► Gister 16 Junie is Jeugdag amptelik in SA gevier ter herdenking van die Sharpville-opstand in 1960, maar dit is ook die herdenking van 16 Junie 1900 toe Lord Roberts proklamasie onderteken het vir inwerkingstelling van beleid van verskroeide aarde wat tot die lyding en dood van sowat 30 000 Boervroue, -kinders en bejaarde mans gelei het – kyk hierdie video ► Vir presies hoe die Anglo-Boere-oorlog 1899 – 1902 verloop het en hoe die Britse oormag die lyding van vroue en kinders misbruik het om die Boerekrygers tot oorgawe te dwing, volg hierdie skakel ► Ambassadeur vir SA in Denemarke Zindzi Mandela skel SA blanke burgers op Twitter uit vir “cowards” en “land thieves” en sê dr. Chris Barnard “learned the basics of heart surgery from his black gardener” ► AfriForum vra Minister van Internasionale Betrekkinge en Samewerkinge Naledi Pandor om Zindzi Mandela onmiddellik terug te roep en af te dank ► Furore oor Twitter-geskel van Zindzi Mandela omdat sy veronderstel is om alle Suid-Afrikaners te dien en sy betaal word met belastinggeld van alle Suid-Afrikaners ► Volgens konsepwetgewing tans voor Parlement Broad Based Black Economic Empowerment Amendment Bill word begunstiging van blanke vroue uitgehaal omdat hulle in die praktyk van die sg. benadeelde groepe die vinnigste in die SA ekonomie vorder – volg hierdie skakel vir meer besonderhede ► Met spanning in Midde-Ooste rondom Iran skiet goudprys op na $1 350/ons, hoogste in 14 maande ► Vakunie Association of Mineworkers and Construction Union (AMCU) kondig aan dat dit met onderhandelinge vir lone in platinumbedryf later vandeesmaand gaan vra vir basiese salaris van R17 000; AMCU verteenwoordig sowat 60 000 lede ► Berig dat SABC slegs salarisse betaal en nie meer enige diensteheffings aan Stad van Johannesburg en City Power betaal nie, vraag of SAUK volgende maand nog in bedryf sal wees ► Vragmotorbestuurder Bernard Groenewald wat by Touwsrivier so deur aanvallers met brandbomme bestook is, is in hospitaal aan sy wonde oorlede ► Die Voortrekkers o.l.v. dr. Danie Langner onthul op plaas naby Parys nuwe standbeeld van Die Penkop tesame met twee borde met name van 2 466 seuns tussen ses en 16 jaar wat dié oorlog oorleef het ► EPR veiligheidsbeampte, Christo Myburgh, te Krugersdorp oorval op perseel deur drie gewapende aanvallers vermoedelik zamas zamas en drie keer geskiet ► Vind by hierdie skakel passievolle pleidooi vir moedertaalonderrig, ook in Afrikaans, deur Johnell Pelser op sosiale media ►

Die Gauteng LUR vir Onderwys Panyaza Lesufi het met sy hatige en verbete anti-Afrikaanse en anti-Afrikaneraksies reeds vir homself 'n plek in die Afrikaner-geskiedenis verwerf as een van die mees gehate mense, op dieselfde vlak van 'n Alfred Milner. Die jongste verwikkelinge rondom hom word uitstekend soos volg saamgevat in 'n mediaverklaring van adv. Anton Alberts van die VF Plus:

“Die besluit van Gauteng premier David Makhura om Panyaza Lesufi terug te skuif na sy vorige portefeulje as LUR vir onderwys in dié provinsie, is ʼn klap in die gesig van minderhede, aangesien daar geen twyfel is nie dat hy sy vernietigingswerk met moedertaalonderrig en Afrikaans in besonder gaan voortsit.

“Lesufi het nog nooit ʼn geheim daarvan gemaak dat hy Afrikaans minag en Afrikaanse skole wil vernietig nie. In sy dienstyd as LUR het hy talle Afrikaanse skole laat transformeer na Engels en dit is kommerwekkend dat Makhura glo onder ‘openbare druk’ geswig het om die status quo met Lesufi te herstel.

“Lesufi se rekord getuig daarvan dat hy ʼn swak LUR was. Hy het nie genoeg skole gebou met sy toereikende begroting nie en gaan bloot aanhou met sy pogings om Afrikaanse skole te intimideer en te transformeer na Engels.

“Die Driehoek-tragedie het ook bewys dat hy nie omgee oor die onderhoud van skole se infrastruktuur nie. Sy enigste belang by dié skool en ander skole met onlangse inspeksies was om vas te stel hoe vol skole is en hoe plek gevind kon word vir bykomende leerders wat nie Afrikaanssprekend is nie.

“Dit is hoogs problematies dat ʼn persoon, wat aandadigheid moet aanvaar vir die tragedie, weer in beheer geplaas gaan word van ʼn omgewing waar kinders se veiligheid aan sy nalatige optrede oorgelaat gaan word. Die VF Plus onderneem om Lesufi aggressief teen te staan en te sorg dat hy sy mandaat op ʼn nie-diskriminerende grondslag uitvoer ingevolge die Grondwet, wat wel die beskerming van moedertaalonderrig waarborg. Druk sal ook op hom geplaas word om moedertaalonderrig en Afrikaans te beskerm, om meer skole te bou, om te sorg dat infrastruktuur onderhou word en dat gemeenskappe nie teen mekaar afgespeel word met onderwys as politieke speelbal nie, ” aldus Alberts.

‘n Hele reeks groot wêreldsportgeleeenthede vind vandeesmaand en volgende maand plaas en waaraan Suid-Afrika ook deelneem, soos o.a.:

  • Die Krieket Wêreldbeker word tans op verskillende velde in Engeland en Wallis tussen 10 nasionale spanne beslis. Die Proteas het ongelukkig hul eerste drie wedstryde verloor.
  • In Frankryk word die Sokker Wêreldbeker vir Vroue tans beslis, met 24 deelnemende nasionale spanne. Die Banyana Banyana het ondanks ‘n dapper poging hul eerste wedstryd 1-3 teen Spanje verloor.
  • In Argentinië word die Rugby Onder 20 Wêreldbeker tans gespeel, met 10 spanne. Die Junior Bokkies het hul eerste twee groepwedstryde gewen.
  • Op Wimbledon volgende maand sal SA seker in die mansenkelspel twee verteenwoordigers hê, nl. Kevin Anderson (tans nr. 8 in die wêreld) en die opkomende Lloyd Harris (tans nr. 87 in die wêreld).

Verlede maand met die kies van die nasionale senior netbalgroep vir die Wêreld toernooi volgende maand in Liverpool, Engeland het Netbal SA (NSA) sowel as die spanafrigter Norma Plummer gesê vir die eerste keer in jare het geen kwotavereistes gegeld nie. In die groep van 12 spelers is daar net vier van kleur, insluitende die ervare kaptein Bongiwe Msomi.

“Ek het volle vertroue in die afrigter, haar tegniese span en al die spelers. Ek wens hulle die beste toe,” het Cecilia Molokwane, NSA president gesê.

Ongeveer drie weke later verklaar AfriForum tydens 'n mediakonferensie egter dat op skolevlak 'n totaal van 56 blanke meisies al weens ras uit verteenwoordigende skolenetbalspanne gelaat is, ondanks die feit dat hulle op meriete wel gekwalifiseer het. Volgens AfriForum toon die puntestate van keurders vir Gautengse o.12- tot o.18 skolenetbalspanne dat op hierdie wyse teen hierdie meisies gediskrimineer is.

In reaksie hierop het SA Skolenetbal gesê dit is jammer dat kinders nou deur volwassenes gebruik word om politieke agendas te bevorder, maar op hul beurt het NSA in hul kommentaar gesê dat dit onregverdig sou wees indien netbalspelers op skolevlak uitsluitlik op grond van ras uit verteenwoordigende spanne gelaat word.

AfriForum het namens die ouers van die benadeelde meisies ’n amptelike klag by SA Skolenetbal, Gauteng Skolenetbal en NSA ingedien.   Indien die saak nie bevredigend uitgesorteer word nie, beplan AfriForum om dit by die Internasionale Netbalfederasie aanhangig te maak, want die reëls van die Internasionale Netbalfederasie, asook dié van die Internasionale Olimpiese Komitee en die Statebondspele Federasie, belet uitdruklik enige vorm van rassediskriminasie in sport.

Dit wil tog voorkom asof vordering gemaak word om rassekwotas uit SA sport te weer.

Terrorisme breek los op nasionale snelweë feitlik landswyd met vragmotors wat met brandbomme bestook word, o.a. op N3 in KZN, R59 by Vereeniging, N2 by Port Elizabeth, N11 by Ermelo, N1 by Touwsrivier in Wes-Kaap; o.a. Bernard Groenewald vragmotorbestuurder erg verbrand toe hy met brandbom in kajuit gegooi is terwyl hy slaap

Volgens berig op sosiale media is sedert Mei 2018 1 300 vragmotors op hoofpaaie in die land aan die brandgesteek

 

Die Skatkis klerewinkel in die Horison Nywerheidskorf het opwindende nuwe wintersvoorraad ingekry, vir mans sowel as dames, asook kinderklere - truie, baadjies, skoene, onderklere en sweetpakke, onder andere.

Wat ook spesiaal genoem moet word, is jagbaadjies vir mans, terwyl daar ook nuwe skoenreekse is wat nog nie voorheen op Orania beskikbaar was nie. Eienares Magda sê egter voorrade verkoop vinnig uit en mense moet opskud indien hulle die beste keuses wil maak.

Die Skatkis met sy groot vloeroppervlak bied uitstekende geleentheid om rustig te snuffel, terwyl aanpaskamers ook beskikbaar is. In die tweede helfte van Junie word weer groot nuwe voorraad ingeskeep.

Teen alle verwagtinge in het die Proteas tot dusver in die hek geduik met die Krieket Wêreldbeker in Engeland en die eerste drie wedstryde op ‘n streep verloor – teen Engeland, Bangladesh en Indië. Daar kan aanvaar word dat die spelers hul bes gegee het en moet hulle nie te kras veroordeel word nie, maar wat is die redes vir die swak prestasie?

Die redes kan moontlik soos volg aangestip word:

  • Hoewel Krieket SA en die spanafrigter Ottis Gibson gesê het met die kies van die huidige span het geen kwotas gegeld nie en is slegs op meriete gekies, moet die huidige spansamestelling tog teruggevoer word na vorige jare waar kwotas streng toegepas is. So bv. het wêreldklasspelers soos Kyle Abbott en Rilee Rossouw in die slag gebly en het hulle verkies om eerder graafskapkontrakte te sluit as om langer vir hoop in die nasionale span rond te hang. Dit is sulke spelers wat in die huidige span die verskil tussen wen en verloor kon gemaak het.
  • Te veel krieket. Feitlik die hele huidige span het tot ‘n week of wat voor die Wêreldbeker nog hoogs mededingende krieket in die Indiese Premierliga gespeel, ooglopend vir die groot geld, maar dit het onvermydelik sy fisiese tol geëis. Van die spelers ly tot ‘n mate aan uitbranding, soos die geval met Dale Steyn wat met sy beseerde skouer voortydig huiswaarts moes keer.
  • Met die uiteindelike spankeuse is moontlik ook nie so raakgevat nie en reken bv. ‘n kenner soos Fanie de Villiers dat Hashim Amla (35) verby sy beste is en dat effe stadiger reaksie die rede is waarom hy teen Engeland teen die kop raakgeboul en beseer is en so moontlik die Proteas se kans op oorwinning ontspoor het.
  • De Villiers is ook van mening dat die ondersteunende spanbestuur, soos die fisioterapeut, biokinetikus, sielkundige berader, ens. nie opgewasse vir hul taak is nie. Dit wil lyk of hy 'n punt beet het. Watter rol kon kwotas in hierdie verband gespeel het, kan gevra word?

Hoe dit ookal sy, daar kan steeds maar net vorentoe gekyk word en hopelik geleer word uit foute van die verlede.

Verlede jaar het Ditsem Nuus berig dat planne opgetrek is om ʼn groot en volledige aftree-oord op Orania te bou op die terrein oorkant die bestaande Karoosig woonbuurtontwikkeling en suid van Smaraglaan (sementpad), maar volgens betrokkenes met wie Ditsem Nuus gepraat het, is hierdie beplanning egter eers op die langebaan geskuif. In plaas daarvan word beplan om die bestaande Karoosig Tehuis vir Bejaardes uit te brei met ʼn aantal wooneenhede en wel op die oop ruimte tussen die tehuis en die gebou van die Poskantoor en OVD Veiligheid.

Wat egter soos ʼn paal bo water bly staan, is dat daar buitendien steeds ʼn geweldige behoefte te Orania is vir ʼn doelontwerpte en moderne aftree-oord met verblyffasiliteite oor die spektrum vanaf woonstelle tot plek vir verswakte bejaardes. As sulks bied dit ʼn uitstekende beleggings- en ontwikkelingsgeleentheid vir entrepreneurs gespesialiseerd in aftree-oorde.

Daar is groot behoefte en aanvraag buite Orania vir mense om in Orania in veiligheid en rustigheid en met betroubare versorging te kom aftree. Die gaping is dus daar, dit is net ʼn vraag of die projek – of selfs meer as een – deur entrepreneurskap van buite Orania aanmekaargesit sal kan word.  

Die enigste troeteldierwinkel in die Bo-Karoo waar diereliefhebbers ‘n uitlaatklep vir hul passie kan vind, is Troeteldier en Hengel Paradys te Orania, in die Stokkiesdraai Avontuurpark. Daar staan eienares Elizabeth Solomon reg om kliënte met raad en daad te bedien.

Elizabeth sê sy is met ʼn passie vir diere gebore en het nog altyd daarvan gehou om met diere te werk. Voordat sy verlede jaar saam met haar ouers na Orania verhuis het, het sy op ʼn renosterplaas naby Klerksdorp gewerk, waar sy babarenosters versorg het. Te Orania het sy en haar pa, Cornelius, besluit om die leemte in die streek vir ʼn spesialis troeteldierwinkel te vul.

Elizabeth sê om ʼn troeteldier of diere aan te hou, vereis intensiewe sowel as omvattende versorging – dit is nie net kos en water nie, maar ook fyn let op die gesondheid van die dier, die hok gereeld skoonmaak, kyk dat diere nie mekaar afknou of beseer nie, ens. Kinders veral moet deeglik bewus wees van hierdie vereistes en verantwoordelikheid.

Troeteldier en Hengel Paradys spesialiseer in ʼn wye reeks visse, voëls en hamsters, maar hou ook hondjies en hasies aan. Hulle bied ook ʼn wye reeks produkte vir troeteldiere, vanaf hokke en kos tot speelgoed en allerlei hulpmiddels – dit is nou benewens die hengelgerei-afdeling in die winkel.

Elizabeth probeer ook sover moontlik voldoen aan enige spesiale versoeke rakende troeteldiere. Sy kan geskakel word by 084 225 6669.

As ons ooit die Here nodig gehad het, is dit nou! As ons ooit 'n aanraking van bo nodig gehad het, is dit nou. As ons ooit 'n openbaring van God se nimmereindigende liefde, Sy steeds groterwordende genade en ewigdurende ontferming nodig gehad het, is dit nou.

O, hoe kan dit wees dat 'n wêreld wat so versigtig aanmekaar gesit is, nou so uitmekaar val? Hoe kan dit wees dat die kinders wat teen fyn goud geskat was, nou gereken word soos erdekruike, die werk van pottebakkershande?

Hoe kan dit wees dat die tong van babas aan hul verhemelte vaskleef van dors terwyl kindertjies brood vra en niemand dit vir hulle breek nie? Hoe kan dit wees dat hulle wat lekkernye geëet het nou versmag op die strate en die wat purper gedra het nou die ashope omarm. (Klaagliedere 4: 1-4).

Hoe kan dit wees dat siele waarvoor Jesus Christus met Sy bloed betaal het, nou verlore gaan in 'n wêreld van sonde en bedrog? Hoe kan dit wees dat ons naby bure, ons naby vriende en familie in ons midde sit terwyl hul na die hel gly, sonder dat ons ons ontferming, vriendelikheid en Goddelike liefde aan hulle bewys?

Kan dit wees dat ons ook ver van God verwyder is? Kan dit wees dat ons die teenwoordigheid van die Here verlaat het? Kan dit wees dat ons soos skape dwaal en elkeen sy eie pad gevat het? (Jesaja 53: 6).

Kan dit wees dat ons, ons eerste liefde verlaat het? (Openbaring 2: 4). Kan dit wees dat ons losgebreek het van die wynstok en dink dat ons dit op ons eie kan maak? (Johannes 15: 5).

Kan ons soek na antwoorde vir ons situasie, eerder as om die Here God te soek wat self die Antwoord is? Kan dit wees dat ons brood soek in plaas daarvan om Jesus te soek, wie die Brood van die lewe is? (Joh. 6:48). Kan dit wees dat ons na water vir ons dors verlang, in plaas daarvan om na Jesus Christus te verlang, uit wie die lewende water vloei? (Johannes 7: 37-38).

Ons het nodig om weer tot inkeer te kom. Kom ons keer terug na die Een wat ons eerste liefgehad het, na die Een wat Sy Seun gegee het, sodat ons gered kan word.

Kom ons draai ons harte na Jesus Christus, Ons Meester, Verlosser en Koning. Kom ons laat God se Heilige Gees in ons 'n liefde vir God en 'n liefde vir ander opwek. Kom ons kyk nie na ander met minagting en oordeel nie, maar laat ons na hulle kyk deur die oë van Christus.

As ek ooit die Here nodig gehad het, is dit nou. As ons ooit die Here nodig het, is dit nou. As hulle ooit die Here nodig het, is dit nou.

Maar hou ook in gedagte: As Jesus Homself ooit wou openbaar, is dit nou.

Johan Terblanché, Christ Alone Ministries

In sport, soos in die lewe, gaan dit dikwels nie oor die uitblinkers en die pryswenners nie, maar of jy met jou spesifieke talente jou beste gee en as ʼn wenner die eindstreep haal. Hoe jy die spel speel, is dus belangriker as wen of verloor.

Dit het Lise Brink en Duane van Zyl gewys toe hulle 28 April tot 1 Mei aan die uithougeleenthede per pad in en om Orania deelgeneem het. Albei het ʼn geamputeerde linkerbeen bo die knie en dus ʼn prostese.

Hulle het besluit hulle wil deelneem en 10 km voltooi. Dit het egter so goed gegaan dat hulle uiteindelik, saam, 32 km voltooi het – en goed daarvan afgekom het!

Tussen amputasie en hierdie prestasie het daar egter vir elkeen van hulle ʼn lang en uitdagende geestelike, emosionele en fisiese reis gelê. Lise se been is in Desember 2016 geamputeer ná ʼn motorongeluk waarin sy en haar gesin was - sy ernstig beseer en twee van hul kinders gesterf het. Sy sê ondanks al die trauma was die genade van God groot genoeg om haar weer in ʼn posisie te plaas dat sy 32 km in uithoustap kon voltooi.

Duane (34) sê tydens ʼn vakansie met sy gesin in Zanzibar in 2016 het die are in sy een been onverklaarbaar platgeval en is die bloedtoevoer afgesny. Dit was ondanks die feit dat hy fiks was en stoei as sport beoefen het. Dokters het gedoen wat hulle kon, maar in Desember 2016 moes sy been geamputeer word. As elektriese kontrakteur van beroep het hy besluit hy het nog sy lewe voor hom en dat hy dit voluit gaan leef. Hy sê ook deur genade alleen het hy sodanig herstel dat hy ook die 32 km stap met relatiewe gemak kon voltooi.

Lise en Duane, wat albei met hul gesinne in Pretoria woon, het mekaar eers ná hul amputasies ontmoet en vriende geword. Hoe dit gebeur het, is ʼn storie op sigself, maar die feit is hulle stel ʼn wonderlike navolgenswaardige voorbeeld vir elkeen wat ʼn groot terugslag in die lewe moet verwerk.

Johann Dannhauser

Terwyl daar nog geen gerusstelling is oor die volhoubaarheid van Eskom as nasionale kragvoorsiener nie, behoort steeds indringend gesoek te word na alternatiewe kragoplossings op grootskaal. Van al die moontlike alternatiewe bronne bly die benutting van sonkrag die mees bekostigbare en ook die mees omgewingsvriendelike.

Dit geld veral die sentrale deel van die land as die primêre verspreidingsgebied van Ditsem Nuus en wel in besonder die Bo-Karoo met sy groot aantal sonskyn dae per jaar. In ‘n poging om in hierdie opsig te fasiliteer, behou Ditsem Nuus hierdie fokus op bekostigbare sonkrag. Op hierdie bladsy bied twee gevestigde verskaffers van sonkragstelsels buite die sentrale binneland uitstekende franchise-geleenthede vir entrepreneurs in die sentrale streek.

Bestaande en voornemende entrepreneurs in die elektrisiteitsektor word dus aangemoedig om van hierdie gulde geleenthede gebruik te maak wat gebied word deur Gener8 Sustainable Energy Solutions van Witbank (kontakpersoon Oscar Loreti by 082 3377 068) en AllSolar Renewable Energy Solutions met hoofkantoor te George (kontakpersoon Div de Villiers by 082 6455 657).

Terselfdertyd bied GeyserWorx van Johannesburg tegnologie vir songeisers wat waarskynlik nog nie algemeen in die binneland beskikbaar is nie. Sien gerus hul advertensie op hierdie bladsy en skakel hulle, ook vir bekostigbaarheid.

Ook dien in gedagte gehou te word die jaarlikse KragDag ekspo wat 8-10 Augustus 2019 te Diamantvallei Landgoed oos van Pretoria aangebied word en waar verseker verdere uitstekende uitstallings van innoverende sonkragoplossings sal wees. Meer inligting op hierdie stadium by www.kragdag.co.za.

       

Op Saterdag 1 Junie 2019 het Die Worsman in die Horison Nywerheidskorf hul amptelik opening gevier met talle spesiale aanbiedinge, ʼn groot braai, ʼn markdag met stalletjies op die sentrumterrein, ʼn springkasteel vir die kinders en polsende musiek. Op die foto’n familiegroepie wat die feestelike atmosfeer geniet het en heerlik gekuier het – van links Natasha, Tys, Marinta en Frik (almal Verster) en Johma, Emma en Danie Strydom.

Foto: Ditsem Nuus

Die Solidariteit Groep het ’n netwerkplan vir werk met ’n vyfjaarbegroting van R4,5 miljard aangekondig. Genaamd Solidariteit NetWerk, behels dit volgens ‘n mediaverklaring ‘n omvattende alternatiewe skoolstelsel, ’n beroepskollege, universiteit, studiehulp, ’n jeugbeweging, ’n netwerk van beroepsgildes, mentorskappe, werkplasing, beskerming in die werkplek en voortgesette opleiding.

Die plan steun sterk op opleiding en is van die grootste projekte wat aangepak gaan word, die uitbou van Akademia tot ’n volwaardige universiteit met volledige kampus, asook die ontwikkeling van

Sol-Tech met 'n groter kampus. Daarby word beplan om ’n volle, alternatiewe Afrikaanse skoolstelsel deur die Skole Ondersteuningsentrum op die been te bring.

Volgens die mediaverklaring gaan Solidariteit NetWerk steeds in groot mate op beskerming in die werkplek fokus en word die stryd teen die regering se obsessie met ras verskerp en word selfs die aanhangigmaking van sake by die Verenigde Nasies in die vooruitsig gestel. 'n Verdere beplande nuwe verwikkeling is die stigting van ’n netwerk van beroepsgildesom jongmense toegang tot die werkplek te help gee.

Daar gaan ook skerp gefokus word op die Vierde Industriële Rewolusie en om kliënte tegnologies maksimaal te bemagtig. Die onderskeie inisiatiewe gaan deur verskillende bronne gefinansier word, waarvan ’n nuwe eiendomsbeleggingsmaatskappy, Kanton, as vennootskap tussen kapitaal en kultuur, ‘n belangrike komponent gaan vorm.

By die bekendstelling van die plan het Flip Buys, voorsitter van die Solidariteit Beweging, o.m. gesê dat beplan word om in die land 30 ankerdorpe en –stede by wyse van verdigting te vestig, asook “groter kantons waarskynlik in Pretoria in die noorde, moontlik een in die Suid-Kaap en een in die weste van die land met Orania as groeipunt”.

Vervloek is hy wat nalatig is om die werk van die HERE te doen; ja, vervloek is hy wat sy swaard van bloed terughou!

Jer, 10:12

Standard Bank het ʼn lys bekendgemaak van 104 takke wat landswyd gesluit word, met 49 takke in Gauteng, 11 takke in die Wes-Kaap, 10 in KZN, 9 in die Noord-Kaap, 6 elk in onderskeidelik die Vrystaat, die Oos-Kaap en Mpumalanga, 4 in Noordwes en 3 in Limpopo. Die dorpe in die Vrystaat waar takke gesluit word, is Bultfontein, Jagersfontein, Kestell, Lindley, Marquard en Phuthaditjhaba, terwyl in die Noord-Kaap takke te Britstown, Kimberley (Diamond Pavillion), Hanover, Kenhardt, Kuruman, Philipstown, Sishen, Strydenburg en Sutherland gesluit word.

Dit laat Standard Bank tot die bank in SA met die minste takke (548), maar dit is steeds die grootste bank volgens batewaarde. Die tendens in die bankwese in die land is dat banke takke verminder, maar meer kitsbanke oprig. Interessant is dat Capitec tans die bank in SA is met die meeste takke (840) en dat dit ook die snelgroeiende bank in die land is. Daarenteen het Absa 671 takke, FNB 628 en Nedbank 604.

Wat kitsbanke betref, het Absa tans 8 961, Standard Bank 7 140, Capitec 5 000, Nedbank 4 022 en FNB 4 000. Die beweging is kennelik al meer na elektroniese bankwese.

 Met die 2019 verkiesing agter die rug, die 6de Parlement gekonstitueer en die staatspresident ingehuldig, is die volgende Staatsrede geskeduleer vir 20 Junie 2019. Dit is wanneer die staatspresident en sy nuwe regering hul visie vir SA vir die volgende vyf jaar uitspel, maar wat kan realisties vir die Afrikaner as volk uit hierdie staatsrede verwag word? Na ons mening en vir enigeen met oop oë kan vir die Afrikaner die tekens van die tye soos volg gelees word, geklee in allerlei mooiklinkende frases:

• Geen verslapping in wetgewing om die oorgrote meerderheid in die land te beskerm teen die kleinere minderheid, trouens verskerpte wetgewing t.o.v. sg. swart ekonomiese bemagtiging, regstellende aksie, sportkwotas, diskriminerende studentetoelatings, afdwinging van skoolkeuses, e.s.m.

• Geen strategie of plan om van staatsweë plaasaanvalle en-moorde hok te slaan nie. • Verdere gekarring aan die Grondwet in 'n poging om die weg te baan vir grondonteiening sonder vergoeding.

• Moontlike aanvaarding van die Wet op Haatspraak uitsluitlik gemik teen blankes om kritiek op swart mense te bekamp.

• Wetgewing om sover moontlik vuurwapens uit die hande van blankes te hou en die private veiligheidsektor erg te kniehalter. •

Wetgewing om staatsregulering van kerke te probeer bevorder.

• Wetgewing om praktyke soos homoseksualisme en prostitusie te beskerm.

• Verskeie konsepwetgewing om SA nader aan 'n Kommunistiese opset te druk.

Hierdie is werklikhede op die tafel. Daar is egter ook positiewe aspekte: In 'n Parlement waarin God nie amptelik erken word nie, stel die hoofregter vir die eerste keer 'n gebedsgeleentheid in en stel die voorbeeld deur op sy knieë te gaan en hardop tot God-Drieënig te bid, uit die breë publiek verteenwoordigend van alle rasse en gemeenskappe gaan daar gebede op tot God-Drieënig vir herstel en seën vir Suid-Afrika, die Zondo-kommissie stoom onbevrees voort om die een korrupsienes na die ander te ontbloot, ens.

Dus, hoewel dinge 13 is, is daar hoop. Mag die komende Staatsrede en die 6de Parlement by hierdie hoop aansluit.

Hoop vir beter wind

Dit lyk werklik of in die Noord-Kaap ná die algemene verkiesing ʼn beter regeringswind waai in die persoon en vorm van die nuwe premier dr. Zamani Saul. Hoewel ANC, het hy van meet af gesê geen blouligte, luukshede en portrette in staatskantore vir hom en sy uitvoerende raad nie.

As afskop het hy in sy inhuldigingstoespraak ʼn gebed aangehaal waarin hy God om verskoning vra vir “selfsug en arrogansie.” Hy het ook ondersteuning gevra om “’n lig te wees wat helder skyn in donker plekke en ʼn brug te wees vir mense in nood”. Saul het ook gesê hy wil graag saamwerk met die opposisiepartye in die provinsie ten einde ʼn beter samelewing te skep.

Die nuwe premier het die daad by die woord gevoeg en bestellings vir nuwe motors vir die uitvoerende raad omskep in bestellings vir 27 nuwe ambulanse. Hy het ook gesê die ampswoning van die premier gaan verkoop word en die opbrengs gebruik word vir studiebeurse. Voorts het hy reeds onaangekondig opgedaag by die Mangaliso Sobukwe Hospitaal in Kimberley om hom persoonlik te vergewis van toestande en die gehalte van mediese dienste.

Saul het grootgeword as kind van werklose ouers in ʼn plakkerskamp te Petrusville en het later ‘n meestersgraad aan die UV en nog ‘n meestersgraad aan die Universiteit van Wes -Kaap behaal. Hy het ook aan laasgenoemde universiteit sy doktorsgraad in regte en publieke reg behaal.

Hierdie is geluide en stappe van Saul is iets wat nog nooit van ʼn ANC-leier ervaar is nie en dit voorspel voorwaar goed vir die Noord-Kaap. Vir sy benadering verdien Saul die voorbidding en ondersteuning van alle Noord-Kapenaars.

Terwyl die wêreldpolitiek die afgelope sowat twee dekades gedomineer is deur globalisme, soos gedryf deur die Nuwe Wêreldorde (NWO) met hul strewe om uiteindelik die mensdom onder een wêreldregering te bring, het die ampsaanvaarding van pres. Donald Trump in die VSA tektoniese verskuiwings in die wêreldpolitiek veroorsaak. Trump met sy “Amerika eerste”-benadering het die wêreldtoneel soos ʼn donderslag getref en druis hy, gerugsteun indirek en direk deur nasionalistiese bewegings in ander lande, reëlreg in teen die magtige NWO.

Trump doen alles wat die NWO met hul ekonomiese en sosialistiese imperialisme nie wil hê nie en het sy beleidsrigtings ingrypende veranderende verdelingslyne in die wêreldpolitiek tot gevolg. So bv. het hy ʼn stille samewerkende verhouding met pres. Vladimir Putin van Rusland, self iemand wat nasionalistiesgesind is en nie noodwendig die NWO-pad loop nie.

Voorts het Trump teen Kommunisties-Chinese imperialisme opgestaan en deur verskerpte invoertariewe eerder die plaaslike Amerikaanse ekonomie gestimuleer as om op goedkoop ingevoerde Chinese produkte te steun. Ook het sy administrasie die Chinese tegnologiereus Huawei geïdentifiseer as bloot die tegnologiese arm van die People’s Liberation Army (PLA) van Kommunistiese China en is dienooreenkomstig handel met Huawei ingekort.

Nog ʼn tektoniese verskuiwing is Brexit, met ʼn duidelike oorwig van Britte wat ten gunste is van uittrede uit die Europese Unie (EU), een van die hooffronte van die NWO. Hoewel die skeiding met veel drama gepaardgaan, lyk dit na ʼn uitgemaakte saak dat Brittanje op 31 Oktober vanjaar die EU gaan verlaat, met of sonder ʼn ooreenkoms.

Die voorste aanspraakmakers op die Britse premierskap in die plek van Theresa May, soos Boris Johnson, is feitlik almal sterk pro-Brexit. In elk geval, in die pasafgelope verkiesings vir die EU parlement het aan Britse kant Nigel Farage met sy regse Ukip Party bo uitgekom en wil dit voorkom asof die eeue-oue tradisionele tweepartystelsel in Brittanje van Tories en Arbeiders iets van die verlede kan wees.

In die verkiesings vir die Europese parlement van 23 – 26 Mei 2019 waaraan 28 lidlande deelgeneem het, het nasionalistiese partye, veral in Frankryk, Italië, België en Hongarye, sterk opgang gemaak. In Frankryk bv. het Marine le Pen en haar Rassemblement National meer stemme getrek as pres. Immanuel Macron en sy party.

In Italië het Matteo Salvini en die Lega Party die meeste stemme getrek, terwyl in België Tom van Grieken van Vlaams Belang as die tweede grootste party in Vlaandere na vore getree het. In Hongarye het eerste minister Victor Orban se Fidesz Party weer bo uitgekom, terwyl in lande soos Pole, Duitsland, Griekeland en Spanje nasionalistiese partye ook sterk staan.

Verder word bande tussen die VSA en Japan as tradisioneel die grootste vyand van China – ook al sterker uitgebou en was Trump die eerste buitelandse staatshoof om die nuwe Japanese keiser Naruhito te besoek. Hoewel verhoudinge tussen die VSA en Noord-Korea die jongste tyd afgekoel het, staan betrekkinge tussen die VSA en Suid-Korea en Taiwan sterk as teenvoeter in die Verre Ooste.

Wat China betref as die talrykste bevolking ter wêreld, broei onrus sterk onder die oppervlak, juis ook vanuit nasionalistiese hoeke. In Hong Kong met sy unieke geskiedenis vind voortdurende betogings plaas ten gunste van vryhede onder die totalitêre regime van Beijing, is pas op 5 Junie die 30-jarige herdenking van slagting van duisende betogers op Tiananmen Plein met geweld onderdruk en word in die Chinese provinsie Xinjiang meer as 1 miljoen nasionalistiese Uyghurs in strafkampe aangehou vir “heropvoeding”.

In Latyns-Amerika het die grootste land, Brasilië, in Jair Bolsonaro ‘n regsgeoriënteerde president aan die stuur, terwyl in Mexiko pres. Andrés Obrador gereken word as iemand wat in dieselfde rigting as Trump stap en het verhoudinge tussen hierdie twee lande ook onlangs aansienlik verbeter.

ʼn Kenmerk van die wêreldpolitiek is dat die internasionale media soos CNN, BBC en Al Jazeera, asook groot koerantgroepe, mondstukke is van die NWO, maar ondanks hul propaganda wen nasionalisme tans sterk veld. In wese gaan dit oor ʼn stryd tussen die geskape volkereverskeidenheid van die mensdom aan die een kant en aan die ander kant die verskuilde, gekoördineerde plan van die Bose om die mensdom te homogeniseer en onder een juk te bring. Hierdie stryd speel sigself ook vandag in Suid-Afrika af en of die regsinnige Afrikaner die essensie van hierdie stryd snap en dienooreenkomstig sy eie heil sal kan uitwerk, is ʼn ope vraag.

Hiermee is enkele breë riglyne getrek t.o.v. die wêreldpolitiek, hoewel die toneel veel meer gedetailleerd en genuanseerd is. Daarby is daar altyd wiele binne wiele, terwyl die wêreldpolitiek deurspek is met verskuilde agendas. Breedweg kan egter gesê word dat die uiteensetting hierbo die werklikheid reflekteer.

Die stryd is genadeloos en word 'n spelbreker soos Trump met ʼn passie gehaat en word alles in die stryd gewerp om hom omver te gooi. Hyself is natuurlik alles behalwe volmaak, maar dat hy die waardes en doelstellings verteenwoordig van wat basies uit die Skrif afleibaar is, is gewis en dat hy hierin ook onverbiddelike steun geniet, is eweneens seker.

Johann Dannhauser

Christelike Afrikaanse onderwys is onder beleg a.g.v. verskeie daadwerklike bedreigings, waarvan veral twee van aardskuddende belang is, nl., eerstens, die beoogde invoer van Comprehensive Sexual Education (CSE) in SA staatskole vanaf volgende jaar en, tweedens, implementering van die aanlynregistrasiestelsel in Gauteng vir alle nuwe skolierapplikante.

Die aanlynregistrasiestelsel bring mee dat o.a. nuwe Afrikaanssprekende skolierapplikante nie meer kan gaan na die Afrikaanse skool van hul voorkeur nie, maar moet inskryf by die skool vir hulle aangewys. Terselfdertyd kan Afrikaanse skole verplig word om watter taalsprekende skolier ookal na hulle verwys word, in te neem, of hulle nou plek het of nie.

Hierdie beleid is die produk van die veldtog wat uitgesproke anti-Afrikaanse aktivis en LUR vir Onderwys in Gauteng Panyaza Lesufi al vir jare teen Afrikaanse skole voer. Dit kan enorme implikasies hê vir Afrikaanse skole landswyd, sou die stelsel so uitgebrei word. Daar is 23 719 staatskole in SA, waarvan 1 279 enkelmedium Afrikaans is oftewel 5%, maar steeds moet in Gauteng van hulle gedwing word om andertalige aansoeke te akkommodeer

Aan die ander kant kan diaboliese CSE, soos dit uiteengesit is in die voorbladartikel van hierdie uitgawe, eenvoudig verwoestend wees op die psige van jong kinders. Woorde kan kwalik die vernietigende gevolge beskryf van voortydige blootstelling van onontwikkelde kinders aan seksuele wanpraktyke deur persone met bose agendas.

Albei hierdie verwikkelinge het dus implikasies van waarskynlik die doodsklok vir Christelike Afrikaanse onderwys en derhalwe poog Ditsem Nuus om maksimale teenaksie te mobiliseer in sowel die gedrukte uitgawe van die koerant as op sy digitale platforms. In hierdie uitgawe val die klem op die stop van CSE, met in hierdie rubriek drie onderwysinstansies wat hiertoe met spesifieke insette hul steun toesê.

Bladsy 1 van 3
Go to top