DA oor korrupsie in VS-regering

Kommentaar (1)

22/10/12

· Redaksie

Tydens ’n chaotiese byeenkoms in die Vrystaatse Wetgewer – daar was nie genoeg ANC-lede om ’n kworum vir ’n wettige sitting te vorm nie – het die leier van die DA in die Wetgewer, Roy Jankielsohn, die provinsiale regering ‘n “netwerk van misdaadsindikate” genoem wat die armes nóg armer maak weens grootskaalse korrupsie. Die indien van die jaarverslae van provinsiale staatsdepartemente is summier opgeskort omdat daar nie ’n kworum was nie. Jankielshohn het ’n lys van korrupsie en allerhande onwettighede deur amptenare voor die deur van premier Ace Magashule, sy kabinet en die ANC-regering gelê en verder gesê: “Die burgemeester van Setsoto word genoem in sake wat insluit onwettige vuurwapens, moordlyste en intimidasie. Dit word beweer op grond van pogings deur senior politici in die provinsie om hierdie bendebedrywighede te verdoesel. Sedert premier Ace Magashule beheer in die provinsie oorgeneem het, is senior politici betrek by onder meer ontwettige eiendomstransaksies, onbehoorlike en opgeblase kommunikasiekontrakte en skandalige verhuringsooreenkomste. Tenderpreneurs en kaderpreneurs is in die Vrystaat ook besig om pres. Jacob Zuma geldelik te ondersteun,” aldus Jankielsohn.

Kategorie: Korrupsie