Nuwe grondvoorstelle deur pres Zuma

Kommentaar (1)

24/10/12

· Redaksie

Op die kongres hierdie week van die African Farmers Association of SA (AFASA) te Centurion het pres Jacob Zuma omvattende nuwe voorstelle vir grondhervorming gedoen. Dit behels o.m. dat grondhervormingskomitees in elke distrik geskep word waarby alle rolspelers betrek word. Die komitee moet dan 20% van die kommersiële landbougrond in die distrik identifiseer wat beskikbaar is vir grondhervorming. Dit sluit in grond wat reeds in die mark beskikbaar is, sowel as die grond van boere wat in erge finansiële moeilikheid is, grond wat nie benut word nie en die eienaar bereid is om dit prys te gee en grond in afgestorwe boedels. Al hierdie grond moet dan teen 50% van markwaarde verkoop word, wat, volgens Zuma, “nader is aan regverdige, produktiewe waarde.” Die tekort van die bestaande eienaar moet opgemaak word deur kontant of fisiese bydraes deur kommersiële boere in die omgewing wat bereid is daartoe. Zuma stel voorts ook ’n nuwe program van finansiering in die vooruitsig waarby die Tesourie, die Landbank en gevestigde wit boere betrek moet word. Zuma het daarop gewys dat sowat 37 000 kommersiële boere in die land, hoofsaaklik wit, verantwoordelik is vir sowat 90% van die kosproduksie van die land. Inmiddels is hierdie grondvoorstelle deur sowel Agri SA as TLU SA as onwerkbaar bestempel.

Kategorie: Landbou