wetstoepassing t.o.v. handel in olifanttande. China kry ’n geelkaart vir ivoorhandel, maar Indië en Nepal kry groen kaarte vir hul bewaring van bedreigde spesies. Nepal word geloof omdat daar in 2011 geen voorvalle van renosterstropery in dié land aangemeld is nie.

Kategorie: Omgewing