► Met meer as 80% van stemme getel in die verkiesing, staan nasionaal die ANC op sowat 57%, DA 22%, EFF 10%, IVP 3% en VF Plus 2,5%, met die res in bondel agterna ► Wat provinsies betref, is ANC loshande top in agt van die nege, met die Wes-Kaap wat steeds onder DA bly ► Algemene patrone op hierdie stadium is dat die ANC redelik gevaar het ten spyte van skandes van staatskaping en die gemors waarin die land gedompel is; DA het nie aan verwagtinge voldoen nie en is waarskynlik grootste verloorder om verskeie redes; IVP, VF Plus en EFF het almal hul mindere steun feitlik verdubbel, grootbek BLF heeltemal uit die bus met slegs sowat 8 000 stemme in totaal ► Kleiner partye maak groot bohaai oor bedrog met stemmery in die verkiesing, maar OVK sê ná deeglike ondersoek is weinig stawende bewyse gevind; luister bv. na hierdie stemgreep van Front Nasionaal en vorm jou eie mening ► Alliance Defending the Autonomy of Churches in SA (AdacSA) vandag in Pretoria se hooggeregshof vir saak om outonomie van kerke en godsdiensvryheid in SA te verdedig ► Zondo-kommissie hoor oor Transnet dat finansiële hoof van die maatskappy het mag gehad om kontrakte en tenders van tot R1 miljard alleen toe te ken ► MTN, een van die boikotters van Steve Hofmeyr, verloor in eerste kwartaal vanjaar meer as 1,3 miljoen kliënte ► Oor wie die beste skolerugbyspan in die land is, word môre in Bloemfontein bepaal wanneer Grey Kollege en Hoër Jongenskool Paarl (Boishaai) mekaar pak ►

Die klagte van die Nelson Mandela Stigting en die Menseregtekommissie (MRK) voor die Gelykheidshof dat die vorige landsvlag as haatspraak verklaar moet word en dat die vertoon daarvan selfs in private huise strafregtelik vervolgbaar gemaak moet word, kom neer op die ernstigste aantasting nóg van die kultuurerfenis en karakter van die Afrikaner as volk in eie reg. Word egter gelet op die tersaaklike feite, dan is dit duidelik dat hierdie poging nie net berus op gruwelike onwaarhede nie, maar dat dit ook behels skreiende dubbele standaarde en erge diskriminasie.

Wat is die tersaaklike feite? Dit blyk indien kortliks gelet word op die onderskeie geskiedenisse van die volgende drie vlae: Die vorige landsvlag, die huidige landsvlag en die Kommunistiese vlag oftewel die hamer-en-sekel. Wat het in die geskiedenis van elk van hierdie drie vlae gebeur, m.a.w. wat is die verhaal van elkeen?

 

Die vorige landsvlag:

  • Onder hierdie vlag is God-Drieënig erken as die Albeskikker en is die land basies ooreenkomstig Bybelse riglyne van geregtigheid, billikheid, vrede, omgee en dienslewering regeer. Ja, alles was nie volmaak nie, maar dit was ʼn ander bedeling waarin die lewegewende vereistes van die Skepper van die mens erken en gerespekteer is.
  • Die beleid onder die eerste ministerskap van dr. HF Verwoerd 1958-66 was afsonderlike ontwikkeling, d.w.s. volledige vrymaking van individuele swart volke op hul eie grondgebied en nie diskriminerende “apartheid” nie. Daarvan getuig o.a. die state en regeringstrukture soos Transkei, Bophuthatswana, Ciskei en andere wat met hoofsaaklik blanke belastingbetalergeld tot stand gebring is.
  • In die vroeë sestigerjare het die BBP van SA jaarliks teen 'n koers van 6% gegroei, terwyl die inflasiekoers 2% was. Die land was selfversorgend vir sy voedsel, terwyl hy 'n vername uitvoerder van vrugte en graanprodukte geword het.
  • Met die stigting van Sasol en die verkryging van brandstof uit steenkool, was die land besig om hom van sy afhanklikheid van die buitelandse oliemark te speen. Sy verdedigingsmag het een van die doeltreffendste ter wêreld geword, terwyl op die gebied van wetenskap en kernnavorsing Suid-Afrika 'n wêreldleidende rol begin speel het.
  • Slegs 5% van die swart bevolking was teen 1966 nog werkloos. In 1970 verdien swart werkers 'n totaal van R1 751 miljoen oftewel 25,5% van die totale loongeld in SA, 'n syfer wat styg tot R17 238 miljoen in 1984 (1 000% groei).
  • Die begrotingsbedrag vir swart onderwys styg jaarliks vanaf 1970 met bykans 30% meer as enige ander staatsdepartement. Van 1955 tot 1984 styg die aantal swart skoliere van 35 000 tot 1 096 000, d.w.s. 31-voudig.
  • Teen 1972 besit swartmense in SA 360 000 voertuie - meer as in al die swart state van Afrika saam. In die laat tagtigs was daar in Soweto alleen meer as 2 300 geregistreerde firmas, 1 000 taxi-ondernemers en 50 000 motoreienaars.
  • In Soweto het die blanke regering 'n reuse hospitaal vir swart mense, Baragwanath, gebou met 3 000 beddens - een van die grootste en modernste ter wêreld. Sy 23 operasieteaters is voorsien van die heel modernste toerusting en word swart mense teen 'n nominale koste van R2 vir 'n onbeperkte tydperk behandel. Die hospitaal het 8 000 personeellede in diens gehad, waaronder 450 voltydse dokters wat jaarliks 112 000 binne-pasiente en 1,62 miljoen buite-pasiente behandel.
  • In 1978 bou die SA regering die hoogs moderne opleidingshospitaalkompleks, Medunsa, op die grens van die destydse onafhanklike Bophuthatswana teen R70 miljoen op 35 ha. Hierdie “stad” in die kleine het woongeriewe vir manlike en vroulike studente bevat waar swart dokters, tandartse, veeartse en paramediese personeel opgelei kon word - die enigste gespesialiseerde universiteit van sy soort in Afrika. Praktiese opleiding het plaasgevind in die nabygeleë Garankuwa Hospitaal waar die hele spektrum van menslike kwale behandel is.
  • In die 1986/1987 boekjaar betaal blankes R9 000 miljoen belasting, swartes R171 miljoen, Indiërs R257 miljoen en Kleurlinge R315 miljoen.
  • In 1985 was 42 000 swart studente aan SA universiteite ingeskryf, met 5 swart universiteite en 28 inrigtings vir hoër onderwys, almal staatsgefinansier.
  • SA het in die graanbehoeftes van sy buurlande en wyer voorsien - in 1980 word 250 000 ton mielies na Zambië uitgevoer, 150 000 ton mielies en 50 000 ton koring na Mosambiek, 128 000 ton mielies na Kenia en 100 000 ton mielies na Zimbabwe. Verder ontvang ook Angola, Ivoorkus, Malawi, Mauritius, Tanzanië en Zaïre SA graan.
  • SA is aangekla deur die wêreld dat dit 'n polisiestaat is, maar in SA was 1,4 polisiemanne vir elke 1 000 mense, teenoor die ooreenstemmende syfer van 2,2 vir Brittanje, 3,5 vir Israel, 4,3 vir New York, en 10 vir Moskou.
  • In die loop van die tagtigerjare het die SA Weermag die Grensoorlog in die noorde van die destydse SWA / Angola teen die Russiese en Kubaanse invalsmagte gewen en het dit 'n sleutelrol gespeel in die uiteindelike val van die Sowjetryk. Teen hierdie weermag het die ANC-Umkhonto we Sizwe geen kans gestaan nie en ook geen veldslag gewen nie.
  • Die vorige SA regering, veral onder oud-pres. PW Botha het sterk probeer om deur politieke “hervormings” by radikale en buitelandse eise aan te pas, maar in sy woorde: “Hoe meer hervorming ons deurvoer, hoe meer word ons verdoem. Hoe meer ons wegbeweeg van apartheid, des te woedender word die internasionale veldtog teen ons…”
  • Natuurlik was alles in die vorige bedeling nie maanskyn en rose nie en het daar ook slegte dinge gebeur. Die punt is egter dat daar in die vorige bedeling, onder die vorige landsvlag, veel was wat goed was en waarin die Afrikaner die leidende rol gespeel en die oorwig van die las gedra het.
  • Trouens onder die vorige landsvlag was daar baie om op trots te wees, inderdaad soveel so dat hierdie vlag integraal en simbolies deel van die DNA en van die kultuurerfenis van die regsinnige Afrikaner geword het.

Die huidige landsvlag:

  • Onder die huidige landsvlag het in 1994 'n Grondwet en staatkundige bedeling in werking getree waarin God-Drieënig as die Albeskikker geïgnoreer en buite orde gestel is en dit aan die mens as die skepsel oorgelaat is om self sy heil uit te werk. Met die bewindsaanvaarding van die ANC het hierdie sekulêre en voorheen terroristiese organisasie in effek die hoogste gesag geword – met wat later geblyk het uiters rampspoedige gevolge te wees.
  • Die aanvanklike euforie van die kunsmatige samevoeging van die SA bevolkingsverskeidenheid het spoedig plek gemaak vir ontnugtering met die eensydige en eskalerende bevoordeling van slegs die regeringselite oftewel kaderbegunstiging. Dit het begin met massiewe korrupsie van die sg. wapenskandaal – voorspel tot die voorheen ondenkbare hoofstukke van staatskaping wat sou volg met Eskom, Transnet, OBK, SAID en andere en wat behels het die blatante uitverkoop van SA en sy burgers aan buitelandse rampokkers in ruil vir persoonlike wins.
  • Onder die ANC-bewind het nepotisme, korrupsie en onbevoegdheid hande gevat om alle staatsondernemings te laat verval in verliese van miljarde rand, is feitlik alle munisipaliteite in die land geplunder tot leë doppe en wanfunksionaliteit en het voorheen trotse dorpe en stede gekrepeer tot vuil lokasies. Die geldvloei van die staatskas het via staatsdepartemente, provinsiale regerings en die nasionale Tesourie in der mate agteruitgeboer dat dit tans permanent in die rooi loop.
  • As voorbeeld op provinsiale vlak toon 'n verslag van die Instituut vir Rasseverhoudinge hoe die Vrystaat as provinsie onder premierskap van Ace Magashule verskroeide aarde gemaak is – meeste geld in gekaapte projekte, hoogste werkloosheid, minste beleggings van buite, grootste tekort aan HOP-huise, swakste munisipaliteite en laagste lewensverwagting.
  • Die nasionale ekonomiese groeikoers het gekrimp tot 0,9 %, werkloosheid het oorhand toegeneem tot na prakties raming meer as 50% gemiddeld en op plekke selfs meer as 90% en die aantal afhanklikes van staatstoelaes het opgeskiet tot sowat 17 miljoen – meer as die aantal belastingbetalers.
  • 'n Sleutelkomponent in die nuwe bedeling is die eskalerende implementering van sg. regstellende aksie en SEB om die swart meerderheid teen die blanke minderheid te beskerm – meer neo-apartheid op die wetboek as ooit voorheen – met rampspoedige gevolge vir die land i.t.v. vaardighede, entrepreneurskap en produktiwiteit.
  • Op onderwysvlak het rampspoedige leerplanne en grootlikse wegdoen met moedertaalonderrig daartoe gelei dat slegs sowat 30% van graad 1 leerders uiteindelik Matriek maak en dat van laasgenoemde minder as 1% 'n universiteitsgraad behaal. Met die wegdoen van lyfstraf en behoorlike dissipline het skoolterreine in talle gevalle slagvelde vir geweld, dwelms en swangerskappe geword. Daarby volgens die Nasionale Raad vir Mense met Gestremdhede (NCPD) gaan minstens 500 000 gestremde leerlinge glad nie skooltoe nie.
  • Op mediese en gesondheidsgebied is dit ellende in staathospitale en klinieke, met talle wat al eenvoudig gesluit moes word. Pasiënte moet daagliks in lang toue sit en wag om dalk êrens gehelp te word. Een voorbeeld van die situasie: 'n Onlangse besoeker aan die eens trotse Baragwanath Hospitaal sien toevallig duisende nuwe hospitaalbeddens onbenut opgestapel op 'n oop perseel – dit terwyl honderde selfs duisende pasiënte in staatshospitale in Gauteng en elders op matrasse op vloere moet lê.
  • Die tragiese gevolg is dat plakkerskampe oral soos paddastoele opskiet en dat dit oorhand uitbrei, met haglike sosio-ekonomiese gevolge en 'n swart en bruin jeugmassa in die land wat óf halfopgelei óf onopgeleid is vir enige betekenisvolle werk. Dit lei weer tot desperate sg. diensleweringsbetogings, wat as net een enkele voorbeeld in Pretoria ontaard het in betogers wat die kerk van die Hervormde Gemeente Wesmoot geplunder het, loodglasvensters uitgegooi, kerkbanke omgegooi en boeke en Bybels rondgestrooi het.
  • Misdaad in die land vier hoogty en in 2018 is volgens SAPD-syfers 20 336 mense vermoor oftewel gemiddeld 57 per dag. Word gelet op die praktyk, dan blyk dit dat in gevalle van moorde op blankes, dit feitlik 99% swart op wit is, met slegs enkele gevalle waar swartes die lewe laat a.g.v. blankes. Dit geld veral die onophoudelike stroom plaasaanvalle en –moorde die afgelope 25 jaar – net vir vanjaar volgens statistiek van ToekomsVonk was daar in SA van 1 Januarie tot 30 April 162 plaasaanvalle en 16 plaasmoorde - wat beteken ʼn plaasaanval elke dag en ʼn plaasmoord elke 7,5 dae.
  • Hierdie totale situasie het gekulmineer in internasionale afgradering van Suid-Afrika na amptelik rommelstatus - en dit alles onder die huidige landsvlag. Die rekord in hierdie verband spreek dus vanself.

 

Onder die Kommunistiese vlag:

  • Onder die hamer-en-sekel is van die grootste en onmenslikste menseslagtings in die geskiedenis van die wêreld gepleeg en het in Rusland en China onder Kommunistiese rewolusies konserwatief beraam meer as 100 miljoen mense omgekom. Behalwe vir die lewensverlies, was menslike lyding onbeskryflik, terwyl lande letterlik verwoes is.
  • Hoewel beraamde getalle van navorsers wissel, word in die gesaghebbende en internasionaal-erkende boek The Black Book of Communism: Crimes, Terror, Repression deur Stéphane Cotois en ander Europese akademici, die volgende sterfte onder Kommunistiese diktatuur gelys: China 65 miljoen, die Sowjet-unie 20 miljoen, Kambodja 2 miljoen, Noord-Korea 2 miljoen, Ethiopië 1,7 miljoen, Afganistan 1,5 miljoen, Oos-Europa 1 miljoen, Viëtnam 1 miljoen, Latyns-Amerika 150 000 en in nog ander lande 10 000 plus nog ongenoemdes.
  • Sterftes onder Kommunisme was breedweg summiere teregstellings, massahongersnode, volksmoorde, ontberings in strafkampe, ens.
  • Vandag in China word Kommunistiese diktatuur sterker as ooit toegepas, met o.a. meedoënlose vervolging van die reeds ondergrondse maar snelgroeiende Christelike Kerk. In die gekolonialiseerde provinsie Xinjiang, in oppervlakte drie keer groter as Frankryk, word meer as 1 miljoen inheemse Uyghurs in konsentrasiekampe aangehou vir doeleindes van sg. heropvoeding. Te Hong Kong word nasionalistiesgesinde leiers lang tronkstrawwe opgelê deur die Chinese owerheid.
  • Wat Kommunistiese Noord-Korea betref, word in ‘n onlangse nuusbrief van Geopende Deure weereens gewys op die ergste vervolging van Christene ter wêreld, waar Christene en hul families tot selfs in die vierde geslag tereggestel word, maar desniteenstaande is daar steeds sowat 300 000 ondergrondse Christen-gelowiges in die land. Nagenoeg 50% van die bevolking van 25,5 miljoen is ondervoed.
  • Ongeag hierdie bloedige verhaal sonder presedent in die geskiedenis van die wêreld mag in SA die bose hamer-en-sekel vryelik wapper.

Teen hierdie agtergrond kan tot die volgende slotsom gekom word:

  • Wat opbouendheid betref, staan tussen die drie vlae die vorige landsvlag kop en skouers uit, trouens daar is eintlik nie 'n vergelyking nie.
  • Die vorige landsvlag is vir die Afrikaner as volk 'n eiendomlikheid wat gekoester en beskerm moet word.
  • Die huidige landsvlag is grondwetlik tans die amptelike vlag, wat as sulks vireers erken en gerespekteer moet word.
  • Gegee die geskiedenisse van die drie vlae, kom dit neer op gruwelike dubbele standaarde om die vorige landsvlag te wil verbied, maar die hamer-en-sekel vryelik toe te laat.
  • Daar is ‘n bose verborge agenda agter die huidige dryf om die vorige landsvlag te kriminaliseer en derhalwe behoort dit met alle mag teengestaan te word.
  • Die aanslag teen die vorige landsvlag is inderwaarheid 'n aanslag teen die wese van die Afrikaner.
  • Die vertoon van die hamer-en-sekel behoort eintlik in enige vrye land gekriminaliseer te word.

Op die internasionale front is die grootste verwikkeling die handelstariefoorlog waarin die VSA en China tans indryf, met die VSA wat sy algemene invoertariewe op Chinese goedere verhoog vanaf 10% na 25%. Dít nadat intense onderhandelinge tussen die twee moondhede misluk het. Die volgende twiet van pres. Donald Trump sê dit alles: “We have lost 500 Billion Dollars a year, for many years, on Crazy Trade with China. NO MORE!” – Trump 10 Mei 2019.

Inmiddels, soos die spreekwoord lui, as die olifante stoei, dan moet die gras ly – wêreldwyd sidder internasionale geldmarkte, terwyl die pryse van kommoditeite soos klere styg. Dit geld ook vir Suid-Afrika.

Met die stemme feitlik klaar getel, is die volgende na ons mening die vernaamste gevolgtrekkings om op hierdie stadium te maak:

  • Nasionaal het die ANC 57.5% behaal, die DA 20.8%, die EFF 10.8%, die IVP 3,51% en die VF Plus 2,32%, met die res in ʼn bondel agterna.
  • Dit is verstommend dat die ANC ondanks aaklige staatskapings en massiewe korrupsie steeds die meerderheids- en regeringsparty is. Dit toon politieke onvolwassenheid by ʼn groot deel van die bevolking. Maatskaplike toelaes aan sowat 16 miljoen mense is ook ‘n faktor.
  • Die grootste verloorder is waarskynlik die DA, wat veel meer munt moes geslaan het uit die kwesbaarheid van die ANC, maar dit nie kon doen weens gebrekkige leierskap nie.
  • Die EFF het sterk na vore getree met verhoogde stemtotale en het die DA onttroon in Noordwes en Mpumalanga as die amptelike opposisie. Hulle is ook in Limpopo steeds die amptelike opposisie.
  • Die ANC het in agt van die nege provinsies loshande bo uitgekom en hoef nie in koalisie te gaan nie.
  • Die DA het, danksy soliede Kleurlingstem, beheer oor die Wes-Kaap behou, met die EFF wat voor die GOOD-party en die VF Plus geëindig het.
  • Die IVP het stukke beter gevaar as in die vorige verkiesing en so ook die VF Plus, albei waarvan hulle nou meer setels en sterker verteenwoordiging sal kry.
  • Partye soos die ACDP (0,86%), UDM (0,48%) en COPE (0,27%) in besonder sou beter wou gevaar het as wat hulle gedoen het en as wat hul profiel in die media is.
  • Die enigste ander blanke/Afrikaner party is Front Nasionaal, wat slegs 0,04% kon trek.
  • Die grootbek BLF het genadiglik in die hek geduik met 0,11%, wat hulle waarskynlik nie ʼn setel in die Parlement sal gee nie.
  • Daar was talle klagtes van onreëlmatighede in die stemmery met bv. ʼn LP van COPE wat gesê het dat sy vyf keer sonder ʼn probleem gestem het. Die OVK het egter gesaghebbend verklaar dat ondersoek getoon het dat daar nie ernstige defekte was nie. Dit lyk ook of die groter partye hiermee tevrede is.

Waar laat dit alles die Boere-Afrikaner van Mei 2019? Onbepaald die toekoms in onder verdrukkende en diskriminerende ANC-bewind, of wonderbaarlike saamstaan van regsinniges om selfbeskikking op eie grondgebied en meerderheidsbesetting te bewerkstellig? Dit is die kernvraag wat beantwoord moet word as die Boere-Afrikaner met sy kultuurerfenis en vryheidsaspirasies as volk wil voortbestaan.

Nadat die organisasie Black First Land First (BLF) deur die Gelykheidshof beveel is om skriftelike verskoning te bied aan alle Suid-Afrikaners omdat hul slagspreuk Land or Death neerkom op haatspraak, het hulle by monde van hul leier Andile Mngxitama botweg geweier om daaraan gehoor te gee. Die BLF, wat ook berug is vir slagspreuke soos Kill the Boer en One settler, one bullet weier ook om die slagspreuk te verwyder van hul sosiale mediaplatforms, webwerf en ander promosiemateriaal.

Die BLF, wat in 2015 gestig is deur Mngxitama as voormalige EFF-lid, se hoofbeleid is grondonteiening sonder vergoeding in blanke besit, al moet dit gepaard gaan met bloedvergieting . Mngxitama was verlede jaar ook in die moeilikheid by die Gelykheidshof nadat hy moord op blankes, insluitende vroue en kinders, blatant aangehits het

Inmiddels lyk dit of die BLF power vaar in die verkiesing van 8 Mei en is dit te betwyfel of hulle êrens ‘n enkele setel sal inpalm. Die legitimiteit van hul deelname aan die verkiesing word in elk geval betwis nadat die Gelykheidshof die VF Plus gelyk gegee het dat die OVK wetlik oortree het deur die BLF as politieke party te registreer, omdat die organisasie volgens sy grondwet slegs vir swart mense oop is.

Terwyl die nasionale kragvoorsiener spartel om aan die groeiende aanvraag van elektrisiteit te voorsien, is daar potensieel ’n alternatiewe oplossing vir die Noord-Kaapse dorp Kathu. Dit is in die vorm van die grootste sonplaas in SA naby die dorp, wat elektriese krag kan lewer van 100 MW, genoeg vir sowat 179 000 huishoudings ononderbroke krag.

Die Kathu Solar Park (KSP) projek, wat in 2016 begin ontwikkel is, is 'n 100 MW Greenfield Gekonsentreerde Sonkrag (CSP) projek met paraboliese trog en gesmelte soutstoortegnologie. Die aanleg, wat 600 ha beslaan, bestaan uit ʼn totaal van 384 000 panele.

Die aanleg is anders as enige ander sonplaas, want krag word in ’n reuse stel batterye opgegaar om te verseker dat krag beskikbaar is selfs op reënerige of bewolkte dae. Die stoorstelsel maak dit voorts moontlik om 4.5 ure van hitte-energie te berg ten einde die gevolge van onreëlmatige sonlig te absorbeer en selfs om elektrisiteit op te wek ná sonsondergang.

Daar word verklaar dat die Kathu-aanleg binne 20 jaar 6 miljoen ton CO2 in die atmosfeer sal spaar. In die konstruksiefase van die projek is sowat 1 700 werksgeleenthede geskep.

Die projek dien ter bevestiging van die siening dat die Noord-Kaap die mekka van sonkrag in SA is – ʼn potensiaal wat nog ver van behoorlike benutting is. Die sleutelvraag is hoe om die monopolistiese knelgreep van Eskom te verbreek.

Omstrede LUR vir Onderwys in Gauteng Panyaza Lesufi, bekend vir sy aanvalle op Afrikaanssprekende skole en hul taal-en toelatingsbeleid, het bedank uit sy pos. Die LUR, aktief op Twitter, het na aanleiding van sy aankondiging op sosiale media 'n uitstorting van kommentaar ontvang waarin sy aanhangers hom ondersteun en ander weer juig oor sy vertrek.

Tydens die ampstermyn van Lesufi moes die Gauteng onderwys departement handel met verouderde en verslegtende skoolinfrastruktuur veroorsaak juis deur gebrekkige of geen instandhoudingswerk. Daarvan is die Driehoek-brugtragedie vroeër vanjaar in Vanderbijlpark sprekende getuienis en ten opsigte waarvan Lesufi en sy voormalige departement strafregtelike aanklagte in die gesig staar.

Die Gauteng regering begroot jaarliks R1 miljard vir die opknapping en opgradering van openbare skole, maar die behoefte in hierdie verband in terme van geldwaarde, beloop alreeds ʼn massiewe R5 miljard. Dit beteken ʼn krisis met geen einde in sig nie.

Lesufi het voorts tydens sy termyn ʼn groot aantal enkelmedium Afrikaanse skole in Gauteng gedwing om tot dubbelmedium-onderrig oor te skakel deur meer swart leerlinge in te neem, dit ten spyte van die feit dat naby hulle Engelsmediumskole met ruimte vir hulle was. Volgens die Nasionale Raad van Provinsies (NRP) is daar jaarliks ’n toename van ongeveer 85 000 leerders in Gauteng , hoofsaaklik a.g.v. migrasie. Indien die onderwysdepartement genoeg skole sou gebou het, was daar nie nou die kritieke tekort van 142 nuwe skole, waaronder 85 primêr en 57 sekondêr.

In nasionale verband kan volgens die Suid-Afrikaanse Instituut vir Rasseverhoudinge minstens 75% van skole in SA as wanfunksioneel beskou word en tot 80% van graad 4’s as funksioneel ongeletterd. Daar is wetenskaplik bevind dat ʼn meerderheid kinders uit SA staatskole nie op die vereiste opvoedkundige vlak is vir hul graad of ouderdom nie en dat dit hulle swak voorbereid laat vir tersiêre studie en die werksplek.    

Onder Lesufi se onderwysbewind is daar min of geen verbeteringe aan die onderwysstelsel in Gauteng aangebring, wat hom in geen posisie gelaat het om so jag te maak op Afrikaanse skole en in die proses sy hatigheid en anti-blanke en anti-Afrikaanse politieke agenda so te laat uithang het nie. Vir die toekoms is die vrae wie gaan Lesufi opvolg as LUR en wat gaan van hierdie aktivis word?

Die gedeeltelike lening van R7 miljard wat deur China vir Eskom geoormerk is, word na berig word deur die Chinese eers teruggehou vanweë vrees dat die bankrot staatsentiteit die geld kan gebruik vir die aankoop van diesel, asook vir dag-tot-dag lopende koste, soos salarisse en ander bedryfsuitgawes. Die R33 miljard lening was oorspronklik beloof in die veronderstelling dat Eskom die fondse sou gebruik vir die voltooiing van Medupi en Kusile kragstasies en om dringende herstelwerk te verrig om die nasionale kragnetwerk stabiel te hou om sodoende algehele ineenstorting te voorkom.

Die nasionale kragvoorsiener, wie se skuld tans op R420 miljard beraam word, bevind sigself in diep water weens die toestand van kragstasies wat nie in stand gehou word nie en nuwe kragstasies wat nie op dreef kom nie. Medupi en Kusile wat oorspronklik geskeduleer was om in 2015 ten volle operasioneel te wees, is steeds agter skedule en om albei nou in volle werking te kry, gaan na raming ʼn enorme R18 miljard kos.

Eskom, wat midde in staatskaping was, sukkel ooglopend om in die aanvraag van elektrisiteit te voorsien. Sy werkersmag word bereken op 48 600, wat volgens die Wêreldbank 16 000 te veel is vir die omvang en kapasiteit van die maatskappy.

Voorts word die afgelope dekade jaarliks nagenoeg R47 miljard spandeer op dieselaankope die afgelope 10 jaar ten einde turbines optimaal te probeer hou. Verlede maand is berig dat Eskom reeds sowat R5 miljard in slegs een jaar op dieselaankope bestee het.

Die Gelykheidshof het verlede Maandag ʼn aansoek van die Nelson Mandela Stigting en die Menseregtekommissie aangehoor dat die vorige landsvlag as haatspraak beskou moet word en selfs in private wonings verban moet word. Die “motivering” is dat die vlag rassisties is, rassehaat simboliseer en ʼn teruggryp na ʼn “bose” verlede sou wees.

Die NMS het die aansoek aanvanklik teen AfriForum gebring nadat daar aangevoer is dat lede van die burgerregte-organisasie die ou vlag tydens Swart Maandag-protesoptogte teen plaasmoorde in 2017 vertoon het. AfriForum staan die aansoek teen, ontken die aantygings en voer aan dat ’n verbod op die vorige vlag ongrondwetlik sou wees en sal neerkom op inbreuk op spraakvryheid. Volgens die NMS gebruik hul die reg om die sinnelose tentoonstelling van “apartheidsimbole” te ontmoedig. Hulle erken egter dat die vlag deel van die geskiedenis is, maar sê dit hoort in museums, dokumentêre en kreatiewe katariswerke.

Blanke Suid-Afrikaners, in besonder regsinnige Afrikaners, is egter onbeskaamd trots op die vorige vlag, sonder om die huidige vlag te misken en wys daarop dat die vorige vlag orde, beskawing, vooruitgang, vryheid, respek vir kulturele verskille en ʼn Christelike bestel simboliseer het. Onder dié vlag het Suid-Afrika ʼn republiek geword en ʼn ongekende bloeitydperk op ekonomiese, maatskaplike en militêre gebied beleef, terwyl onder hierdie vlag Kommunistiese Kuba en Rusland in die Grensoorlog verslaan is. Vir emosie en patriotisme oor die vorige vlag, sien hierdie musiekvideo.

’n Totaal van 115 myne in Suid-Afrika word bedryf sonder ’n waterlisensie en 118 uit 712 myne wat wel oor ’n waterlisensie beskik, voldoen nie aan die voorwaardes vir ‘n lisensie nie. Die meeste van die maatskappye wat sonder ʼn waterlisensie myn, kom voor in Mpumalanga (41) wat korreleer met die geweldige omgewingsbesoedeling wat tans in daardie provinsie plaasvind ervaar word. Die tweede meeste mynaktiwiteite sonder waterlisensies kom voor in Gauteng (12) en selfs die omstrede Guptas se Shiva Uranium-myn voldoen nie aan sy waterlisensievoorwaardes nie.

Gegewe die wye omvang van gebrek aan waterlisensies en die klakkelose verbreking van waterlisensievoorwaardes, kom die kwessie van grootskaalse omgewingsbesoedeling in mynstreke te berde. Ongekontroleerde mynbou in SA kan een van die hoofoorsake vir ‘n omgewingsramp in die land wees.

’n 72-jarige vrou wat alleen op ’n plaas woon is verlede naweek naby Redelinghuys in die Wes-Kaap, wreed aangerand, vasgebind en verkrag. ’n Verdagte (28) is intussen op aanklagte van verkragting en huisroof aangekeer en het in die Piketberg landdroshof verskyn. Die bejaarde vrou, wat alleen in ‘n huurhuis woon, het ná die aanval om hulp geskree en bure op die nabygeleë plaas het haar hulp krete gehoor. Kort ná die aanval die verdagte aangekeer .

Die aanval vorm deel van terreur wat tans daagliks teen plaasbewoners, feitlik almal blank, in die land gevoer word. Net gedurende die afgelope Paasnaweek het 13 plaasaanvalle en 3 plaasmoorde voorgekom. Vir statistiek oor hierdie vootgaande terreurgolf, luister na die oorsig deur Steve Hofmeyr by hierdie videogreep.

’n Herrie het uitgebreek ná die bekendstelling van die Springbokke se nuwe truie vir die Wêreldbeker later vanjaar in Japan. Die kenmerkende Springbok-embleem wat die trots van die Groen-en-goud is, pronk nie meer op spelers se bors nie, maar slegs klein op die linkermou. Talle Bok-ondersteuners is warm onder die kraag oor die trui se ontwerp met die WB-logo op die regterbors, Asics-logo in die middel van die trui en die Protea links bokant die hart.

Volgens die klerevervaardiger, Asics sit die Springbok inderdaad op die linkermou omdat spanne verplig is om die “Rugby World Cup”-kenteken regs op hul bors te dra. Op sosiale media wemel dit van ondersteuners wat hul misnoeë met die ontydige boksprong uitspreek. Van die kommentaar is: “Politieke inmenging en voorskrifte!” “Waar is die Springbok? Moet ons hulle nou die Proteas noem?” “Herontwerp die trui, die Springbok moet op die regte plek wees – links bo die hart!”

Ander sê egter: “Ek is mal daaroor.” “Die vere maak nie die voël nie, net solank hulle die Beker huis toe bring!”

Op die keper beskou, die afgradering is onbetwisbaar ‘n klap na nog ‘n erfenis uit die vorige blankbeheerde bedeling.

Die dodetal in KwaZulu-Natal het na die afgelope week se oorstromings reeds meer as 70 lewens geëis en grootskaalse verwoesting van eiendom en infrastruktuur veroorsaak. Talle mense is beseer toe riviere en paaie oorstroom is en huise en geboue te Durban en langs die kus inmekaargestort het. Die skade aan infrastruktuur en geboue word op nagenoeg R1,5 miljard geraam.

Volgens die SA Weerdiens is die uiterste weerstoestande toeskryfbaar aan ’n bolug trog wat oor die oostelike dele van die land inbeweeg het. Intussen werk reddingswerkers onverpoos om mense uit die puin van ineengesterte strukture te red. Gebiede wat die ergste geraak is, is die eThekwini Metro en Ugu- en King Cetshwayo Distriksmunisipaliteite, waar duisende haweloos gelaat is. Strande is vol hope plastiek en rommel wat vanaf die binneland ingespoel het.

Die regering, provinsiaal en sentraal, het miljoene beloof vir noodleniging en heropbou, terwyl pres. Cyril Ramaphosa ‘n week van rou vir slagoffers aangekondig het en opdrag gegee het dat vlae landswyd halfstok hang. Inmiddels vra omgewingsbewustes dat Suid-Afrika die voorbeeld volg van kleiner lande in Afrika, soos Kenia, Marokko en Rwanda en ’n verbod plaas op die gebruik van alle plastiek.

Veelsydige vermaaklikheidskunstenaar Volodymyr Zelenskiy, met geen vorige politieke ondervinding op sy kerfstok nie, het pas die presidentsverkiesing van die Oekraïne oortuigend gewen met 73% van die stemme. Die ster van die TV-reeks, Servant of the People het groot gewildheid verwerf by kykers, maar met sy toetrede tot die werklike politiek, selfs nog meer steun getrek.

Zelenskij het stof geskop in die oë van sittende president Petro Porotsjenko, wat weens bloot sporadiese pogings om korrupsie vas te vat en ’n dalende lewenspeil vir burgers, toenemend in onguns verval het. Vir 'n veldtog wat begin het as 'n grap, maar wat 'n snaar aangeraak het by kiesers wat gefrustreer is deur sosiale onreg, korrupsie en 'n oorlog met Russiesgesteunde separatiste in Oos-Oekraïne, het vir Zelenskij op die kruin van die golf geëindig.

Nou kom leweringstyd egter vir die voormalige komediant en sal hy in die werklikheidspolitiek met sy talle strominge en belange sy staal moet wys. Hy sal ook sy man moet kan staan teen wêreldfigure soos Duitse kanselier Angela Merkel, Russiese president Vladimir Putin en andere.

Die Oekraïne het ‘n lang en traumatiese geskiedenis en of vir hierdie land, waar nog talle spoke uit die verlede ronddwaal, ‘n nuwe era aangebreek het onder die kleurvolle buiteperd, staan gesien te word.

ROCKFEES BY DIE VROUEMONUMENT, OORLOGSMUSEUM. FRONT NASIONAAL RIG BRIEF AAN PROF PIET STRAUSS

Geagte professor Strauss

Re: Beplande Rockfees by die Oorlogsmuseum Bloemfontein: Oktober 2019

Front Nasionaal het met ‘n groot mate van kommer kennis geneem van ‘n advertensie wat uitgestuur is deur die Bemarkingskantoor van die Oorlogsmuseum waarin daar planne bekend gemaak word vir ‘n “Rockfees” by die Oorlogsmuseum in Oktober vanjaar om die 120e jaartal sedert die uitbreek van die Tweede Vryheidsoorlog te herdenk. Hierdie fees word beplan in samewerking met die “Aasvoëlklub” in Bloemfontein. Die advertensie en inligting soos verskaf is hierby aangeheg.

Ons het volle begrip daarvoor dat dit geweldig belangrik is vir monumente en museums om alternatiewe planne te maak om voete te lok en die geskiedenis lewend te hou. Ons voel egter dat dit darem met die nodige respek gedoen behoort te word.

Die oorlogswonde lê nog rou by baie van ons volksgenote. Dit is ‘n natuurlike proses by ‘n volk om, oor verloop van ‘n lang tyd, vrede te maak met die wonde wat hom toegedien is op die wyse waarop dit ons volk toegedien is. Genesing is ‘n proses wat soms geslagte lank duur. Daar is vandag nog wonde in Amerika oor die Burgeroorlog. Daar is vandag nog wonde in Nederland en Frankryk en in Pole oor die Tweede Wêreldoorlog.  Daar is nog rou wonde oor hierdie Oorlog en die uitvloeisel daarvan wat ons so intens beleef in die politieke situasie van die dag. As dit nie was vir die uitwissing wat daar plaasgevind het nie, was ons nie vandag ‘n handjievol mense wat in ons geboorteland vertrap, misken en verdruk word nie. Dan was ons baie meer.

Inderdaad wil ek vir u sê: In my eie familie is daar grootooms en –tantes wat in ongemerkte konsentrasiekampkerkhowe begrawe lê. Hulle is ewig kinders – ontroof van die geleentheid om op te groei en te leef. Hulle enigste grafsteen is die gedenkmuur by die museum, waar ek op 17 Desember verlede jaar lank vertoef het om hulle offer te gedenk.

Die Vrouemonument is nie net ‘n monument nie. Dis ‘n laaste rusplek. Ek het daar ook vertoef by die grafte van president Steyn, generaal De Wet, ds Kestell en Emily Hobhouse. Lank vertoef, want die stilte daar bring jou tot besinning oor watter prys gevra is, en in watter gesindheid dit betaal is.

Professor Strauss, dis nie die plek of die geleentheid vir ‘n Rockfees met ‘n kontantkroeg nie. Dis nie aanvaarbaar om te sê: “Ja maar ons gaan kerse brand en ‘n minuut van stilte handhaaf om die 30 000 vroue en kinders in konsentrasiekampkerkhowe te herdenk…. en daarna verkoop ons drank en rock ons” nie. En verseker stuur dit ‘n baie verwronge boodskap aan die wêreld oor hierdie volk se begrip van eerbied en respek. Ek kan my gewoon nie voorstel dat ‘n Rockfees gehou sal word by Gettysburg of Oradour-sur-Glane nie. Waarom moet ons dit dan hier doen? Oorlogswonde genees nie deur daarop te dans nie.

Die gedagte daaraan het my enersyds met ‘n diep emosionele pyn vervul ter wille van hulle vir wie daardie ‘n laaste rusplek is, maar ook met intense weersin by die gedagte daaraan dat die vorm van die vieringe so lynreg indruis teen die boodskap wat daar versinnelbeeld word.

Ons is ‘n beskaafde volk. ‘n Beskaafde volk huldig sy erfenis met respek, met deernis, met ootmoed en met waardigheid. Vir rockfeeste is daar sale en dansklubs en stadions die hele Vrystaat vol.

Ons is dit met u volkome eens dat die uitbreek van die Oorlog 120 jaar gelede herdenk moet word en dat dit die ideale geleentheid is om opnuut belangstelling te wek in daardie spesifieke gedeelte van ons geskiedenis. Ons wil egter ‘n dringende beroep op u doen om hierdie herdenking op ‘n meer gepaste, meer waardige en meer eerbiedige wyse te vier. En daarmee sal ons u bystaan met alles wat ons moontlik kan bydra. Front Nasionaal sal ons mense aanmoedig om deel te vorm daarvan. Ons sal u ondersteun net waar ons kan.

Dit is egter nie vir ons aanvaarbaar dat ‘n Rockfees met drankverkope by ‘n plek gehou word wat opgerig is om die ellende van die Oorlog en die offers, die lyding, smart en verlies te gedenk nie. En sekerlik nie waar die laaste rusplek van ons volkshelde is nie.

Ons wil u dan net ook vriendelik daarop wys dat die advertensie aandui dat die Afrikaanse sanger, Adam Tas, by die feesgeleentheid gaan optree. Ons het ondertussen ‘n boodskap van hom ontvang waarin hy ontken dat hy ooit genader is om op te tree en geen kennis dra van enige betrokkenheid by die gemelde Rockfees nie.

Ons verneem graag van u in hierdie verband.

Met beste wense

Daniël Lötter

Met hul wortels diep in die Suid-Afrikaanse bodem, is Jupidex ʼn landboumaatskappy wat met 'n beproefde baanrekord landswyd vir die boer van vandag die beste bied i.t.v. toerusting, kundigheid en tegnologie. Oorspronklik gestig in 1999 in die Natalse Middellande deur Koot van der Merwe onder die handelsnaam Kverneland SA, het die maatskappy die afgelope 20 jaar onder die oorkoepelende naam Jupidex fenomenaal gegroei tot ʼn verskaffer van talle reekse van produkte en tegnologiese toepassings.
Die produkte wat verskaf word, dek o.m:
• Strooitoerusting (kunsmisstrooiers, pendulumstrooiers vir toediening van vloeibare bemesting, skottelstrooiers, kalkstrooiers, ens.)
• Grondtoerusting (ploeë, skoffels, planters, disse, kultivators, ens.)
• Hooi- en voertoerusting (snymasjiene, harke, balers, voermengers, hamermeulens, ens.)
• Toerusting vir neutverbouing (neutoes-masjiene, boomskudmasjiene, afvoerwaens, ens.)
• Planttoerusting (mielieplanters, presisie-boorplanters, kombinasieboorplanters, ens.)
• Besproeiingstoerusting (boomsproeiers, spoorsproeiers, boordsproeiers en selfloper)
Wat veral van Jupidex 'n markleier in die landboubedryf maak, is die unieke, internasionaal-beproefde en wêreldbekende handelsmerke wat dit verskaf en diens, soos o.a. Kverneland, Andreoli, McHale, AgriSpread, Alpler, Celikel, Andreoli, Dondi. Daarby bied Jupidex die markmededingende voordeel dat dit slegs egte onderdele van uitnemende gehalte verskaf en glad geen generiese produkte aanhou nie.
Jupidex hou tred met die heel jongste landboutegnologie, soos blyk uit die gerekenariseerde presisieboerderystelsels wat Jupidex bied en diens vir gewasaanplanting, geoutomatiseerde bemestingtoediening, monitering van gewasgroei en vooraf geprogrammeerde oesinsameling. Om kliënte hiermee en in ander opsigte te ondersteun, het Jupidex 'n kundige velddiensspan in plek met landswye reikwydte.
In 2018 het Jupidex ook na die Noord-Kaap uitgebrei en ʼn volledig-toegeruste tak te Kimberley geopen, met die nodige personeel en logistiek om oor lang afstande diens te lewer en kliënte op hul plase of by hul persele te besoek. Die tak nooi alle bestaande en voornemende kliënte om met hulle oor enige behoefte te skakel.
Verlede jaar het Jupidex ook sy eerste tak buite SA geopen, nl. in Zambië, waar groot aanvraag is vir gevorderde landboutoerusting. Vir Jupidex is dit ook ‘n groot stap in sy strewe om die landboubedryf op die vasteland te ondersteun.
Jupidex is trots op die diep spore wat dit al in die landboubedryf getrap het en op die baanrekord van uitnemendheid wat in die proses opgebou is. Jupidex glo in die toekoms van kommersiële landbou in SA en in Afrika en stap graag saam op die pad van volhoubare en ekonomies-verantwoordbare voedselverbouing.

Jupidex logo

Kimberley as stad bekend vir sy kleurryke diamantverlede, word tans byna verswelg onder onbeheerde riool in talle strate. Die rioolaanleg funksioneer slegs op 50% kapasiteit en die watersuiweringsaanleg funksioneer met rukke en stote – probleme wat ooglopend geleidelik oor jare ontwikkel het.

Tydens ’n onlangse besoek van die DA is bevind dat die rioolaanleg van die ANC-beheerde Sol Plaatje Munisipaliteit haglik is en dat damme wat veronderstel is om gesuiwerde water te bevat, met riool besoedel is. ʼn Gebrek aan kundigheid, omgewingsgevare vir personeel en ʼn tekort aan basiese voorrade soos chemikalieë en veiligheidstoerusting ontbreek, dra by tot die krisis. Reeds vyf werkers het al hul lewens verloor by die aanleg weens blootstelling aan giftige dampe en haglike omstandighede.

Hoe Kimberley as hoofstad van die Noord-Kaap sy eertydse glorie en leefbaarheid kan herwin, is ‘n ope vraag – ʼn vraag wat kiesers op 8 Mei vanjaar by die stembus kan begin om te beantwoord.

Die besluit van MultiChoice om met Ghoemas 2019 die musiekvideo Die Land te boikot omrede Steve Hofmeyr vir hulle persona non grata is vanweë sy pro-Afrikaner-uitlatings, het behoorlik ‘n miernes onder Afrikaners oopgesteek. Eers het verskeie sangers soos, Jay, Dewald Wasserfall, Ruhan Du Toit, Bok van Blerk en Bobby van Jaarsveld hulle ook aan die Ghoema aand onttrek, terwyl Demi-Leigh Moore tydens die geleentheid openlik haar misnoeë met MultiChoice uitgespreek.

Voorts gons dit behoorlik op sosiale media soos Afrikaner gesindes hul teenkanting teen MultiChoice uitspreek en ook teen Toyota omdat hulle as borg onttrek het en besluit het om eerder die multi-kulturele “beheerbare” Stellenbosch Woordfees te ondersteun. Vir ‘n voorbeeld van uitgesproke en reguit kritiek teen die Ghoemas, MultiChoice en Toyota, sien hierdie videogreep

Inmiddels word skerp vrae gevra oor die vloot van Toyota voertuie gehandelsmerk met formele ANC kleure – sien by hierdie skakel foto’s

Bladsy 1 van 95
Go to top