► “’n Monument van grootskaalse korrupsie” is hoe Noord-Kaapse premier dr. Zamani Saul nuwe psigiatriese hospitaal in Kimberley geopen het 13 jaar nadat konstruksie begin is @ R290 miljoen, maar nou eers voltooi is teen R2 miljard ►Appèlhof handhaaf beslissing van Noord-Gauteng hooggeregshof dat Cash Paymaster Services (CPS) R316 miljoen aan Sassa moet terugbetaal ►Transnet toon wins van R6 miljard vir finansiële jaar 2018/19; eerste staatsonderneming in baie lank tyd wat wins toon ►Plaasterreur 30 September, Malmesbury, twee aanvallers in plaashuis, huiseienaar skiet een dood ►Groot dele van die land vanaf Limpopo tot in die Wes-Kaap ondervind erge droogtetoestand met minder as 50% van die gemiddelde reënval in 2018/19 seisoen – sien by hierdie skakel hoe in Steytlerville-distrik droogte ervaar word; aan die ander kant sien by hierdie video hoe gejuig word oor goeie reën in distrik Beaufort-Wes ►Kampioen Boran stoetbul genaamd Mr. Million, gekoop vir R1 miljoen, se hakskeensenings deur veediewe op plaas by Brits afgekap, moes vankant gemaak word ►Intensiewe driedaagse-kursus oor in- en uitvoer en internasionale handel aangebied te Midrand, Kaapstad en Durban, kontak Ronell 073 291 0450 of events@norcaz.biz►

Met die volgende kommentaar wil ons die volgende uitstaande gebeure die laas week kortliks aanraak:

  • Die besluit van die algemene moderatuur van die NG Kerk om nie te appelleer teen die hofuitspraak dat homoseksualisme in die kerk goedgekeur word en dat homoseksuele predikante toegelaat word in die bediening: Hierdie is egter volgens die Bybel ʼn groteske dwaling en wat dus vir baie lidmate van die kerk totaal onaanvaarbaar is. Hoe gaan die NG Kerk uit hierdie hoek kom waarin dit sigself geverf het?
  • Die klug van die week en sekerlik een van die grootste klugte nog in SA, is die bevinding van die MRK dat die uitlating van Julius Malema dat “we are not calling for the slaughtering of white people – at least not yet” nie haatspraak is nie. Verdere kommentaar oor hierdie skreiende dubbele standaarde is oorbodig. ʼn Troos darem is dat AfriForum die saak in die hof verder gaan beveg.
  • Die openbaring voor die Zondo-kommissie dat Andile Ramaphosa, seun van die president, sowat R2 miljoen van Bosasa ontvang het waaronder R500 000 uit die persoonlike sak van Gavin Watson. Inmiddels het pres. CR vroeër in die Parlement eers ontken dat sy seun geld van Bosasa ontvang het en toe gesê het dat dit vir dienste gelewer was. Dit beteken dat die staatspresident vir die Parlement gelieg het. Dit is ʼn uiters ernstige oortreding – wie gaan iets daaromtrent doen?
  • Die jag wat in Afrikaner-geledere gemaak word op Ernst Roets van AfriForum. Hy staan op vir reg en geregtigheid vir die Afrikaner, teen plaasmoorde en teen die gevaar van beoogde grondgryp, maar tog word hy in Rapport, subtiel deur die VF Plus en ander liberale Afrikaners geteiken as ʼn gevaar vir die Afrikaner. Wat skuil hieragter?
  • Die Solidariteit Groep word opmerklik ʼn al groter faktor in Afrikaner-geledere: Benewens op al die terreine waar die groep met sy filiale optree, het Solidariteit die afgelope week deur Helpende Hand die hoofborg geword van Afrikaans is Groot, dit vervul ʼn groot finansiële rol in Orania en dit het beheer oorgeneem oor die jaarlikse KragDag ekspo naby Pretoria.

Die reisverhaal wat hierdie skrywer op sosiale media vertel, klink geloofwaardig en indien dit wel so is, laat die waarheid omtrent die kontras in lewensomstandighede tussen SA aan die eenkant en Botswana en Namibië aan die anderkant ʼn mens se kop duisel.

“Ek het sopas 10 dae in Namibië spandeer en wil graag van die geleentheid gebruik maak om u uit te nooi om in u motor te klim en Namibië via Botswana per pad te besoek. Los sommer u drywer en lyfwagte tuis, dan ervaar u die rit soos ons gewone Suid Afrikaners dit ondervind.

“Ek gaan u ʼn paar wenke gee vanaf Brits my tuisdorp tot in Namibië. Gaan kyk gerus die aand voor u vertrek na Madibeng Misdaad Verkeer Forum se Facebookblad of dit veilig is om met die N4 na Rustenburg in die nag te ry, want u sal 03h00 die volgende oggend in die pad moet val. Die gevaar area is vanaf Majakaleng tot anderkant die Total vulstasie, rigting Rustenburg, bekend vir klipgooi, toi-toi en bandebrand.

“As u op die hoofweg ry, verander vinnig bane as u onder die brûe deurgaan, dis baie veiliger as die skobbejakke klippe van die brûe afgooi. Verminder ook spoed, dit help as ʼn klip u voertuig tref.

“Wees versigtig wanneer u Swartruggens binne kom. Die strate is donker weens die straatligte wat nie werk nie. Daar is ook nie meer stoptekens nie, die wat wel nog daar is, is gebuig, of deur die wind en weer verweer of in die verkeerde rigting gedraai. Wees ook versigtig as daar al ander voertuie op die pad is, hulle ignoreer die padreëls heeltemal.

“As u die tolhek tussen Swartruggens en Zeerust nader, gebruik maar die voertuig se toeter om die persoon wat u R175.00 se tolgeld moet ontvang vroegtydig wakker te kry. U wil nie te lank staties vertoef nie, dit maak u ʼn maklike teiken veral vir die klomp onwettiges wat ons landsgrense so maklik binnekom. ʼn Groot gedeelte van die pad tussen Swartruggens en Zeerust is opgegradeer, daar is egter geen padmerke, waarskuwingstekens, katoë of verf nie.

“O ja, nog ʼn ding van die ryery in die nag, as dit lyk of die aankomende verkeer ʼn motorfiets is, want daar is net een lig, dit is nie! Dit is een van die vele onpadwaardige voertuie in Suid Afrika! Hou maar u oë op die pad as u deur Zeerust ry, dit is verskriklik vuil en maak ʼn mens sommer weemoedig om te sien hoe die eens pragtige dorp agteruit gegaan het. Ry verkieslik met ʼn bakkie, die slaggate is baie erg op ʼn sedanvoertuig.

“By Skilpadhek grenspos is dit maar die normale, twee oorgewig persone wat so pas aan diens gekom het. Die grenspos maak 06h00 oop, die deure 06h07, dan staan jy nadat jy gegroet het, maar en wag dat jy gehelp word. As u klaar is en terug in u voertuig, bêre maar al die dokumente soos die voertuigregistrasie, grensbrief van u versekering, ens. Die Polisiebeamptes wat die voertuig en dokumente moet nagaan om seker te maak dit is nie gesteel nie en dat u ook nie onwettige goed uit die land uitneem nie, staan nog en gesels by die immigrasiekantoor. So, ry maar net deur, niemand sal u stop nie.

“Dan is dit die Pioneer grenspos aan die Botswana kant. Moenie skrik as die dame eerste groet nie, vinnig die papiertjies oorhandig wat ingevul moet word nie en dadelik help om u so vinnig as moontlik weer oppad te kry nie. By die polisiebeheerpunt word dit vriendelik gegroet, vra waar gaan u heen, enige iets om te verklaar, en dan is u oppad. O ja, nog ʼn ding, dit is baie opvallend dat al die personeel by die Botswana grenspos wel in hul uniforms pas, netjies skoon en klere gestryk, skoenveters vas is. Dan is dit ʼn lang trek via Jwaneng en Kang tot by Buitepos op Namibië se grens. Stop gerus op Jwaneng, gooi diesel in vir R12,74 /liter. Moenie “worry” nie, ek kon dit ook nie glo nie, die brandstof kom dan uit Suid Afrika en dan is dit goedkoper as wat ons daarvoor betaal? Maak nie lekker sin nie, nè, kyk maar daarna as u weer op kantoor is, moet ʼn fout wees.

“Maak maar weer vol op Kang, die kaartmasjien by Charles Hill werk nie, hulle sukkel met sein. By Buitepos is dit net so professioneel en vinnig is u oppad Windhoek toe via Gobabis en Witvlei. Baie wild op die pad – gemsbokke, koedoes, vlakvarke, hartbeeste en een kringgatwaterbok gekry.

“Niemand jag hulle met strikke soos hier in SA nie, nee, daar is wet en orde nog in plek.

“Hulle is heel mak, ry maar stadiger vir die een of twee wat die pad wil oorsteek. Moet ook nie bekommerd wees oor slaggate nie; daar is niks vir ʼn volle 776 km tot op Langstrand nie een nie!

“Die gras in die gang is kort gesny en swart vullissakke met die Gautengers se gemors wat hulle by die voertuie uitgooi, is opgetel en wag om weggeneem te word en dit is tussen niks en nêrens… silwerskoon met net die prag van die natuur.

“Tap maar brandstof in Windhoek, kos u N$ 13.64, ja ook aansienlik goedkoper, maak ook nie lekker sin nie nè. Net soos deur Botswana, moet u maar by die spoedgrens hou. Daai polisiemanne neem nie “bribes ” nie en doen hulle werk soos ʼn bekwame polisieman of -vrou betaam. Ek dink die groot rede is omdat hulle kwalifikasies en vereistes vir hul aanstellings in plek is. Nie soos in Suid-Afrika waar ʼn groot gros beamptes of ʼn kriminele rekord het, of nie die nodige kwalifikasies het om self te kan funksioneer nie.

“Stop maar enige plek langs die pad, hulle het nog rusplekkies met ʼn sementtafel en bankies waar u ʼn lekker koffie kan drink. Dit is BAIE veilig! Gooi maar die papiere, ens. in die drom wat daar staan, dit is die rede hoekom dit so skoon is. Moenie verbaas wees as u in Swakopmund arriveer en sien hoe skoon dit is nie. Die munisipaliteit se vullistrok is skoongewas, die manne het almal uniform aan met glimbaadjies, tel al wat ʼn papiertjie op as hulle verbykom.

“Nie soos in Brits waar daar sewe manne soos vinke agter op die vuil trok hang nie, die drywer wat ry soos hy wil nie, net die helfte van die vullis wat opgetel word nie. Almal stop by 4-rigtingstopstrate, want net ʼn bietjie verder staan ʼn beampte wat wag vir die wat die verkeersreëls verontagsaam.

“Die dienslewering is puik – dit sluit al die kettingwinkels in. Almal groet, almal wil net help. Al die straatligte brand in die aand. Visuele polisiëring vind elke dag plaas, nie soos by ons waar jy ʼn polisiebeampte net by Pick n Pay en die drankwinkel sien nie. Die water is skoon, u kan dit maar drink, nie soos by ons waar jy konstant bottelwater moet saamneem nie.

“As u gaan visvang neem ʼn lisensie by die Ministry of Fisheries and Marine Resources in Swakop uit. Dit kos maar N$ 14 vir 30 dae, die beamptes het my elke dag langs die water besoek om te kyk of ek wel ʼn lisensie het en of dit wat ek gevang het, die regte grootte en hoeveelheid is. Ja, dit is hoekom daar nog vis is, die bekwame regering kyk na hulle verskillende bronne om dit vir die nageslag te bewaar. Nie soos in Suid-Afrika nie, elke Jan Rap en sy maat steel, vat, vernietig om homself te verryk en basta met die res.

“Die regering is ʼn goeie voorbeeld, maar nou ja, u sal beter weet as ek. Ek wou nog ʼn paar staaltjies met u deel maar ek sien dit is amper tyd vir beurtkrag hier by ons. Doen uself die guns en gaan ry die roete en besluit dan self wat u gaan maak sodra u terug is in Suid-Afrika en sien hoe die eens pragtige land net meer en meer in ʼn hool verval.”

Onbevestigde berig op sosiale media lui dat kilometerslange konvooie swaarvragmotors gelaai met goeie gehalte SA steenkool daagliks oppad is na hawens vir verskeping na China. Die berig lui dat die SA regering / Eskom nie meer geld het om China te betaal nie en nou geskiet die paaiemente in goedere (steenkool).

Vir verifikasie sien hierdie videogreep.

Die prys vir die mees verregaande boikot in ʼn lang tyd moet verseker gaan aan MTN, wat, hoewel hulle miljoene Afrikaanssprekende kliënte het, besluit het om die musiekskouspel Afrikaans is Groot te boikot net omdat kwansuis Steve Hofmeyr daar aan deelneem – en rassehaters soos Panyaza Lesufi druk plaas. Wat gaan Afrikaanssprekendes wat so blatant in die gesig gevat word, daar omtrent doen, veral met hul geld wat hard kan praat?

Van al die nuus wat Ditsem Nuus deur DitsemBlits as elektroniese nuusbrief die afgelope week uitgestuur het, was die een wat die meeste aandag getrek het, die videogreep van Die Stem gesing in Vlaandere, België, by ʼn geleentheid gereël deur ʼn plaaslike inwoner, Karel de Beuckelaer, “in simpatie met Afrikaanssprekende blanke Suid-Afrikaners”. ʼn Yslike 183 862 mense het net n.a.v. die plasing deur DitsemBlits na die video gekyk, terwyl volgens Facebook die plasing op hierdie stadium al 557 078 mense bereik het.

Gerieflikheidshalwe hiermee weer die videogreep.

Van die jongste sakenuus te Orania:

  • Die winkel Orion Hardeware is verkoop – deur mnr. Harry Theron, wat dit vir jare bedryf het – aan Ronel en Frik Bekker. Laasgenoemde, met albei sowat 30 jaar ervaring in landboukoöperasiebestuur, sê dat hulle opwindende nuwe planne het vir die winkel.
  • Orania Toerusting en Gereedskap (OTG) in die Horison Nywerheidskorf het op 1 Maart 2019 getrek na ʼn aansienlik groter perseel in dieselfde kompleks – na die perseel waar Die Proviand voorheen was. OTG eienaar Gert van Coppenhagen sê dat die vraag na toerusting en masjiene te huur vir die boubedryf, hom geroep het om die skuif te maak. Terselfdertyd brei OTG ook hul reeks van produkte uit na bv. steierwerk vir multiverdieping konstruksies.
  • Die klerewinkel Die Skatkis, wat deur Magda van Coppenhagen bedryf word, het ook geskuif na ʼn groter perseel vanaf die Nywerhede 24 sentrum na die Horison Nywerheidskorf, aangrensend aan die perseel van OTG. Terselfdertyd sê Magda dat hulle hul klerereekse vir mans en dames aansienlik uitgebrei het en dit steeds teen uiters bekostigbare pryse.
  • Wa-Spa is ʼn besigheid met ʼn baie beskrywende naam wat onlangs in Orania geopen het – topgehalte motorwas en skoonmaak, Theunis Peens doen dit met ʼn verskeidenheid dienste so goed as enige soortgelyke besigheid in die stad, of selfs nog beter. Wa-Spa is langs Komloerie geleë – vir meer besonderhede sien die advertensie in hierdie Orania-fokus
  • Sonland Produkte in die Afsaal Kompleks het hul perseel aansienlik vergroot ten einde ʼn groter verskeidenheid van kruideniers, vrugte en groente aan te bied. Terselfdertyd het hulle ook uitgebrei na skoonmaakmiddels en toiletware. Hennie en Riana sê dat dit alles deel is van hul missie om ʼn superette van uitnemendheid te bedryf.
  • Orania Motoringenieurswerke het ʼn vakature vir ʼn werkswinkelassistent. Geen vorige ondervinding is nodig nie, net opregte belangstelling om te leer van presisie-ingenieurswerk. Mededingende vergoeding en loopbaangeleentheid. Kontak Ben Botha by 060 610 4953.
  • Skroot vir kontant – by Noord-Kaap Skrootmetale – dit is wat jy daar kan kry. Gesels gerus met André Minnaar en sy span – 074 233 3211.
  • ʼn Volledig toegeruste gimnasium het ook vir die eerste keer sy deure op Orania oopgemaak – Bo-Karoo Gimnasium & Fiksheid Sentrum – in die Horison Nywerheidskorf, waar Tersius en Nanette van Niekerk van diens is.
  • Les bes, dr. Phillip Nothnagel het ʼn algemene praktisynspraktyk op Orania geopen, ten einde in ʼn nypende behoefte te voorsien. Hy word bygestaan deur sy vrou Maritsa, as ʼn gekwalifiseerde apteker. Kontaknommer 082 325 3599.

Deelnemers van regoor Suid-Afrika berei hulself tans voor vir 'n eiesoortige uitdaging te Orania-omgewing, met 'n keuse uit vier opsies: Vasbyt: 100 km oor 4 dae; Ligloop: 55 km oor 4 dae; Vastrap: 200 km oor 4 dae per fiets; Ligtrap: 116 km oor 4 dae per fiets. Die roetes kronkel deur die groen Bo-Karoo landskap langs die Oranjerivier en begin alles met 'n sweepklap op 28 April en duur tot 1 Mei.

Die geleentheid het die afgelope jare van krag tot krag gegaan en ontwikkel deurentyd allerlei nuwe tradisies, alles aan die hand van nuwe kameraadskappe wat gesmee word. Meer besonderhede by 053 207 0062 of Hierdie e-posadres word van Spambotte beskerm. Jy moet JavaScript ontsper om dit te lees..

Die donker wolk het darem ʼn silwerrandjie, in hierdie geval die Zondo-kommissie en ander kommissies van ondersoek wat tans sit en voor wie die ongelooflikste korrupsiederm daagliks op TV voor die hele land uitgeryg word. Daar is groot dankbaarheid vir die voorsittende regters soos Raymond Zondo en Lex Mpati wat ʼn atmosfeer van vertroue skep waarin sleutelgetuies en fluitjieblasers met gerustheid die hoofstukke van staatskaping een vir een kan uitpak.

Ons het waardering vir hierdie regters en ook vir die betrokke swart getuienisleiers wat onbevrees hul werk doen en toesien dat die waarheid objektief op die tafel kom. Daarby is die goeie samewerking tussen swart en wit amptenare in hierdie drama ook net te waardeer.

‘n Tragedie van die landswye tragedie wat sigself tans in Suid-Afrika afspeel, is dat die eintlike rampokkers, die gewetenlose plunderaars, los rondloop. Jacob Zuma het in sy pos as staatspresident, onder die eed van getrouheid, die land op ‘n skinkbord weggegee aan buitelandse Indiër rampokkers en sodoende sy land verraai.

Steeds loop hy egter los rond en word eenvoudig nie aangekla nie, wat nog te sê van vervolg en gestraf te word. Erger nog, die gewoonteregtelike straf vir landsverraad is die dood – hoe kan geargumenteer word Zuma verdien dit nie?

Die groot tromslaner van die ANC, Ace Magashule as sekretaris-generaal, het met ongeëwenaarde korrupsie in nege jaar die Vrystaat as provinsie tot op die grond afgetakel. Ook hy word nie eens aangekla nie.

So kan aangegaan en aangegaan word oor die tragedie der tragedie ……

Op sigwaarde sê pres. CR en sy kabinetsmakkers hulle wil hul planne met onteiening sonder vergoeding met omsigtigheid en oorleg uitvoer, maar in werklikheid blyk dit dat die ANC klaar hul lyste gereed het van plase wat hulle wil steel. So het die DFA koerant in Kimberley op goeie gesag berig hoe die ANC in die Noord-Kaap reeds 30 spesifieke plase geoormerk het vir gryp, almal waarvan in blanke besit is en die meeste waarvan in volle bedryf.

Vir die lys van spesifieke plase in die Noord-Kaap en die DFA berig, lees self by hierdie skakel. In reaksie op die berig sê Agri Noord-Kaap so ewe dat hulle weet hierdie lys is nie amptelik van die Noord-Kaap regering of die sentrale regering nie en steeds raai hulle boere en mense aan om “kalm te bly”. Van regeringskant is daar egter geen word van repudiasie van die berig nie.

As dit in die Noord-Kaap die geval is soos wat skynbaar per abuis uitgelek het, dan moet dieselfde mos geld in die ander agt provinsies? Ons wag vir die waarheid in hierdie verband.

Ons beklemtoon graag die positiewe uitspraak oor vuurwapenlisensies wat pas deur die Noord-Gautengse hooggeregshof gelewer is en wat skynbaar bepaal dat dit vir minstens die volgende 18 maande dit nie nodig gaan wees om vuurwapenlisensies te hernu of enige vuurwapens in te handig nie. Lesers word aangemoedig om self die berig oor die uitspraak by hierdie skakel te bestudeer.

Oor die hele etniese spektrum in SA gaan al hoe meer stemme op dat dit tyd is vir reguit praat en opstaan teen die totaal onaanvaarbare situasie in die land. Ter illustrasie hiervan luister gerus na hierdie drie stemgrepe van onderskeidelik ‘n Afrikanervrou, ‘n Indiërman en ‘n Engelsprekende blanke man.

 

Verdere kommentaar is oorbodig.

Deur sosiale media is die volgende redaksionele kommentaar van Front Nasionaal SA, ʼn klein behoudende Afrikaner politieke randparty, ontvang omtrent die huidige grondsituasie in die land:

Nou word die pap darem dik aangemaak, nê!

Kyk, nou word dit darem dik gesmeer. Ewe skielik is Ramaphosa se erfgrond nie een keer nie, maar sommer TWEE keer van hom gesteel! En die pyn daarvan, o, die pyn....

Lyk nie vir ons asof hy juis 'n hengse agterstand het as gevolg van die beweerde tweeledige diefstal nie. Ons verneem hy sit daar redelik goed in.

Bring die bewyse ou bul. Bring die kaart en transport van daardie grond wat twee keer gesteel is en ons kan gesels.

Tot dan stel ons net belang in gesels oor een pyn: Die pyn van vertrapping, van plaasmoorde, van onteiening sonder vergoeding, van werkloosheid en armoede as gevolg van BEE, van rassediskriminasie teen blankes, van kwotas en miskenning van erfenis, taal en kultuur.

En vir daardie pyn het ons bewyse. Baie, baie bewyse.

So kom laat ons gesels oor pyn en grond en lewens en waardigheid wat gesteel word. Ons is hier, ons gesels graag.

Meer raakgevat kan dit nie en ons vereenselwig ons met hierdie siening. Die foto’s by hierdie berig is juis van die jongste bewyse waarna verwys word – van Boet Pienaar en Jesse Lewis op 14 Maart by Mooinooi.

In 'n tyd waarin die kultuurerfenis van die Afrikaner in die land verguis word soos nooit te vore nie, wys feite daarop dat hierdie erfenis inderwaarheid veel bied om op trots te wees. Ter wille van perspektief dien hierdie erfenis gesien te word teen die agtergrond van die werklikhede van die verlede en hede van Suid-Afrika.

Sedert die magsoorname in 1994 deur die ANC, is die Afrikaner toenemend deur die nuwe bewindhebbers en hul manipuleerders, die Nuwe Wêreldorde (NWO), subtiel geboelie. Dit was eers geleidelik subtiel en toe eskalerend openlik – sg. regstellende aksie, swart ekonomiese bemagtiging, sport- en studiekwotas, verdringing van Afrikaans, plaasmoorde, vervanging van plekname, verwydering van standbeelde, gedreigde konfiskering van grond sonder onteiening, kriminalisering van geskiedenis en kultuurerfenis – alles wat uitgeloop het vandag op 'n onverklaarde burgeroorlog teen die blanke en spesifiek die Afrikaner.

Teen hierdie agtergrond van verguising, onder die dekmantel van die sg. Nasionale Demokratiese Revolusie (NDR), staan die volgende sleutelfeite soos 'n paal bo water:

  • Die Afrikaner het geen grond gesteel nie en is daar ook geen bewyse voor nie. Die voorsate van die Afrikaner het sedert 1652 in grootliks onbewoonde en onbesette gebiede gevestig en hul vestiging op eerbare wyse uitgewerk met swart en bruin mense wat self in 'n proses van intrek en vestiging was.
  • Die voorsate van die Afrikaner en later die Afrikaner self was die mense wat die beskawing in Suid-Afrika ingedra het – die Evangelie, die alfabet, die wiel, die maatstok en wet en orde.
  • Ná die Anglo-Boere-oorlog was die Afrikaner letterlik platgeslaan, maar het desondanks opgestaan om 'n volk in eie reg te word en dit op elke lewensterrein, vanaf onderwys tot die staatkunde.
  • In die 20ste eeu het die Afrikaner die leiding geneem om saam met anderskleurige landsburgers Suid-Afrika op te bou tot die enigste ontwikkelde staat op die vasteland.
  • HF Verwoerd het as eerste minister 1958-66 die aangesig van Suid-Afrika ingrypend verander vanaf apartheid na 'n eie toekoms vir elke volk in die land, grootliks gefinansier deur blanke belastingbetalersgeld.
  • In hierdie tydperk het SA die kruin van voorspoed bereik en was die ekonomiese groeikoers 7,9% (die tweede hoogste in die wêreld), was die werkloosheidkoers onder swartmense 5% (teenoor 40% vandag), was die moordkoers 60 per jaar (teenoor 2 000 per jaar vandag) en was daar geen plakkerskampe nie.
  • Met die komplotsluipmoord op Verwoerd in 1966, is SA deur die NWO gepootjie en verswelg, wat uitgeloop het op die verraad in die negentigerjare - met die res tot vandag die tragiese geskiedenis wat dit is.
  • Die Grensoorlog in die noorde van destydse Suidwes-Afrika en in Suid-Angola is deur die SA Weermag beslissend gewen, hoofsaaklik met bloedjong dienspligtiges, In die proses is nie net plaaslike terroristegroepe verslaan nie, maar ook Kubaanse en selfs magtige Russiese magte – soveel so dat dit die prop uitgetrek het vir die val van die Ystergordyn.
  • Die ANC het in hul terroristiese stryd teen die SA veiligheidsmagte nie 'n enkele veldslag gewen nie, trouens hulle het nooit kans gesien om die veiligheidsmagte kop aan kop aan te vat nie. Die beste wat hulle kon doen, was die lafhartige Kerkstraat-bom in 1983 waarin 19 soldate en burgerlikes gesterf het en 217 beseer is.

Binne die omvattende aanslag teen die Afrikaner vandag, behels die dryf om spesifiek die kultuurerfenis van die Afrikaner af te kraak en te kriminaliseer, o.m. die volgende:

  • Pogings om die Afrikaner as inherent boos voor te stel deur wanvoorstelling en leuen dat sg. apartheid 'n misdaad teen die mensdom was.
  • Om op skoolvlak sover moontlik met tradisioneel Afrikaanse skole weg te doen en die positiewe geskiedenis van die Afrikaner uit leerplanne uit te skryf.
  • Afrikaans en Afrikanerskap uit eens trotse Afrikaanse universiteite uit te skop sodat daar tans net een tradisionele universiteit oor is – NWU Potch – wat Afrikaans as primêre taal van onderrig het
  • Die klakkelose verandering van plek- en straatname van Afrikaner-oorsprong t.g.v. die name van struggle-leiers en buitelandse Kommuniste.
  • Dit word gevolg deur die voorneme van die ANC-regering, die EFF en ander swart politieke radikalisme om grond in die land sonder vergoeding te onteien, uitdruklik gemik op blankes / Afrikaners.
  • Die onlangse aansoek van die Nelson Mandela Stigting by die Gelykheidshof om die vertoon van die vorige landsvlag tot haatspraak, onregverdige diskriminasie en teistering te verklaar en sodanige vertoning te kriminaliseer.
  • In die hoofstroommedia en op sosiale media die sing van Die Stem in die publiek as 'n skande voor te stel.
  • Sopas is in 'n voorlopige verslag van 'n taakspan van die Dept. van Kuns en Kultuur aanbeveel dat, omdat dit aanstoot gee, standbeelde van sg. koloniale en apartheidsfigure vanaf prominente openbare plekke verwyder moet word om in sg. temaparke geplaas te word.

Die geestes- en kultuurerfenis wat die wese van die Afrikaner opmaak, kan soos volg opgesom word:

  • Christelik-gereformeerde godsdiens wat soos 'n goue draad deur sy geskiedenis loop tot vandag toe, afvallighede ten spyt.
  • 'n Volk in eie reg, die enigste wit stam van Afrika en nie bloot 'n groepering of setlaars nie.
  • Afrikaans as taal – in gehalte bewys en wetenskaplik beoordeel as van wêreldklas. Vandag is Afrikaans die huistaal van nagenoeg agt miljoen mense.
  • Die Stem 'n volkslied wat vanjaar 100 jaar gelede deur CJ Langenhoven geskryf is en later deur ML de Villiers getoonset is. As sulks vertolk dit die diepste psige en wese van die Afrikaner.  
  • Die vorige landsvlag – die oranje, blanje, blou - waaronder 'n groot verskeidenheid prestasies en heldedade gelewer is waarop by enige standaarde met reg trots gewees kan word.
  • Die uiteindelike feite van die saak en die onvermydelike slotsom waartoe gekom word, is dat die Afrikaner 'n trotse geskiedenis het, dat hy ondanks foute sy anderskleurige landgenote op 'n Christelike wyse behandel het en dat die aandeel van die Afrikaner grootliks van SA die topland gemaak het wat dit aan die begin van die negentigerjare was. Daarom kan die Afrikaner inderdaad trots wees op sy geestes- en kultuurerfenis en is dit sy reg om dit steeds en ook vir die toekoms te koester en uit te leef.

Enkele hoogtepunte van die kruin van sukses wat die land gedurende die ampstermyn van dr. Verwoerd beleef het, fel buitelandse teenkanting en boikotte ten spyt, was die volgende:

In 1960 antwoord Verwoerd meesterlik en uit die vuis op die onverwagse “Winds of change”-toespraak van besoekende Britse eerste minister Harold Macmillan in die SA Parlement.

In dieselfde jaar oorleef dr. Verwoerd wonderbaarlik die eerste van twee sluipmoord-aanslae met herstelling van die skietwonde toegedien deur David Pratt.

Na 'n suksesvolle referendum kom die langgekoesterde Republiek van Suid-Afrika op 31 Mei 1961 tot stand.

Toe Verwoerd hieroor ondanks sy beste pogings in Londen nie met die Statebond kon ooreenkom nie, lei hy SA uit hierdie internasionale liggaam, met van meet af die gevolg dat die land al sterker word as ooit.

Ekonomies het die BBP in die sestigerjare jaarliks gegroei teen 'n koers van 6%, terwyl die inflasiekoers 2% was. Die land was selfversorgend vir sy voedsel, terwyl hy 'n vername uitvoerder van vrugte en graanprodukte geword het. Met die ontwikkeling van Sasol het die land beweeg na gespeen te raak van die buitelandse oliemark. As voorste goudprodusent ter wêreld is die ekonomie geanker en het nuwe nywerhede opgeskiet.

Die verdedigingsmag word die doeltreffendste op die vasteland, terwyl op die gebiede van wetenskap en kernnavorsing SA 'n toonaangewende rol begin speel.

Maatskaplik was teen 1966 slegs 5% van die swart bevolking werkloos, terwyl daar nie 'n enkele plakkershut in SA was nie. Swartmense in SA het toe al meer motors besit as wat die geval was in die hele res van Afrika.

In die vroeë sestigs besoek verskeie diplomatieke sendings SA om die land te laat afsien van sy beleidsrigtings, soos VN Sekretaris-generaal Dag Hammarskjöld en De Alva en Carpo oor SWA. Verwoerd hanteer almal met opmerklike finesse en nie een het met 'n werklike skadelike verslag teen SA uitgekom nie.

In 1962 breek die SA Veiligheidspolisie die rug van 'n grootskaalse Kommunistiese komplot teen die regering met die Rivonia-arrestasies en en die lang gevangenisstrawwe in 1964 vir die veroordeeldes waaronder Nelson Mandela.

Oor SWA behaal die Verwoerd-regering in Julie 1966 in die Internasionale Geregshof, na nougesette regsvoorbereidings in 'n uitgerekte saak, 'n gedenkwaardige oorwinning toe die hof ten gunste van SA beslis.

In dieselfde maand in die algemene verkiesing wen die Nasionale Party 'n rekordaantal 126 setels uit 166 in die Volksraad.

Sonder om te verval in verglansde heldeverering, is dit duidelik uit die feite dat die buitelandse en binnelandse teenstanders van Verwoerd teen hom skaak gespeel het – en verloor het – totdat ...

Hedendaagse nuusdekking in die hoofstroommedia toon 'n sterkerwordende tendens om alles wat in voor-1994 Suid-Afika gebeur het, as sleg af te maak. Hierdie tendens kom tans veral na vore met die 25-jarige herdenking van die toespraak van oud-pres. FW de Klerk in die Parlement op 2 Februarie 1990.

Daar word ook daarby gesê dat die destydse SA regering in die vroeë negentigs geen keuse gehad het as om die landsregering sonder meer aan die swart meerderheid oor te gee nie.

Dit is deesdae mode om sogenaamde “apartheid” die skuld vir alles te gee en te sê dat selfs alles wat vandag nog verkeerd is, die gevolge van “apartheid” is.

Was alles in die vorige bedeling regtig so sleg en het die destydse regering werklik geen ander keuse gehad nie?

Pas is weer feitelike syfers gepubliseer oor die situasie in SA vanaf die sestigerjare tot en met die einde van die tagtigs. Van hierdie feite is enkeles die volgende en kan daar 'n uitdaging gerig word om die korrektheid daarvan feitelik verkeerd te bewys:

Die beleid onder die eerste ministerskap van dr. HF Verwoerd was afsonderlike ontwikkeling, d.w.s. volledige vrymaking van individuele swart volke op hul eie grondgebied en nie bloot diskriminerende “apartheid” nie. Daarvan getuig die daadwerklike stappe wat in hierdie verband geneem is.

In die vroeë sestigerjare het die BBP van SA jaarliks teen 'n koers van 6% gegroei, terwyl die inflasiekoers 2% was. Die land was selfversorgend vir sy voedsel, terwyl hy 'n vername uitvoerder van vrugte en graanprodukte geword het.

Met die stigting van Sasol en die verkryging van brandstof uit steenkool, was die land besig om hom van sy afhanklikheid van die buitelandse oliemark te speen. Sy verdedigingsmag het een van die doeltreffendste ter wêreld geword, terwyl op die gebied van wetenskap en kernnavorsing Suid-Afrika 'n wêreldleidende rol begin speel het.

Die geldstelsel is gedesimaliseer (Rand en sent), goudproduksie is verhoog, nywerhede het sterk vooruitgegaan en werksgeleenthede vir alle inwoners het vir ekonomiese opheffing van die hele gemeenskap gesorg. Slegs 5% van die swart bevolking was teen 1966 nog werkloos.

In 1970 verdien swart werkers 'n totaal van R1 751 miljoen oftewel 25,5% van die totale loongeld in SA, 'n syfer wat styg tot R17 238 miljoen in 1984 (1 000% groei).

Die begrotingsbedrag vir swart onderwys styg jaarliks vanaf 1970 met bykans 30% meer as enige ander staatsdepartement. Van 1955 tot 1984 styg die aantal swart skoliere van 35 000 tot 1 096 000, d.w.s. 31-voudig.

Teen 1972 besit swartmense SA 360 000 voertuie - meer as in al die swart state van Afrika saam.

In Soweto het die blanke regering 'n reuse hospitaal, Baragwanath, gebou met 3 000 beddens - een van die grootste en modernste ter wereld. Sy 23 operasieteaters is voorsien van die heel modernste toerusting en word swart mense teen 'n nominale koste van R2 vir 'n onbeperkte tydperk behandel. Die hospitaal het 8 000 personeellede in diens gehad, waaronder 450 voltydse dokters wat jaarliks 112 000 binne-pasiente en 1,62 miljoen buite-pasiente behandel. 90% van die bloed is deur blankes geskenk.

Langs die Baragwanath Hospitaal is die St. John's Oogkliniek, wêreldberoemd vir die behandeling van gloukoom, losgelate retina's, traumatiese oogbeserings en seldsame tropiese siektes.

In 1978 bou die SA regering 'n hoogs moderne opleidingshospitaalkompleks, Medunsa, op die grens van die destydse onafhanklike Bophuthatswana teen R70 miljoen op 35 ha. Hierdie “stad” in die kleine bevat woongeriewe vir manlike en vroulike studente waar swart dokters, tandartse, veeartse en paramediese personeel opgelei word. Dit is die enigste gespesialiseerde universiteit van sy soort in Afrika en een van weinige in die wêreld gefinansier deur blanke belastingbetalers tot voordeel van uitsluitlik swartes.

Praktiese mediese opleiding vind plaas in die nabygeleë Garankuwa Hospitaal waar die hele spektrum van menslike kwale behandel word. Die hospitaal beskik oor fasiliteite vir nieroorplantings, isotope-eenhede en gespesialiseerde laboratoria vir die praktiese opleiding van 200 dokters per jaar.

In die laat tagtigs was daar in Soweto meer as 2 300 geregistreerde firmas, 1 000 taxi-ondernemers en 50 000 motoreienaars.

In die 1986/1987 boekjaar betaal blankes R9 000 miljoen belasting en swartes R171 miljoen, Indiers R257 miljoen en Kleurlinge R315 miljoen.

In 1985 was 42 000 swart studente aan SA universiteite ingeskryf. Daar was 5 swart universiteite en 28 inrigtings vir hoër onderwys staatsgefinansier

In 1985 is daar 37 diesellokomotiewe en 40 stoomlokomotiewe aan buurlande geleen, waar daar daagliks 6 195 SAVD goederewaens loop teenoor 944 in SA self.

SA voorsien in die graanbehoeftes van sy buurlande en wyer - in 1980 word 250 000 ton mielies na Zambië uitgevoer, 150 000 ton mielies en 50 000 ton koring na Mosambiek, 128 000 ton mielies na Kenia en 100 000 ton mielies na Zimbabwe. Verder ontvang ook Angola, Ivoorkus, Malawi, Mauritius, Tanzanië en Zaïre SA graan. Minstens 12 Afrikastate is volgens die Argus African News Service in so 'n mate afhanklik van SA graan dat 'n totale verbod op in- en uitvoer hulle ekonomies kan vernietig.

SA word aangekla deur die wêreld dat dit 'n polisiestaat is, maar in SA was 1,4 polisiemanne vir elke 1 000 mense, teenoor die ooreenstemmende syfer van 2,2 vir Brittanje, 3,5 vir Israel, 4,3 vir New York, en 10 vir Moskou. In SA was daar in die vorige bedeling sowat 16 292 blanke polisiemanne teenoor 19 177 nie-blank.

SA is aangekla dat dit politieke gevangenes vermoor, maar in 1979-1980 was daar geen sterfgeval in SA tronke nie. In die vorige 10 jaar sterf 37 tydens ondersoekarres, teenoor 274 gedurende diesefde tydperk in Wallis en Engeland.

In die loop van die tagtigerjare het die SA Weermag die Grensoorlog in die noorde van SWA / Angola teen die Russiese en Kubaanse weermagte gewen en het dit 'n sleutelrol gespeel in die uiteindelike val van die Sowjet-ryk. Teen hierdie weermag het die ANC-Umkhonto we Sizwe geen kans gestaan nie en ook geen veldslag gewen nie.

Die vorige SA regering, veral onder oud-pres. PW Botha het sterk probeer om deur politieke “hervormings” by radikale en buitelandse eise aan te pas, maar in sy woorde: “Hoe meer hervorming ons deurvoer, hoe meer word ons verdoem. Hoe meer ons wegbeweeg van apartheid, des te woedender word die internasionale veldtog teen ons…”

Teenoor hierdie feite uit die vorige bedeling word in hierdie artikel geensins feite uit die huidige bedeling afgespeel nie. Daaroor kan egter sekerlik 'n boek, of talle boeke, geskryf word.

Natuurlik was alles in die vorige bedeling nie maanskyn en rose nie en het daar ook slegte dinge gebeur.

Die punt wat egter in hierdie artikel gemaak word, is dat daar in die vorige bedeling in SA veel was wat goed was en was daar dikwels goeie rede waarom dinge gedoen is soos dit gedoen is. 'n Sober en gebalanseerde siening van die verlede en hede dien die beste vir die toekoms.

Met die jongste weergawe van die Wetsontwerp op Suid-Afrikaanse Tale wat tans voor die Parlement dien, het Afrikaans, wat tans op verskillende fronte aanslae moet verduur, voor sy grootste uitdaging nog te staan te kom.

Die wetsontwerp in sy huidige formaat bepaal dat nasionale staatsdepartemente drie tale moet gebruik, waarvan twee sg. voorheen-benadeelde Afrikatale moet wees. Dit beteken dat staatsdepartemente moet kies tussen Afrikaans en Engels om naas twee “benadeelde Afrikatale” te gebruik om dienste aan die publiek te lewer. Dit sluit o.a. in kommunikasie met die publiek, amptelike kennisgewings, staatspublikasies en kommunikasie binne en tussen departemente.

In gevolge hierdie voorneme tel Afrikaans saam met Engels onder die tale wat “voorheen bevoordeel” is.

In die oorgangsgrondwet van 1994 is bepaal dat die posisie van geen taal swakker mag wees as wat dit tevore was nie, maar hierdie bepaling is nie in die Grondwet van die RSA van 1996 opgeneem nie. Artikel (6)1 van die Grondwet stipuleer: “Die amptelike tale van die Republiek is Sepedi, Sesotho, Setswana, siSwati, Tshivenda, Xitsonga, Afrikaans, Engels, isiNdebele, isiXhosa en isiZulu.

Dit is dus duidelik dat die wetsontwerp wat tans dien, ongrondwetlik is, want dit neem regte van burgers van die land weg. Afrikaans is 'n amptelike taal en moet as sodanig konsekwent erken word, ook in alle staatskommunikasie.

Nietemin vorm hierdie wetsontwerp 'n uiters gevaarlike stap in 'n groter patroon om Afrikaans op elke moontlike wyse te ondermyn. Dit sluit o.a. in Afrikaanse onderrig op skool, waar die Afrikaans-mediumskole die afgelope 18 jaar met bykans 80% gekrimp het.

Op universiteitsvlak is daar nie meer 'n enkele enkelmedium Afrikaanse universiteit oor nie en is Afrikaanssprekende studente by bestaande universiteite genoodsaak om dele van hul kursusse in Engels te loop. Van die sowat 10 Afrikaanse technikons en 150 Afrikaanse beroepskolleges wat voor 1990 bestaan het, het daar nie 'n enkele Afrikaanse technikon of Afrikaanse enkelmediumkollege oorgebly nie..

Op die programme van die “SABC” as openbare uitsaaier word Afrikaans erg afgeskeep.

Nog 'n ernstige gevaarlig wat tans flikker, is die uitspraak van die Suid-Gautengse hooggeregshof einde verlede jaar dat 'n provinsiale onderwysdepartement die mag het om te besluit oor die getal leerlinge by 'n openbare skool en dat hierdie mag nie by die beheerliggaam van die skool lê nie. Dit kan beteken dat skoolbeheerrade verplig is om Engelssprekende leerlinge toe te laat al is dit 'n Afrikaans-medium skool wat getallegewys selfs nie meer plek het nie.

Teenoor hierdie bedreigde situasie staan die volgende feite soos 'n paal bo water:

Afrikaans is 'n 100% Afrikataal want dit is op hierdie vasteland waar dit gebore en getoë is en tot volwassenheid gekom het.

In terme van literêre vereistes is Afrikaans met sy uitdrukkingsvermoë, wetenskaplike dokumentering en kulturele prestasies 'n taal van wêreldgehalte is.

Die literêre standaard en prestasies van Afrikaans staan kop en skouers uit bo die ander amptelike inheemse tale van SA, Engels uitgesluit maar vergelykbaar daarmee.

Daar is sowat 6,2 miljoen Suid Afrikaners met Afrikaans as moedertaal, terwyl daar aansienlike groepe Afrikaanstaliges is in lande soos Namibië, die Verenigde Koninkryk, Australië en selfs lande soos Nieu-Seeland, Botswana ens.

Matriekuitslae bevestig jaar na jaar dat leerders wat moedertaalonderrig ontvang, beter vaar as diegene wat hulle onderrig in ’n tweede of derde taal ontvang. Dit word grootliks gereflekteer in die matriekuitslae van Afrikaans-mediumskole relatief tot skole waar leerlinge nie in hul moedertaal onderrig word nie.

Volgens amptelike mediasyfers is Afrikaanssprekendes verantwoordelik vir 24% van die totale persoonlike inkomste in SA – dus 'n kwart van die mark.

Afrikaans het 'n sleutelrol gespeel in die ontwikkeling van SA die afgelope 100 jaar tot die voorste ekonomiese, politieke, maatskaplike en tegnologiese land op die vasteland van Afrika.

Teen hierdie agtergrond vra die geweldige uitdaging wat tans in die gesig gestaar word, van elkeen wat trots is op Afrikaans as sy of haar moedertaal, om op te staan en te doen wat binne sy of haar vermoë is om Afrikaans te bevorder, suiwer te hou en te sorg dat dit sy amptelike status volwaardig in die land behou – want, doodkry is min!

Bladsy 4 van 96
Go to top