► In Mediumtermynbegroting van Minister van Finansies Tito Mboweni feitlik geen melding van landbou en die geweldige druk op boere oor wydverspreide droogte; op vraag van VF Plus pres. Cyril Ramaphosa ontwykend oor enige bystand aan kommersiële boere ► VF-Plus in Gauteng sê Gauteng Onderwysdepartement moontlik skuldig aan onreëlmatige besteding van R1,2 miljard i.v.m. skoolsvoedingsprojek, dít terwyl die LUR vir Onderwys Panyaza Lesufi Afrikaanse skole vir geringste vermoedelike oortredinge aanspreek ► Dit blyk of dorpe Dewetsdorp, Vanstadensrus en Wepener feitlik geen munisipale dienste ontvang vanaf Mangaung Metro onder wie hulle ingedeel is nie ► Adjunk-pres. David Mabuza op besoek aan China tydens sitting van SA-China Bilaterale Kommissie wys op die talle geïntegreerde tussen die twee lande o.a. dat 65 Chinese maatskappye R116 miljard in SA belê het (hierdie syfer soos genoem, Ditsem Nuus kan nie korrektheid verifieer nie) ► Stad Kaapstad ontvang R300 miljoen van Nederlandse regering om MyCiti snelbusdiens na Khayelitsha en Nyanga uit te brei ► Nederlandse man (35) en vrou (75) in Marlothpark, Komatipoort, vermoor deur versmoring deur hul monde toe te prop, man se vrou en dogter oorleef aanval ► Amerikaanse Huis van Verteenwoordigers stem 232-196 ten gunste van verdere ondersoek of pres. Donald Trump in staat van beskuldiging geplaas moet word oor Oekraïne ► China Mobile in China maak bekend dat sy 5G-tegnologie, 100 keer vinniger as 4G, nou in 50 stede insluitende Beijing en Sjanghai beskikbaar is ►

KragDag uitmuntende uitstalvenster van Afrikaner-entrepreneurskap

Die jaarlikse ekspo KragDag wat in 2007 op die Diamantvallei Landgoed oos van Pretoria naby Rayton op beskeie skaal begin is, het deur die jare gegroei as ‘n toonvenster van Afrikaner-entrepreneurskap, tot waar dit vanjaar 8-10 Augustus bykans 500 uitstallers en meer as 21 000 besoekers getrek het. KragDag spruit deels as reaksie op die toenemende statutêre marginalisering van die Afrikaner uit die hoofstroomekonomie van die land en deels uit die onblusbare ondernemerskap van die Afrikaner en sy strewe na selfstandigheid.

Die KragDag ekspo vanjaar, met as hoofborg Sakeliga van die Solidariteit Groep, het basies bestaan uit die geweldige verskeidenheid van stalletjies en uitstallings grootliks tematies ingeklee, spyseniering vir Afrika, ‘n volledige pretpark, ‘n biertuin en ‘n vermaaklikheidsverhoog met musiek en sang. Vanjaar het vir die eerste keer 'n volwaardige landbou-ekspo, in samewerking met TLU SA, ook bygekom, wat KragDag in sy geheel met sowat 50% vergroot het.

Meer in besonderhede het KragDag 2019 bestaan uit sowat 330 selfstandigheidstema-uitstallers, 165 uitstallers in die Landbou sub-ekspo, 30 uitstallers in die Opvoedkunde sub-ekspo, 20 makeruitstallings, 50 junior entrepreneurs, ’n Snuffelmark, ’n massiewe verskeidenheid verversings, ’n pretpark en vermaak wat enige iets insluit van grootwiel en verhoogoptredes tot ossewa- en helikopterritte.

Terwyl die geleentheid in 'n karnavalatmosfeer plaasvind, val die klem op innovasie en entrepreneurskap, onder die amptelike slagspreuk Doen jou eie ding! Die vrywees-filosofie vorm integraal deel van KragDag en is die aanbiedings dienooreenkomstig gestruktureer.

Tydens die driedaagse ekspo is daar in die KragDag raadsaal ook talle gratis lesings en paneelbesprekings deur kundiges, terwyl in die Landbou sub-ekspo afdeling eweneens 'n verskeidenheid aanbiedings oor boerdery-aangeleenthede in die twee landbousale gedoen word. Benewens 'n slaglamkompetisie en die Toyota Afslaers streekskampioenskappe, sluit aktiwiteite in die arena in vertonings met perde en berede-oorlogvoering, veerastentoonstellings, hommeltuigdemonstrasies en ’n grassnyerresies.

“TLU SA is hoogs in ons skik met vanjaar se KragDag-geleentheid,” sê mnr. Louis Meintjes, president van TLU SA. “Ons is ook baie opgewonde oor die potensiaal van die landbou-sy en is oortuig dat dit in die toekoms nog groter hoogtes gaan bereik.

KragDag het oorspronklik in 2007 by Hendrik en Alida Verwoerd van Diamantvallei Landgoed ontstaan, toe in reaksie op buitensporige Eskom-stygings met gepaardgaande onbetroubare kraglewering, begin uitkyk is vir alternatiewe energie-oplossings. Om hieraan gestalte te gee, het die eerste KragDag Ekspo in 2008 die lig gesien – en is die res geskiedenis.

'n Skoonseun van die Verwoerds, HB Steyn, het mettertyd die uitvoerende rol van KragDag oorgeneem en tesame met familie wat ook op Diamantvallei woonagtig is, die ekspo met sy filosofie en fokus uitgebou. Hendrik en Alida Verwoerd het vroeër vanjaar na Orania verhuis, vanwaar hulle 'n stalletjie vir Orania by KragDag geïnisieer en gefasiliteer het.

Ditsem Nuus as Afrikaanse koerant het vanjaar op sy eie 'n stalletjie by KragDag gehad. Van die waarnemings wat gemaak is, is die hoop wat op die ekspo tasbaar was te midde van 'n vervallende land, die afwesigheid van misdaad en die deurgaanse netheid van die terrein.

KragDag het die stadium bereik waar dit as onderneming feiltlik deur die jaar aandag en bestuur verg en waarin o.m. radiorubrieke, kursusse, bekendstellings van produkte en ondernemings,nuusbriewe en seminare aangebied word. Sodoende verskaf KragDag ʼn platform waardeur Afrikaner-entrepreneurs, innoverende idees en die publiek uniek bymekaar uitgebring word.

Vir meer besonderhede, besoek www.kragdag.co.za.

Gradeer die artikel
(0 stemme)

Lewer kommentaar

Vul al die vereiste velde in (*)

Go to top