Aletheim 1

►►► ANC wou moderne stad ter ere van Nelson Mandela in Transkei laat bou Quna City, tot hede R46 miljoen staatsgeld aan “konsultasiefooie” gespandeer, daarvoor nie eers naambord te wys nie ► Trompsburg en Springfontein in Suid-Vrystaat al week geen drinkwater vanweë Kopanong Munisipaliteit skuld van R200 miljoen aan Bloem Water ► Gauteng LUR vir Onderwys Panyaza Lesufi laat 16 blanke onderwysers by Hoërskool Generaal Smuts in Vereeniging afdank “weens finansies”, maar stel swart personeel in hul plek aan ► In Wes-Kaap erge betogings en skade aan geboue brei uit na Vredenburg, ontwrig tradisioneel blanke en bruin woonbuurte; ooglopende poging om Wes-Kaap onregeerbaar te maak ► Plaasmoord Sondag 11 November 2018, boer, sy lewensmaat, ma en 3 kinders deur gewapende aanvallers oorval, 13-jarige dogter met pistool teen kop aangehou, boer agt keer geskiet voor almal ► Beefmaster van Marquard, Vrystaat, voer al meer beesvleis uit na China, totale Chinese invoer van beesvleis styg 20-voudig vanaf 23 702 ton in 2010 tot 460 000 ton in 2015 ► Vieslike smeerboek oor dr. Verwoerd en die Afrikaner getiteld The man who killed apartheid deur Harris Dounsemetzis tans op winkelrakke ►►►

Rassediskriminasie (61)

Die jeugbemagtigingsprojek, YES, van pres. Cyril Ramaphosa, wat met algemene belastingbetaalde bedryf word, is slegs vir swart, bruin en Indiër jeugdiges en sluit spesifiek blanke jeugdiges uit. Die projek is daarop gemik om jeugdiges tussen die ouderdomme van 18 en 35 te ondersteun om spoedig ‘n werk of ‘n heenkome te vind.

In reaksie hierop sê Solidariteit Jeug in ‘n mediaverklaring: “Hierdie rassemaatreëls is die nuutste in ʼn lang rits rasbehepte beleide wat ten doel het om wit mense bloot op grond van hul velkleur tot tweedeklas burgery te verneder. Uitsluiting op grond van ras is besig om die norm te word. Dit kan gesien word in gevalle soos Sasol se Khanyisa-aandeleskema. Ons durf nie toelaat dat rasse-uitsluiting alledaags en normaal word nie.”

Solidariteit Jeug het in ‘n brief aan Ramaphosa beswaar gemaak teen die uitsluiting van blankes op grond van hul velkleur, terwyl die VF-Plus Jeug by die MRK beswaar gemaak het. In reaksie hierop het YES op Twitter aangekondig dat hulle hul registrasieblad ook vir werklose blanke jeugdiges oopgestel het.

In kommentaar op hierdie jongste stap van YES sê Solidariteit Jeug egter: “Alhoewel Yes4Youth aanvoer dat die program nou oop is vir alle rasse, word jy steeds uitgesluit uit die program as jy wit is. ʼn Boodskap deel jou met hoflike minagting mee dat jy van ander webwerwe kan gebruik maak om jou CV te plaas. Jy kwalifiseer steeds nie vir die YES-program nie, want jy is nie net jonk en werkloos nie – maar wit.”

Solidariteit Jeug gaan nou voort om ʼn klagskrif saam te stel wat mense die geleentheid sal bied om ʼn brief aan die president oor die uitsluiting van werklose jeugdiges bloot op grond van hul velkleur te onderteken - om die klagskrif te onderteken, klik hier. Voorts word tans ʼn regsmening ingewin oor moontlike litigasie in hierdie verband.

Duisende lede van die vakbond Solidariteit het gister saam met onder meer AfriForum, Solidariteit Helpende Hand, die FAK en die Skoleondersteuningsentrum (SOS) in Sandton betoog teen rassediskriminasie by Sasol en teen diskriminasie teen blankes oor die algemeen. Die massaprotesaksie spruit uit Sasol se Khanyisa-aandeleskema vir werknemers wat blanke werknemers uitsluit en net vir swart werkers beskikbaar gestel is.

Solidariteit het in Januarie vanjaar ’n dispuut met Sasol verklaar omdat wit werknemers van die tweede ronde van dié skema uitgesluit is. Die geskil is na die Kommissie vir Versoening, Bemiddeling en Arbitrasie (KVBA) verwys, maar dit het op ʼn dooiepunt geëindig.

Die massa-optog het ʼn memorandum oor hul griewe oorhandig by onderskeidelik die Sasol hoofkantoor in Sandton asook by die kantore van die JSE, waar Sasol as maatskappy genoteer is. Die memorandum aan die JSE lewer ook kritiek op die JSE bemagtigingsegment waarvolgens net swart met swart mag verhandel.

Optoggangers het gesê: “Ons gaan nie toelaat dat rasse-uitsluiting genormaliseer word nie.” Hulle het plakkate gehad met slagspreuke soos: “Velkleur bepaal nie my waarde nie.”

Nadat Minister van Arbeid Mildred Oliphant redelik onlangs nog ʼn minagtende houding gehad het jeens die bevindings van die MRK oor regstellende aksie, het sy nou skynbaar van mening verander en voel moontlik dat die toepassing van regeringsbeleid rakende RA ongrondwetlik is en dat die regering hierdie bevindings behoort om te keer. Volgens haar “sukkel” die regering met die MRK aangesien laasgenoemde “twyfel saai” oor die grondwetlikheid van die Wet op Billike Indiensneming.

Oliphant het haar departement nou opdrag gegee het om die bevindings van die MRK te bestudeer met die oog daarop om arbeidswetgewing positief aan te pas in ooreenstemming met die bevindings van die MRK. Gevolglik sê die VF-plus in ʼn mediaverklaring dat vertrou word dat die minister die MRK-aanbevelings sal aanvaar en die nodige verstellings sal aanbring om te voldoen aan internasionale voorskrifte rakende RA, veral in bedrywe waar die mikpunt van regstelling reeds bereik is, soos in die staatsdiens.

Oor die ooglopende dubbele standaarde en rassisme wat by die Menseregtekommissie (MRK) sigbaar is, sê die Afrikanerbond in ʼn mediaverklaring o.m.: “In die afgelope paar dae was daar voorvalle waar die MRK nie eers die saak ondersoek het nie, maar spoedeisend gereageer het. Op Dinsdag 2 Oktober het die Hot 91.9 FM-aanbieder Sasha Martinengo 'n sekere mening uitgespreek oor Julius Malema en op Donderdag 4 Oktober het die MRK reeds 'n verklaring uitgereik om dit te veroordeel.

“In die geval van mnr. Kessie Nair wat op 16 September 2018 rassistiese kommentaar teen pres. Cyril Ramaphosa op sosiale media gemaak het, het die MRK op 22 September 2018 gereageer waarin hulle die voorval sterk veroordeel het. Hulle het ook gesê: ‘Ons doen dringend 'n beroep op alle Suid-Afrikaners om dit nie te verdra of om hierdie uitsprake te duld nie.’

“Let op die spoedige hantering van die MRK in hierdie gevalle. Kan dit wees omdat sommige politici aan die ontvangkant was?

“Op 7 Augustus het die Afrikanerbond 'n klag by die SAMRK aanhangig gemaak teen die Vrystaatse LUR, Mathabo Leeto, wat in die Vrystaat Wetgewer gesê het. ‘Wit Suid-Afrikaners is verkragters sedert Jan van Riebeeck aangekom het.’ En ook ‘die grafte van wit Suid-Afrikaners moet opgegrawe word sodat hulle liggame aanspreeklik gehou kan word.’

“Dit is nou amper twee maande later en die MRK skitter in hulle afwesigheid. Nie 'n woord van hulle nie, behalwe 'n ontvangserkenning.”

Nadat die Kommissie vir Versoening, Bemiddeling en Arbitrasie (KVBA) vroeër vanjaar in ʼn historiese uitspraak aan Solidariteit toestemming gegee het om te staak weens uitsluiting van blanke werknemers uit die Khanyisa bemagtigingskema van Sasol, het die uitvoerende hoof van Sasol, Stephen Cornell, gesê dat hy nie sy insluitingsmaatreëls rakende Khanyisa gaan wysig nie.

Gevolglik het Solidariteit aangekondig dat hulle voortgaan met hul stakingsplanne. Hulle sê dat dit eenvoudig nie reg is om iemand bloot op grond van sy velkleur, selfs al was hy al vir 35 jaar ʼn getroue werker by Sasol, uit te sluit nie.

Die vakbond Solidariteit het 'n deurbraak-hofbeslissing in sy guns gekry toe die Grondwethof in die uitgerekte SARIPA-saak beslis het dat die lukrake toepassing van regstellende aksie tot ʼn end moet kom. Die hofgeding was die gevolg van ʼn beleid wat die Minister van Justisie en die Meester van die Hooggeregshof ingestel het vir die aanstelling van likwidateurs uitsluitlik op grond van ras.

Volgens die omstrede aanstellingsbeleid moes 40% van alle aanstellings aan swart, bruin, Indiër- en Chinese vroue toegeken word; gevolg deur 30% aan swart, bruin, Indiër- en Chinese mans; 20% aan wit vroue, terwyl slegs 10% van alle aanstellings vir wit mans gereseveer is. As sulks is volgens Solidariteit die beleid in teenstelling met ʼn meer omvattende en genuanseerde benadering wat gegrond is op meriete en opleiding.

In hul kommentaar ná die saak sê Solidariteit: “Met dié saak is ʼn streep in die sand getrek en gesê genoeg is genoeg! Dié rasbehepte benadering in plaas van ʼn meer omvattende en genuanseerde benadering gegrond op meriete en opleiding, is nie goed vir die land en sy burgers nie.” Vir meer besonderhede, kontak Anton van der Bijl van Solidariteit Arbeidsreg by 083 291 6855.

'n Wetsontwerp word in die Parlement ter tafel gelê wat daarop gemik is om die eiendomsagentskapsbedryf ingrypend te “transformeer” ten einde die sowat 95% blanke gesigte in die bedryf om te swaai na 'n bedryf feitlik totaal in swart hande. Dit volg op 'n vroeëre bevinding van die Grondwethof dat sekere dele van die bestaande Wet op Eiendomsagentskapsaangeleenthede van 1976 ongrondwetlik is.

Die wetsontwerp het ook ten doel om die Raad op Eiendomsagentskappe te vervang met 'n nuwe entiteit, die Regulatoriese Owerheid vir Eiendomspraktisyns. Verreikende magte word ook vir laasgenoemde voorsien, terwyl 'n transformasiefonds en programme om swart toetreders tot die bedryf te ondersteun, ook in die vooruitsig gestel word.

Daar word gesê dat die feit dat slegs sowat 5% van eiendomsagente in die land swart of bruin is, is totaal onaanvaarbaar en moet omgekeer word. Na skatting is die eiendomsektor in die land ongeveer R6 000 miljard werd.

Hierdie drastiese wetsontwerp behoort gesien te word binne die konteks van die huidige dryf vir eiendomsonteiening sonder vergoeding en is sonder twyfel daarop gemik om blanke Suid-Afrikaners in hul eie land sover moontlik te ontheem.

Die afgelope twee weke was waarskynlik die bloedigste nog in die toenemende terroristiese aanslag teen blankes in SA sedert 1994, met vier wreedaardige plaasmoorde en verskeie ander blankes in dorpe en stede in hul huise en werkplekke vermoor. Voorverlede Saterdag is Jeffrey Zetler (62), eienaar van Mooiberg Strawberry Farms naby Stellenbosch, verskaffers van aarbeie landswyd en aan uitvoermark, in sy kantoor met ‘n mes doodgesteek. Sy maatskappy het 1 000 werknemers in diens en is een van die mees vooraanstaande landboubedrywe in die Wes-Kaap en selfs in die land.

Dieselfde naweek is by Hartbeespoort Peter Dawson (65) in sy huis om middernag deur drie aanvallers summier doodgeskiet toe hy, volgens hulle, te veel gepraat het. Sy dogter, wat 'n ooggetuie was, het daarin geslaag om te ontsnap en ver gehardloop om hulp te gaan ontbied.

Naby Rustenburg is Kallie Schoonraad (47) en sy gesin op 23 Junie om 20:00 in hul plaashuis naby Shylock, deur vyf gewapendes oorval en is Kallie doodgeskiet en sy gesinslede aangerand. Op die plaas Leeuwfontein, Roodeplaat, Gauteng is

Jonty Jacobs (28) twee keer geskiet in 'n nagaanval en is hy in ‘n kritieke toestand in die hospitaal oopgeneem.

By Vanstadensrus in die suidoos-Vrystaat is Choppie Bruwer (78) en sy vrou Marian (68) dood met kopskote en vasgebind op stoele in hul plaashuis aangetref. Hulle was net 'n jaar getroud.

Die afgelope sowat 120 uur is nog sewe plaasaanvalle aangemeld, nie een waarvan sover bekend noodlottig was nie. Betroubare inligting vanaf een of enkele bronne is egter skaars en derhalwe moet na inligting uit verskillende oorde gekyk word en moet dit ook eers geverifieer word.

Hierdie berig fokus ook net op plaasaanvalle, terwyl bekend is dat daar in dorpe en stede deurlopend aanvalle op blankes in hul huise en werkplekke is. So bv. is in die afgelope tyd te Parys Pierre Lotz (77), oud-direkteur van onderwys in Gauteng, in die nag in sy huis só deur drie aanvallers geslaan dat hy gesterf het.

Groot ontevredenheid heers in blanke geledere omdat nóg pres. Cyril Ramaphosa nog enige ander regeringsleier enige simpatie of ongelukkigheid met hierdie moorde uitgespreek het nie. Op sosiale media word wyd die gevolgtrekking gemaak dat hierdie stilte beteken stilswyende goedkeuring van die situasie wat nie anders beskou kan word as terrorisme en uiterse rassisme teen blankes nie.

Die twee veroordeelde mans in die sg. doodskissaak, Willem Oosthuizen en Theo Jackson, het ook in die Appèlhof 'n bloutjie geloop om te appelleer teen hul tronkstraf van onderskeidelik 14 en 11 jaar. Die twee is verlede jaar in die Hooggeregshof skuldig bevind aan aanranding, poging tot moord, menseroof en intimidasie en die regter het hul optrede bestempel as “vernederend, walglik en teen die gees van die Grondwet”.

Die Hooggeregshof het ook beslis dat hulle mag nie appelleer nie, 'n beslissing wat deur die Appèlhof gehandhaaf is, met die bevinding dat daar “geen redelike vooruitsigte op sukses is nie en ook geen dwingende rede hoekom hulle mag appelleer nie. Intussen loop die man wat hulle in die doodskis wou indwing, Victor Mlotshwa, vry en sonder 'n sigbare skeet rond.

Volgens 'n skriftelike antwoord van Minister van Staatsdiens en Administrasie, Ayanda Dlodlo op 'n Parlementêre vraag van die VF Plus, blyk dit dat daar nog geen afplatting in sg. regstellende aksie is ondanks die feit dat demografiese teikens in die staatsdiens lank reeds bereik is.

Blankes met 7,5% in die staatsdiens is tans 1,4% onderverteenwoordig, waar dit vier jaar 8,8% was. Bruines is met 0,3% onderverteenwoordig alhoewel hul situasie effe verbeter het oor die laaste vier jaar, en Indiërs met 2,5% is presies reg.

Daarenteen is die verteenwoordiging van swartes wat 79,2% van die bevolking uitmaak, tans met 2,2% oorverteenwoordig in die staatsdiens op 81,4%.

Bladsy 1 van 5

VVK2 banier