Openbare Beskermer gaan Zumaville ondersoek

Kommentaar (1)

22/10/12

· Redaksie

Die Openbare Beskermer (OB) het aan AfriForum bevestig dat pres. Jacob Zuma se beweerde magsmisbruik met betrekking tot die Umlalazi Smart Growth Centre (beter bekend as Zumaville), ondersoek sal word. Hierdie ondersoek, wat volg op ʼn klag wat deur AfriForum ingedien is, sal waarskynlik met die ondersoek na Zuma se Nkandla-woning gepaardgaan. ‘n Mediaverklaring van AfriForum lui verder: “Hierdie luukse “dorp”, wat sowat 3 km van die president se huis gebou sal word, word deur die regering voorgehou as ʼn inisiatief om landelike veiligheid aan te spreek. Na verwagting sal die projek meer as R2 miljard kos, waarvan belastingbetalers die helfte sal moet opdok. Hierdie projek word in samewerking met die landelike ontwikkelingsorganisasie, Masibambisane, uitgevoer. Zuma is die voorsitter van Masibambisane. Dit is duidelik dat Zuma in sy persoonlike hoedanigheid groot voordeel uit hierdie projek sal trek. Die OB is gevra om ondersoek in te stel aangesien die omstandighede op ʼn misbruik van mag deur die president neerkom.” Inmiddels wil dit voorkom asof benewens die R2 miljard wat begroot is vir Zumaville, ‘n bedrag van R240 miljoen gespandeer word op die persoonlike woning van Zuma te Nkandla.

Kategorie: