► Gister 16 Junie is Jeugdag amptelik in SA gevier ter herdenking van die Sharpville-opstand in 1960, maar dit is ook die herdenking van 16 Junie 1900 toe Lord Roberts proklamasie onderteken het vir inwerkingstelling van beleid van verskroeide aarde wat tot die lyding en dood van sowat 30 000 Boervroue, -kinders en bejaarde mans gelei het – kyk hierdie video ► Vir presies hoe die Anglo-Boere-oorlog 1899 – 1902 verloop het en hoe die Britse oormag die lyding van vroue en kinders misbruik het om die Boerekrygers tot oorgawe te dwing, volg hierdie skakel ► Ambassadeur vir SA in Denemarke Zindzi Mandela skel SA blanke burgers op Twitter uit vir “cowards” en “land thieves” en sê dr. Chris Barnard “learned the basics of heart surgery from his black gardener” ► AfriForum vra Minister van Internasionale Betrekkinge en Samewerkinge Naledi Pandor om Zindzi Mandela onmiddellik terug te roep en af te dank ► Furore oor Twitter-geskel van Zindzi Mandela omdat sy veronderstel is om alle Suid-Afrikaners te dien en sy betaal word met belastinggeld van alle Suid-Afrikaners ► Volgens konsepwetgewing tans voor Parlement Broad Based Black Economic Empowerment Amendment Bill word begunstiging van blanke vroue uitgehaal omdat hulle in die praktyk van die sg. benadeelde groepe die vinnigste in die SA ekonomie vorder – volg hierdie skakel vir meer besonderhede ► Met spanning in Midde-Ooste rondom Iran skiet goudprys op na $1 350/ons, hoogste in 14 maande ► Vakunie Association of Mineworkers and Construction Union (AMCU) kondig aan dat dit met onderhandelinge vir lone in platinumbedryf later vandeesmaand gaan vra vir basiese salaris van R17 000; AMCU verteenwoordig sowat 60 000 lede ► Berig dat SABC slegs salarisse betaal en nie meer enige diensteheffings aan Stad van Johannesburg en City Power betaal nie, vraag of SAUK volgende maand nog in bedryf sal wees ► Vragmotorbestuurder Bernard Groenewald wat by Touwsrivier so deur aanvallers met brandbomme bestook is, is in hospitaal aan sy wonde oorlede ► Die Voortrekkers o.l.v. dr. Danie Langner onthul op plaas naby Parys nuwe standbeeld van Die Penkop tesame met twee borde met name van 2 466 seuns tussen ses en 16 jaar wat dié oorlog oorleef het ► EPR veiligheidsbeampte, Christo Myburgh, te Krugersdorp oorval op perseel deur drie gewapende aanvallers vermoedelik zamas zamas en drie keer geskiet ► Vind by hierdie skakel passievolle pleidooi vir moedertaalonderrig, ook in Afrikaans, deur Johnell Pelser op sosiale media ►

Terwyl die wêreldpolitiek die afgelope sowat twee dekades gedomineer is deur globalisme, soos gedryf deur die Nuwe Wêreldorde (NWO) met hul strewe om uiteindelik die mensdom onder een wêreldregering te bring, het die ampsaanvaarding van pres. Donald Trump in die VSA tektoniese verskuiwings in die wêreldpolitiek veroorsaak. Trump met sy “Amerika eerste”-benadering het die wêreldtoneel soos ʼn donderslag getref en druis hy, gerugsteun indirek en direk deur nasionalistiese bewegings in ander lande, reëlreg in teen die magtige NWO.

Trump doen alles wat die NWO met hul ekonomiese en sosialistiese imperialisme nie wil hê nie en het sy beleidsrigtings ingrypende veranderende verdelingslyne in die wêreldpolitiek tot gevolg. So bv. het hy ʼn stille samewerkende verhouding met pres. Vladimir Putin van Rusland, self iemand wat nasionalistiesgesind is en nie noodwendig die NWO-pad loop nie.

Voorts het Trump teen Kommunisties-Chinese imperialisme opgestaan en deur verskerpte invoertariewe eerder die plaaslike Amerikaanse ekonomie gestimuleer as om op goedkoop ingevoerde Chinese produkte te steun. Ook het sy administrasie die Chinese tegnologiereus Huawei geïdentifiseer as bloot die tegnologiese arm van die People’s Liberation Army (PLA) van Kommunistiese China en is dienooreenkomstig handel met Huawei ingekort.

Nog ʼn tektoniese verskuiwing is Brexit, met ʼn duidelike oorwig van Britte wat ten gunste is van uittrede uit die Europese Unie (EU), een van die hooffronte van die NWO. Hoewel die skeiding met veel drama gepaardgaan, lyk dit na ʼn uitgemaakte saak dat Brittanje op 31 Oktober vanjaar die EU gaan verlaat, met of sonder ʼn ooreenkoms.

Die voorste aanspraakmakers op die Britse premierskap in die plek van Theresa May, soos Boris Johnson, is feitlik almal sterk pro-Brexit. In elk geval, in die pasafgelope verkiesings vir die EU parlement het aan Britse kant Nigel Farage met sy regse Ukip Party bo uitgekom en wil dit voorkom asof die eeue-oue tradisionele tweepartystelsel in Brittanje van Tories en Arbeiders iets van die verlede kan wees.

In die verkiesings vir die Europese parlement van 23 – 26 Mei 2019 waaraan 28 lidlande deelgeneem het, het nasionalistiese partye, veral in Frankryk, Italië, België en Hongarye, sterk opgang gemaak. In Frankryk bv. het Marine le Pen en haar Rassemblement National meer stemme getrek as pres. Immanuel Macron en sy party.

In Italië het Matteo Salvini en die Lega Party die meeste stemme getrek, terwyl in België Tom van Grieken van Vlaams Belang as die tweede grootste party in Vlaandere na vore getree het. In Hongarye het eerste minister Victor Orban se Fidesz Party weer bo uitgekom, terwyl in lande soos Pole, Duitsland, Griekeland en Spanje nasionalistiese partye ook sterk staan.

Verder word bande tussen die VSA en Japan as tradisioneel die grootste vyand van China – ook al sterker uitgebou en was Trump die eerste buitelandse staatshoof om die nuwe Japanese keiser Naruhito te besoek. Hoewel verhoudinge tussen die VSA en Noord-Korea die jongste tyd afgekoel het, staan betrekkinge tussen die VSA en Suid-Korea en Taiwan sterk as teenvoeter in die Verre Ooste.

Wat China betref as die talrykste bevolking ter wêreld, broei onrus sterk onder die oppervlak, juis ook vanuit nasionalistiese hoeke. In Hong Kong met sy unieke geskiedenis vind voortdurende betogings plaas ten gunste van vryhede onder die totalitêre regime van Beijing, is pas op 5 Junie die 30-jarige herdenking van slagting van duisende betogers op Tiananmen Plein met geweld onderdruk en word in die Chinese provinsie Xinjiang meer as 1 miljoen nasionalistiese Uyghurs in strafkampe aangehou vir “heropvoeding”.

In Latyns-Amerika het die grootste land, Brasilië, in Jair Bolsonaro ‘n regsgeoriënteerde president aan die stuur, terwyl in Mexiko pres. Andrés Obrador gereken word as iemand wat in dieselfde rigting as Trump stap en het verhoudinge tussen hierdie twee lande ook onlangs aansienlik verbeter.

ʼn Kenmerk van die wêreldpolitiek is dat die internasionale media soos CNN, BBC en Al Jazeera, asook groot koerantgroepe, mondstukke is van die NWO, maar ondanks hul propaganda wen nasionalisme tans sterk veld. In wese gaan dit oor ʼn stryd tussen die geskape volkereverskeidenheid van die mensdom aan die een kant en aan die ander kant die verskuilde, gekoördineerde plan van die Bose om die mensdom te homogeniseer en onder een juk te bring. Hierdie stryd speel sigself ook vandag in Suid-Afrika af en of die regsinnige Afrikaner die essensie van hierdie stryd snap en dienooreenkomstig sy eie heil sal kan uitwerk, is ʼn ope vraag.

Hiermee is enkele breë riglyne getrek t.o.v. die wêreldpolitiek, hoewel die toneel veel meer gedetailleerd en genuanseerd is. Daarby is daar altyd wiele binne wiele, terwyl die wêreldpolitiek deurspek is met verskuilde agendas. Breedweg kan egter gesê word dat die uiteensetting hierbo die werklikheid reflekteer.

Die stryd is genadeloos en word 'n spelbreker soos Trump met ʼn passie gehaat en word alles in die stryd gewerp om hom omver te gooi. Hyself is natuurlik alles behalwe volmaak, maar dat hy die waardes en doelstellings verteenwoordig van wat basies uit die Skrif afleibaar is, is gewis en dat hy hierin ook onverbiddelike steun geniet, is eweneens seker.

Johann Dannhauser

Christelike Afrikaanse onderwys is onder beleg a.g.v. verskeie daadwerklike bedreigings, waarvan veral twee van aardskuddende belang is, nl., eerstens, die beoogde invoer van Comprehensive Sexual Education (CSE) in SA staatskole vanaf volgende jaar en, tweedens, implementering van die aanlynregistrasiestelsel in Gauteng vir alle nuwe skolierapplikante.

Die aanlynregistrasiestelsel bring mee dat o.a. nuwe Afrikaanssprekende skolierapplikante nie meer kan gaan na die Afrikaanse skool van hul voorkeur nie, maar moet inskryf by die skool vir hulle aangewys. Terselfdertyd kan Afrikaanse skole verplig word om watter taalsprekende skolier ookal na hulle verwys word, in te neem, of hulle nou plek het of nie.

Hierdie beleid is die produk van die veldtog wat uitgesproke anti-Afrikaanse aktivis en LUR vir Onderwys in Gauteng Panyaza Lesufi al vir jare teen Afrikaanse skole voer. Dit kan enorme implikasies hê vir Afrikaanse skole landswyd, sou die stelsel so uitgebrei word. Daar is 23 719 staatskole in SA, waarvan 1 279 enkelmedium Afrikaans is oftewel 5%, maar steeds moet in Gauteng van hulle gedwing word om andertalige aansoeke te akkommodeer

Aan die ander kant kan diaboliese CSE, soos dit uiteengesit is in die voorbladartikel van hierdie uitgawe, eenvoudig verwoestend wees op die psige van jong kinders. Woorde kan kwalik die vernietigende gevolge beskryf van voortydige blootstelling van onontwikkelde kinders aan seksuele wanpraktyke deur persone met bose agendas.

Albei hierdie verwikkelinge het dus implikasies van waarskynlik die doodsklok vir Christelike Afrikaanse onderwys en derhalwe poog Ditsem Nuus om maksimale teenaksie te mobiliseer in sowel die gedrukte uitgawe van die koerant as op sy digitale platforms. In hierdie uitgawe val die klem op die stop van CSE, met in hierdie rubriek drie onderwysinstansies wat hiertoe met spesifieke insette hul steun toesê.

Die afgelope maand sedert die verkiesing op 8 Mei het aanvalle op plaasmense gepaard met koelbloedige moorde oorhand toegeneem en volgens syfers van TLU SA en AfriForum was daar in SA vanaf 1 Januarie tot en met 31 Mei 2019 184 plaasaanvalle en 20 plaasmoorde. Vir die tydperk sedert 1990 het dit die totaal op 2 453 moorde te staan gebring - 436 plaasmoorde in Gauteng, 381 in KZN, 352 in Mpumalanga, 334 in Noordwes, 311 in die Vrystaat, 233 in Limpopo 209, in die Oos-Kaap, 124 in die Wes-Kaap en 73 in die Noord-Kaap.

Al vir jare word gevra: Waar gaan dit eindig? Wat daaromtrent te doen? Steeds word gesê: So kan dit nie aangaan nie!

Die grusaamheid waarmee die aanvalle en moorde gepleeg word, verstom telkens en lankal word aanvaar dat dit in werklikheid terreur is, rassisme van die eerste graad en dat daar gekoördineerde beplanning agter sit wat nasionaal en internasionaal tot in die hoogste kringe strek. Pas het op ‘n mediakonferensie van AfriForum ‘n blanke vroulike slagoffer getuig: “Ons is gemartel vir vier ure. Ons is daardie nag gejag soos wilde diere. Ons is vasgebind, geskiet en verkrag.”

Dit is teen hierdie agtergrond dat die volgende uittreksel uit ‘n mediaverklaring van Front Nasionaal n.a.v. die sluipmoord op wynboer Stefan Smit van Stellenbosch die waarheid raakvat:

“Pas nadat Cyril Ramaphosa president geword het, in Februarie 2017, lewer hy sy eerste Staatsrede waarin hy onteiening van eiendom sonder vergoeding as regeringsbeleid bekend maak. Minder as ‘n maand daarna, in Maart 2017, begin die EFF met grondbesettings in Gauteng en verklaar sekere gebiede in die land as ‘prioriteitsgebiede’. Stellenbosch Distrik word vermeld. In Oktober van daardie jaar word Joubert Conradie vermoor op sy plaas by Kanonkop, sowat 14 km vanaf Stellenbosch. Dit lei tot die landwye Swart Maandag protesaksie.

“Tussen Maart en Augustus 2018 begin inwoners van Kayamandi digby Stellenbosch om onwettig hulle plakkershutte op te slaan in die wingerde van Louisenhof, die plaas van Stefan Smit. Hy moet hom herhaaldelik na die hof wend om die hutte te laat verwyder.

“In Junie 2018, dieselfde periode waarin die onwettige besetting van Stefan Smit se grond plaasvind, word Jeff Zettler, die aarbeiboer, aan die ander kant van Stellenbosch, minder as 20 km van Louisenhof af, vermoor. Op 25 Augustus 2018, te midde van Stefan Smit se stryd om die plakkers van sy grond af te hou, berig IOL en ander nuusagentskappe dat baie grond in Stellenbosch skielik in die mark is en dat grondpryse skerp gedaal het.

“Op 9 April 2019 nooi die boere van Stellenbosch vir pres. Cyril Ramaphosa om hulle toe te spreek op die landgoed, Beyerskloof. Dié gesprek word afgesluit deur ʼn emosionele verklaring waarin Ramaphosa bestempel word as die ‘gesalfde leier’ en ʼn man wat ten volle vertrou en gerespekteer moet word. Die vergadering is stapfastand van die woonhuis op Louisenhof.

“En by daardie woonhuis word Stefan Smit op ʼn soel Bolandse Sondagaand koelbloedig om die lewe gebring.

“Die skuld van sy dood kan voor die deur van veel meer as drie gemaskerde mans gelê word.

Die president en regering van Suid-Afrika moet ook in die bank staan. Dis hulle wat die duiwel losgelaat het met hulle beleid van onteiening sonder vergoeding, wat elke rondloper en geweldenaar laat dink dat daar maar gevat kan word na hartelus.

“Die radikale politici in Suid-Afrika wat links en regs uitlatings maak oor watter grond geprioritiseer moet word vir onteiening en met haargevulde uitsprake hulle volgelinge aanhits teen blankes, staan ook met Stefan Smit se bloed aan hulle hande. Hulle wie se uitsprake volgens die MRK nie haatspraak is nie.

“Die Afrikanerpolitici wat nog steeds die volk mislei met valse ondernemings en beloftes oor hoe die Nuwe Suid-Afrika verbeter kan word om minderhede te beskerm. Ons is slim genoeg om te weet dat dit in der ewigheid nie kan gebeur nie, maar hulle is slim genoeg om te weet dat jy die breë massa so maklik mislei met die gesigte en stemme van celebrities en soetklinkende ondernemings.

“Die mede-boere van Stefan Smit, wat ʼn Kommunis en oud-terroris om die nek geval het, wel wetende wat sy beleid is en hom tot ‘gesalfde’ verklaar het. Wat het hulle van hierdie kruiperige vertroue gekry anders as om hulself af te vra: Wie van ons is die volgende? Ook hulle moet in die bank verskyn.

“Ook ek moet myself afvra: As ek kyk na my keuses en my gebrek aan betrokkenheid… staan ek nie ook in die beskuldigdebank nie?”

In aansluiting by hierdie mediaverklaring dien die volgende grafiese vertelling op sosiale media hier herhaal te word, in omtrent die formaat van ʼn eietydse profesie:

“Van ons wou vlieëniers word. Party polisiemanne, brandweermanne, dokters, maanreisigers... Ag, noem maar op. Ons het met sterre in ons oë gedagdroom. Alhoewel ons verskillende drome gehad het, was daar ʼn gemeenskaplike faktor: Óm belangrik en beroemd te wees en eendag ’n verskil te maak.

“Toe ons hoërskool toe is, het baie hul drome tydelik opsygeskuif vir die groot roeping in ons lewe: Die Army. Ek onthou hoe ons met jeugweerbaarheidsperiodes toegespreek is deur manne in uniform met stukke gechroomde voëlmis en selfs ʼn piksteel of twee op hul skouers. Ek onthou die video’s wat ons gewys is van die rooi gevaar en van nonne wat eers verkrag en toe keelafgesny is.

“Almal wou dadelik recces of 32 Bataljon of bats join. Ons is vertel as die kommuniste, terroriste en geel mannetjies oorvat, gaan hulle dieselfde met ons ma's, meisies en sussies doen. Geen Boerseun sou so iets ooit toelaat nie. Baie van ons het aktiewe diens gaan doen en ek het seker van my beste buddies gemaak in die Weermag en later in die Polisie.

“Ek onthou nog as ons vir ʼn pas huistoe was en ʼn ou oom en tannie laai jou by die belenryna af, het die oom gewoonlik gevra net voor hy wegry: Boetie, skiet tog vir my ʼn tir wanneer jy weer kontak slaan.

“Ons het ons deel gedoen, maar ek het dag vir dag gesien hoe verdof die liggies van drome en ideale uit blanke jong soldate se oë - oë wat nie meer aan ʼn 18- of 19-jarige behoort het nie, maar aan ’n ou afgeleefde man. ʼn Jagter, ʼn realis...

“Ek het ook die glasige oë gesien van menige jongman wat die hoogste prys betaal het. Ek het die oë gesien van jongmanne wat vuur getrek het. Ek het die oë van ʼn bang kind daar gesien. Ek het die oë van ʼn malman daar gesien.

“Ek het die oë van helde gesien, maar ook die oë van manne wat eenvoudig nie verder kon nie. Dan het ek die oë gesien van manne wat ʼn uur of wat later ʼn einde aan hul lewens gemaak het. Hulle oë is die vensters na ʼn mens se siel. Dis waar. Tot op ʼn punt waar daar nie meer ʼn siel was om te sien nie.... daai duisend voet staar....

“Drank was daar volop en ekself het my skeefgesuip om te probeer cope. Ek was op baie begrafnisse in die laat 80s, vroeë 90s. Te veel! Vader hoor my. Ek het gesien hoe ma's, meisies, vrouens en pa's inmekaar sak by ʼn oop graf. Ek het gesien hoe klein kindertjies na hul pappas roep en agter die kiste in die graf wil afspring.

“Dit breek ʼn man en doof die laaste lig in jou oë. Ek onthou die absolute verslaentheid en woede toe ons land verkoop is in 94 aan die kommuniste, terroriste, barbare en die geel skreefoë.

“Vandag 20 jaar later bly ons in die Nuwe Suid-Afrika. Dit wat daai offisiere met die pikstele en gechroomde voëlmis op die skouers destyds voorspel het, het waar geword. Ons vrouens, meisies, sussies word verkrag en gemartel. Jong babas word in die kop geskiet.

“Die demone van gister lê nog in baie van ons mans se oë. By van die mans het daar nooit weer ʼn liggie begin flonker nie. Ek sien weer oral oor die land begrafnisse. Hierdie keer staan baie van ons mans langs oop grafte en kyk hoe sak vermoorde geliefdes se kiste weg in ʼn gat.

“Die witman was nog nooit die terroris en die aanstoker nie. Maar ek sien weer in baie van die pa's, broers, mans en seuns se oë daai selfde uitdrukking wat jy gesien het kort voor ʼn kontak. Haat, afsku, woede. En ek weet uit ondervinding: Pasop barbare! Julle maak ʼn monster wakker wat julle nooit kan stop nie.... Die vensters na die siel lieg nooit nie....

“Daar is niks so gevaarlik soos ʼn gewonde buffelbul, of ʼn man wat niks het om te verloor nie…..”

Suid-Afrikaanse skole onder beheer van die staat is geskeduleer om vanaf 2020 ‘n sg. seksopvoedingsprogram genaamd Comprehensive Sexual Education (CSE) van die Verenigde Nasies (VN) te implementeer in die vak Lewensoriëntering vir Grade 4 tot 12. CSE is daarop gemik om kinders van Graad 4 en selfs nog van so jonk as 4 jaar op diaboliese wyse seksbewus en seksgereed te maak – eintlik is CSE van so aard dat dit te aaklig is om in beskaafde geselskap in woorde te stel, maar Ditsem Nuus beskou dit as só bedreiging vir kinders dat dit in hierdie artikel as waarskuwing ronduit gestel word.

CSE spruit oorspronklik uit navorsing oor seks wat die Amerikaansebioloog en entomoloog dr. Alfred Kinsey in 1947 aan die Indiana Universiteit in die VSA gedoen het en waarin hy o.m. kinders en pedofiele saam as proefkonyne gebruik het. Die resultate van sy navorsing is later gebruik deur VN-instansies soos UNAIDS, UNESCO en UNICEF om die program getiteld CSE te ontwikkel vir sg. seksuele opvoeding met die oog op “jeugweerbaarheid”.

Word egter gelet op die inhoud van CSE, dan is dit duidelik dat dit in wese duiwels is en reëlreg indruis teen Bybelse beginsels. So bv. bevorder dit masturbasie vir klein kinders; moedig hulle aan om mekaar seksueel te betas; sê homoseksualisme is natuurlik; keur transgeslag goed in die sin dat ‘n kind een dag soos ‘n seun mag aantrek en die volgende dag soos ‘n dogter; propageer dit seksuele “regte” vir kinders sonder ouerlike toestemming; moedig dit seksuele eksperimentering aan; illustreer dit die toepassing van kondome; sê selfs seks met diere is aanvaarbaar; keur aborsies goed; en nog bose banaliteite.

Verskillende VN-organisasies bevorder die CSE-program by lande en gemeenskappe in die wêreld en moedig insluiting daarvan sterk aan by nasionale leerplanne. Dit alles word gedoen onder die dekmantel dat kinders proaktief “ingelig en opgevoed” moet word om hulself sg. te kan handhaaf en gevare soos HIV-Vigs te vermy.

In die proses word gepoog om selfs direk en indirek regerings- en owerheidsinstansies te dwing om CSE te implementeer, bv. Nigerië met sy bevolking van 201 miljoen is gedreig dat as CSE nie in die amptelike kurrikula aanvaar word nie, buitelandse beleggings in die land die land ingekort sal word. Desnieteenstaande het talle lande deur die ware aard van CSE gesien en daarteen in opstand gekom, selfs Naura as die VN-lidland met die kleinste bevolking (11 200) het botweg geweier dat CSE by hulle toegelaat word .

Sover bekend, is Suid-Afrika egter die enigste land in Afrika wat CSE amptelik in sy skoolleerplanne insluit . Op 12 Mei 2019 het die Sunday Times berig dat die Dept. van Basiese Onderwys onder Minister Angie Motshekga die nodige reëlings getref het vir die implimentering van CSE in die leerplan vir Lewensoriëntering vanaf begin 2020.

Vir doeleindes hiervan het die Dept. van Basiese Onderwys die dienste gekontrakteer van sowat 100 kundiges en skrywers om die leerplanne vir Lewensoriëntering oor te doen. Een van hierdie kontrakteurs is die bekende of dan berugte seksterapeut dr. Marlene Wasserman, ook bekend as Dr. Eve, wat soos volg aangehaal word: “Masturbation is normalised and it is threaded through the curriculum from grade 4. It begins with self pride, self-image, body diversity, genital differences, genital changes and touching oneself for pleasure.”

Ten einde te help om ouers, onderwysers, personeel en ander belanghebbendes te waarsku teen die loslating van die diaboliese plaag van CSE op onskuldige klein kindertjies nog in hul vormingsjare en teen besoedeling van groter kinders, het Ditsem Nuus, benewens hierdie artikel, ook ‘n aantal nasionale instansies gemoeid met onderwys in SA genader om promosie-insette te maak in hierdie uitgawe. Slegs die drie op bl. 2 het hulle enigsins verwerdig om teen die nominale koste van R890 ‘n inset ter ondersteuning te maak.

Aan die positiewe kant is daar in die res van die wêreld mense, regerings en lande wat opstaan teen CSE, dit verdoem vir wat dit is en wat dit blokkeer sover moontlik. In hierdie verband is daar o.m. die uitstekende film getiteld The War on Children, beskikbaar by www.comprehensivesexualityeducation.org, in 35 min sowel as 10 min weergawes.

Dit word ten sterkste aangeraai dat elkeen wat CSE verban wil sien, na hierdie film kyk en dit ook so wyd as moontlik versprei.

Die Bybel konstateer: “En van jou kinders mag jy nie gee om vir Molog deur die vuur te laat deurgaan nie, dat jy die Naam van jou God nie ontheilig nie. Ek is die Here.” (Lev. 18:21). Mag daar gebid en gewerk word dat die verskriklike plaag van CSE die kinders van SA, insluitende spesifiek ook Afrikaner-kinders, gespaar bly en mag elkeen met ‘n verantwoordelikheid in hierdie opsig daardie verantwoordelikheid opneem en doeltreffend nakom.

Tydens 'n mediakonferensie het AfriForum onthul dat 'n totaal van 56 blanke skoolmeisies al weens ras uit verteenwoordigende skolenetbalspanne gelaat is, ondanks die feit dat hulle op meriete wel gekwalifiseer het. Volgens AfriForum het hulle die puntestate van keurders vir Gauteng se o.12- tot o.18 skolenetbalspanne bekom, wat wys dat 56 blanke meisies weens hul velkeur uit die spanne gelaat is.

In reaksie sê SA Skolenetbal dit is jammer dat kinders nou deur volwassenes gebruik word om politieke agendas te bevorder, maar Netbal SA (NSA) reken dit is wreed indien spelers uitsluitlik op grond van ras uitgelaat is.

Intussen het AfriForum namens die ouers van benadeelde meisies ’n amptelike klag by SA Skolenetbal, Gauteng Skolenetbal en NSA ingedien. Indien die liggame nie reageer, gaan hulle die saak na die Internasionale Netbalfederasie neem in ’n poging om van rassekwotas ontslae te raak. Volgens die reëls van die Internasionale Netbalfederasie asook dié van die Internasionale Olimpiese Komitee en die Statebondspele Federasie word enige vorm van rassediskriminasie in sport uitdruklik verbied.

AfriForum hoop om ’n sterk hofuitspraak te bekom om rassekwotas in ander sportsoorte ook te beveg, aangesien internasionale sportorganisasies vir ander sportsoorte nie ’n roete in plek het wat gevolg kan word oor ras nie, maar netbal het dit wel.

Die balju het beslag gelê op die Mafube Munisipaliteit se roerende en onroerende bates ná jare se wanbestuur, growwe nalatigheid, korrupsie en swak prestasie. Inwoners van die gebied onder die disfunksionele munisipaliteit moet nou self inklim en dienste lewer nadat munisipale werkers al amper ’n jaar lank staak.

Die Mafube Munisipaliteit ( Frankfort, Villiers, Tweeling en Cornelia) is bankrot met laste wat bates ver oorskry en skuld van R400 miljoen, waarvan R47 miljoen verskuldig aan Eskom, R83 miljoen aan Rural Maintenance en R35 miljoen aan pensioenfondse. Te midde van die finansiële krisis is steeds ruim voorsiening gemaak vir verhoging in salarisrekening tot R110 miljoen - 62% van die bedryfsbegroting terwyl nasionale Tesourie se riglyn 32% is.

Volgens die plaaslike VF Plus-raadslid loop rou riool in die strate af weens verstoppings en is strate en paaie vervalle a.g.v. geen instandhouding, terwyl oop ruimtes en straathoeke as stortingsterreine gebruik word. Op hul beurt voer die DA in die Vrystaatse Wetgewer aan dat die situasie met Mafube Munisipaliteit deel is van die nalatenskap van voormalige Vrystaatse premier en huidige ANC sekretaris-generaal Ace Magashule met sy omvattende kaderontplooiing en korrupsienetwerk.

Volgens die jongste syfers van die SA ekonomie pas deur Stats SA bekendgemaak, word 'n negatiewe prentjie geskets ondanks die politieke euforie rondom pres. Cyril Ramaphosa en die stappe wat hy neem om korrupsie hok te slaan. Hierdie syfers toon dat in die eerste kwartaal vanjaar was die ekonomiese groeikoers laer as verwag, terwyl die BBP met ‘n skokkende 3,2 % gekrimp het. Dié daling is die grootste val sedert 2009 toe die ekonomie tydens 'n wêreldwye ekonomiese insinking met 6,1% gekrimp het.

Die vervaardigingsektor het met bykans 9% teruggegly, maar alle sektore het afwaartse geneig, met die landboubedryf die swakste met 'n negatiewe groeikoers van -13,2%. Ná die SSA bekendmaking het die Rand met 1,4% gedaal, terwyl banke met ‘n gemiddeld van 3,2% op die JEB gesak het. Ekonome meen dat hierdie groeisyfers die Reserwebank kan dwing om rentekoerse te verlaag later vandeesmaand.

Met ’n beduidende 3,2%-inkrimping van BBP-groei op kwartaalgrondslag en 0% groei op jaargrondslag, is verskeie partye nie net ontevrede nie met die nuutste verwikkeling nie, maar ook bekommerd oor die moontlikheid van ’n resessie. Volgens die Instituut vir Rasse-aangeleenthede (IRR) word die gebrek aan ekonomiese groei toegeskryf aan vyf redes: Die ANC-regering se ekonomiese beleid, dreigemente van onteiening sonder vergoeding, swart ekonomiese bemagtiging, vyandige arbeidsregulasies en swak skoolonderrig. Daar is redelik konsensus dat indien die regering die ekonomie wil regruk, alvyf hierdie gebiede drastiese beleidsomkeer sal moet ondergaan.

Een uit vyf persone in SA maak staat op welsynstoelaes en Statistiek SA (SSA) se jongste huishoudelike peiling toon dat meer as 17 miljoen inwoners en 44% gesinne een of ander vorm van ‘n maatskaplike toelae ontvang. Provinsies waar die meeste toelaes uitgedeel word, is Oos-Kaap en Limpopo, terwyl Gauteng en Wes-Kaap minder afhanklikes toon.

Volgens kenners is daar ’n duidelike ooreenkoms tussen die werkloosheidsyfer en SASSA begunstigdes in elke provinsies. SSA noem dat die Oos-Kaap die grootse werkloosheidsyfer in die land het (37,4%) en toon dat 60% van huishoudings afhanklik is van toelaes; dit terwyl die persentasie ontvangers in Noord-Kaap (58,3%) en Limpopo (57,9%) kort op sy hakke is. Die twee provinsies met die laagste werkloosheidsyfer en die minste begunstigdes is; Gauteng (19,2%) en die Wes-Kaap (22,1%).

Die Suid-Afrikaanse Instituut vir Rasseverhoudinge (IRR) sê daar is tans meer mense wat toelaes ontvang in die land as wat daar mense is wat werk en met die huidige resessie wat die ekonomie lam lê, sal die vraag na toelaes waarskynlik toeneem. Volgens hulle gaan dit in die toekoms moeiliker word vir die regering om die kostes van sy welsynsprogramme te dra en sal hy sy begroting drasties op ander gebiede moet sny om te voldoen aan die eise van meer en verhoogde toelaes .

Volgens die jaarlikse ouditverslag van AfriForum van stortingsterreine in SA voldoen slegs 22% van terreine in die nege provinsies aan die vereiste minimum standaarde. Die lae persentasie word toegeskryf aan onbekwame munisipale bestuur waar wanbesteding, swak instandhouding en gebrek aan wilskrag om daaglikse probleme uit die weg te ruim, aan die orde van die dag is.

Volgens AfriForum dui die bevinding van hul jaarlikse ouditverslag waar 33 vrae verwerk is om die oudit te voltooi, dat slegs 28 uit 127 stortingsterreine voldoen aan die vereistes van die Wet op Nasionale Omgewingsbestuur, 59 van 2008. Die aantal vullisterreine wat wel aan die minimum vereistes voldoen en bo 80% vir die oudit gekry het, het vanaf 2018 verswak.

Só het die vullisterreine per provinsie gevaar ten opsigte van die minimum vereistes: Wes-Kaap uit 9, slegs 4; Oos-Kaap uit 6, slegs 2; Mpumalanga uit 25, slegs 2; Gauteng uit 21, slegs 11; Limpopo uit 12, slegs 4; KZN uit 7, slegs 2; Noordwes uit 15, slegs 1; Noord-Kaap uit 12, slegs 2 - Kimberley en Orania; Vrystaat uit 20, 0.

AfriForum versoek dat munisipaliteite dringend met oplossings moet kom om afvalbestuur op peil te kry, maar meen ook dat dit almal se verantwoordelikheid is om by te dra tot ’n skoner Suid-Afrika en toe te sien dat die omgewing in stand gehou word. Andersins sit SA op ‘n tikkende tydbom.

Die ANC-beheerde Mangaung Metro staar rommelstatus in gesig ná die graderingsagentskap Moody’s aangedui het verdere afgradering word oorweeg indien die metro nie dringend sy huishouding in orde kry nie. Die metro is in effek reeds bankrot met laste wat bates met bykans R1 miljard oorskry en met meer as R6 miljard uitstaande diensteskuld. Moody’s het op hul webwerf inderwaarheid aangedui dat die metro op 2 Mei 2019 afgegradeer is tot Ba3 status.

In hul reaksie sê die metro dat ’n afgradering nie dienslewering sal raak en dat ’n finansiële herstelplan in plek is. Hulle voer aan dat die swak ekonomie, toenemende werkloosheid en verhoogde tariewe vir water en elektrisiteit die metro se finansies erg negatief raak.

Inmiddels blyk dit dat die salarisrekening van die metro sowat R160 miljoen per maand beloop, met 'n selfoontoelae van R3’200 vir elk van sowat 70 raadslede. Wat die skuldlas betref, skuld sake-ondernemings die metro R1,6 miljard, inwoners R3,2 miljard en staatsdepartemente R1,2 miljard.

Die metro skuld Bloemwater na berig word meer as R200 miljoen. Wat ook erg verswarend is, is dat na berig word die rekenaarnetwerk van die metro tot groot mate in duie gestort het en dat daar glo nie meer behoorlike kliënterekords is nie.

 

Eskom is op soek na ‘n nuwe uitvoerende hoof nadat die huidige posbekleër Phakamani Hadebe ná minder as ’n jaar die tuig neerlê vanweë stres. Sy voorgangers het óf weens persoonlike redes hul pos verlaat, was ontslaan of is onder ‘n wolk van korrupsie weg.

Energiekundige Ted Blom meen dat die bedanking van Hadebe nie as 'n verrassing gekom het nie, omdat hy as ‘n buitestander ingekom het en hoewel met goeie bestuurservaring, hy min kennis van die kragvoorsieningsbedryf gehad het. Daarom is hy nie geredelik deur die Eskom-establishment aanvaar nie.

Hadebe is in 2018 aangestel om die sukkelende staatsentiteit weer op sy voete te kry ná die sukses wat hy behaal het om die Landbank te herstel. Eskom is egter 'n bitter moeilike perd om te ry, omdat die kragvoorsiener tans nie genoeg krag verkoop om sy rentebetalings en enorme lopende bedryfskoste te dek nie. Dit spruit uit 'n nalatenskap van jare se wanbestuur en koste-oorskryding op nuwe aanlegte, wat 'n huidige skuldlas van minstens R440 miljard tot gevolg gehad het.

Enige iemand om in die Eskom-saal te klim? Ter wille van die hele Suid-Afrika móét Eskom net slaag!

Die ooglopende uitweg is eerder om die kragverskaffingsbedryf in SA te dereguleer en te ontbondel en die hernubare energiesektor kans te gee om spontaan te ontpop. Daarmee saam behoort die mense van die land in hul leefstyl radikaal “groen” te gaan.

Die een enkele groot uitdaging in hierdie verband is bekostigbare sonkrag. Hoe antwoord Suid-Afrikaners hierop?

Nuwe Parlementslede verdien jaarliks ’n salaris van R2,4 miljoen plus ruim byvoordele soos 'n gratis staatswoning, 2 amptelike voertuie, ‘n huiswerker en vliegtuigkaartjies vir hulle en hul wederhelftes. Dit kon selfs meer gewees het indien pres. Cyril Ramaphosa nie verlede jaar die aanbeveling van 4%-verhoging vir openbare ampsbekleërs afgeskiet het nie.

Ramaphosa se eie salaris beloop R3,6 miljoen en dié van adj.pres. David Mabuza R2 825 470, dieselfde as speaker Thandi Modise. Die adjunk-speaker verdien R1 977 795 per jaar, terwyl senior Parlementslede R1 600 467 per jaar huis toe neem, met junior LP’s 'n raps minder. Dit beteken dat meer as R50 miljoen per maand aan die salarisse van 400 Parlementslede bestee word.

Volgens Africa Check kan ministers sowel as hul adjunkte elk twee amptelike voertuie aanskaf vir gebruik in Kaapstad en Pretoria, kabinetslede gratis in ’n staatswoning in die stad van hul keuse woon, geregtig wees op opknappingswerk aan die staatswoning, asook ’n huiswerker op staatsalaris in diens mag neem. Verder mag hulle en hul wederhelftes eersteklasvliegkaartjies vir amptelike internasionale reise koop, terwyl hulle binne SA geregtig is op 30 enkel besigheidsklaskaartjies per jaar. Hul afhanklikes word ook op staatskoste vervoer en hulle kry verhuisingskoste, selfone, tablette en draagbare rekenaars, asook verblyf in Akasia die Parlementêre dorp in Kaapstad.

Die Vrystaatse dorpie Steynsrus het die tyd erg onder ontwrigtende betogings deurgeloop uit protes teen die patetiese en meesal geen dienslewering van die Moqhaka Munisipaliteit. Hulle eis o.m. dat die hele munisipale topbestuur hul poste moet ontruim.

Wanorde was aan die orde van die dag, met skole gesluit en paaie geblokkeer. Oproeriges het chaos in die dorp gesaai en munisipale watertenks en selfs vragmotors aan die brand te steek. Talle motoriste het ook deurgeloop toe hul voertuie met klippe bestook is. Die SAPD het met groot moeite die betogers tot ‘n mate in bedwang gehou.

Steynsrus se buurdorp, Kroonstad, wat ook onder dieselfde munisipaliteit ressorteer, word sedert Maart voortdurend geteister deur onwettige betogings en die onrus het nou na Steynsrus uitgebrei. Hoe lank voordat dit Viljoenskroon, die derde dorp onder Moqhaka Munisipaliteit, gaan tref, is ‘n ope vraag.

Die sake-organisasie Sakeliga wys in ‘n mediaverklaring daarop die nuwe Wysigingswetsontwerp op Toerisme, die sg. AirBnB-wet, lyk dalk op die oog af nie omvattend nie, maar het verreikende gevolge vir korttermynverhuur-entrepreneurs. Die wetsontwerp gee die minister o.m. die mag om voor te skryf hoeveel gaste deur AirBnB-eienaars gehuisves mag word in ’n spesifieke area, hoeveel nagte gaste onthaal mag word en selfs watter tariewe gehef mag word.

Kommentaar op die wetsontwerp moet voor 12 Junie 2019 by die minister ingehandig word. Sakeliga beplan om twee konferensies vir rolspelers wat geraak word, te hou te Pretoria en Kaapstad en dan ʼn gesamentlike kommentaar by die minister in te dien.

Vir meer besonderhede kontak Gerhard van Onselen by 079 522 5764 of besoek www.sakeliga.co.za.

Die burgerregte-organisasie AfriForum besoek die VSA om steun te werf teen grondgrype en plaasmoorde in Suid-Afrika. Ernst Roets, adjunk-hoof van AfriForum en Mariandra Heunis, ma van drie kinders en wie se man Johann voor sy gesin doodgeskiet is, vorm deel van die afvaardiging, wat verteenwoordigers van die Amerikaanse Senaat en Huis van Verteenwoordigers in Washington ontmoet.

Heunis deel nie net haar verhaal nie, maar bied ook ‘n perspektief en insig van hoe slagoffers deur plaasaanvalle getraumatiseer word. Haar verhaal is des te meer relevant in die lig van die ontkenning van pres. Ramaphosa vroeër in die VSA dat plaasmoorde in SA bestaan. Sy ontkenning kom neer op ’n skending van die waardigheid van duisende slagoffers wat self op plase aangeval is of wat geliefdes op hierdie manier aan die dood moes afstaan.

Volgens Roets, word daar nie van die VSA verwag om SA se probleme op te los , maar om in die openbaar standpunt in te neem teen ongeregtighede wat tans in SA plaasvind, ten einde sodoende druk op die SA regering uit te oefen om op te tree ter oplossing van die krisis. Die skakeltoer word in die komende week in New York voortgesit, met fokus op veral die media in die VSA.

Karoo Diesel as ‘n dieseldepot vir grootmaatverbruikers is pas geopen langs die R369, ongeveer 20 km vanaf Orania oppad na Vanderkloof, Petrusville en Luckhoff. Grootmaat aankope kan by die depot gedoen word, terwyl grootmaat aflewerings ook vir kliënte by hul persele gedoen word.

By die depot kan langafstandtrokke oornag met 24/7 sekuriteit – gratis vir trokke wat hervul. ʼn Kiosk met wegneemkos en ablusiegeriewe is ook by die depot beskikbaar.

Vir meer inligting skakel Nico van Aswegen by 079 482 9107.

  • Johan Terblanché, Christ Alone Ministries

In Markus sien ons 'n blinde man wat na uitroep na Jesus.  Jesus vra hom: “Wat wil jy hê moet Ek vir jou doen?” Die blinde man antwoord: “Dat ek mag sien.” En Jesus sê vir hom: “Gaan, jou geloof het jou gered.” En dadelik het hy gesien en Jesus op die pad gevolg. (Markus 10: 46-52)

Johannes 5: 5-9 vertel van 'n man wat 38 jaar lank by die bad van Bethesda gewag het om gesond te word. Jesus het hom gevra: "Wil jy gesond word?” Jesus sê toe vir hom: “Staan op, neem jou bed op en loop.”  En dadelik het die man gesond geword en sy bed opgeneem en geloop.

Ek sien steeds talle mense wat in blindheid voortploeter. Hulle val en struikel oor hul eie voete omdat hulle fisies of geestelik siek is, terwyl ander steeds lê en wag op ‘n wonderwerk.

Vandag vra die Here: "Wat wil jy hê ek moet vir jou doen? Wil jy gesond word?"  Die vrae blyk oppervlakkig en alledaags te wees, maar in werklikheid is die Here Jesus Christus ernstig. Trouens, die vrae behoort soos volg gelees te word: “Wat wil jy regtig hê ek moet ek vir jou doen? Wil jy regtig gesond word?"

Wel, as ons regtig wil, moet ons regtig begin glo in Jesus Christus en sy vermoë om te red, te verlos en te genees. Ons moet ophou om na die vyand te luister, wat twyfel, vrees en ongeloof saai.

Matteus 21:22: "Alles wat julle in die gebed vra, sal julle ontvang as julle glo."

As jy glo? As jy glo in wat? Dikwels glo ons dat die Here sekere dinge kan doen of ons die begeertes van ons harte kan gee, terwyl ons nie glo in wie Jesus is nie.

Sodra ons kan glo dat Jesus Christus die Seun van God is, die Alfa en die Oméga, die Een wat was en is en wat kom, die weg, die waarheid en die lewe, wat genade bewys en selfs die onaantasbare aanraak, dan het ons geloof - ware geloof.

Dan kan ons sê: "Ja, Here, ek wil regtig gesond word.”

Openbare Beskermer, Busisiwe Mkhwebane is Maandag geroskam in Pretoria se Hooggeregshof nadat daar bevind is dat sy haar plig versuim het om die Guptas se Estina-suiwelprojek by Vrede in Vrystaat behoorlik te ondersoek. Daar is onder meer bevind dat haar verslag oor die projek ongrondwetlik en ongeldig is. Die DA glo dat Mkhwebane se ondersoekende verslag ʼn toesmeerdery is, omdat politici wat daarby betrek is nooit uitgevra is oor hulle betrokkenheid en dus meer noukeurige ondersoek vrygespring het.

Mkhwebane het geen bevindings in haar verslag gemaak oor die rol van die vorige Vrystaatse premier, Ace Magashule, en die destydse LUR vir landbou, Mosebenzi Zwane, omrede dit nie deel van haar ondersoek uitgemaak het nie. Minstens R200 miljoen se staatsgeld, wat geoormerk was vir die ontwikkeling van opkomende swart boere in die Vrede-omgewing, is na Estina gekanaliseer, wat verbind word met die omstrede Gupta-familie. Van dié geld is glo selfs gebruik om in 2013 vir ʼn weelderige Gupta-troue van ongeveer R30 miljoen by Sun City te betaal.

Dit is die tweede keer dat ’n verslag van Mkhwebane verwerp word ná haar ondersoek na die reddingsboei vir die destydse Bankorp, wat later deur Absa gekoop is, ook nie aanvaar is nie. Dit is egter haar bedenklike Estina-verslag wat opposisiepartye laat aandring op die bedanking van Mkhwebane as Openbare Beskermer.

Bladsy 1 van 2
Go to top