► Volgens SA in Instituut vir Rasseverhoudinge (SAIRV) toon jongste misdaadstatistiek vir SAPD tesame met vorige statistiek dat sedert 1994 in SA sowat 500 000 moorde gepleeg is en 1 miljoen verkragtings ► Prof. Rudolph Zinn van Unisa sê uit navorsing blyk dit dat van die misdadigers voer tot 107 misdrywe uit voordat hulle gearresteer word ► Solidariteit Netwerk loods nuwe Sol-Tech kampus in Pretoria teen koste van R300 miljoen, sal huidige kampus vir 1 200 studente verdubbel en sal na verwagting deure open in Januarie 2021 ► Kyk by hierdie video hoe top bevelvoerders van SA Vloot en Lugmag in Parlement getuig hoe vloot en lugmag op rand van ineenstorting is ► Vrou (55) in Oos-Vrystaat gisteraand terwyl sy gebad op ‘n plaas aangeval en verkrag, aanvaller vlug en niks gesteel nie ► Op die Economic Freedom of the World (EFW) 2019 verslag val Suid-Afrika 54 plekke na nr. 101 uit 162 lande, vanaf plek 47 in 2000 – volg hierdie skakel vir meer inligting ►Dit lyk of Britse premier Boris Johnson ‘n deurbraak met Brexit kan maak na ooreenkoms oor grensbeheer met Ierse Democratic Unionist Party (DUP) ► Voormalige Bok-afrigter Peter de Villiers sê hy gaan nie Springbokke vanjaar by Wêreldbeker ondersteun nie, omrede vroeëre betrokkenheid van Eben Etzebeth by onderonsie met twee bruin mense in Langebaan ►

Rockfees by die Vrouemonument, Oorlogmuseum

ROCKFEES BY DIE VROUEMONUMENT, OORLOGSMUSEUM. FRONT NASIONAAL RIG BRIEF AAN PROF PIET STRAUSS

Geagte professor Strauss

Re: Beplande Rockfees by die Oorlogsmuseum Bloemfontein: Oktober 2019

Front Nasionaal het met ‘n groot mate van kommer kennis geneem van ‘n advertensie wat uitgestuur is deur die Bemarkingskantoor van die Oorlogsmuseum waarin daar planne bekend gemaak word vir ‘n “Rockfees” by die Oorlogsmuseum in Oktober vanjaar om die 120e jaartal sedert die uitbreek van die Tweede Vryheidsoorlog te herdenk. Hierdie fees word beplan in samewerking met die “Aasvoëlklub” in Bloemfontein. Die advertensie en inligting soos verskaf is hierby aangeheg.

Ons het volle begrip daarvoor dat dit geweldig belangrik is vir monumente en museums om alternatiewe planne te maak om voete te lok en die geskiedenis lewend te hou. Ons voel egter dat dit darem met die nodige respek gedoen behoort te word.

Die oorlogswonde lê nog rou by baie van ons volksgenote. Dit is ‘n natuurlike proses by ‘n volk om, oor verloop van ‘n lang tyd, vrede te maak met die wonde wat hom toegedien is op die wyse waarop dit ons volk toegedien is. Genesing is ‘n proses wat soms geslagte lank duur. Daar is vandag nog wonde in Amerika oor die Burgeroorlog. Daar is vandag nog wonde in Nederland en Frankryk en in Pole oor die Tweede Wêreldoorlog.  Daar is nog rou wonde oor hierdie Oorlog en die uitvloeisel daarvan wat ons so intens beleef in die politieke situasie van die dag. As dit nie was vir die uitwissing wat daar plaasgevind het nie, was ons nie vandag ‘n handjievol mense wat in ons geboorteland vertrap, misken en verdruk word nie. Dan was ons baie meer.

Inderdaad wil ek vir u sê: In my eie familie is daar grootooms en –tantes wat in ongemerkte konsentrasiekampkerkhowe begrawe lê. Hulle is ewig kinders – ontroof van die geleentheid om op te groei en te leef. Hulle enigste grafsteen is die gedenkmuur by die museum, waar ek op 17 Desember verlede jaar lank vertoef het om hulle offer te gedenk.

Die Vrouemonument is nie net ‘n monument nie. Dis ‘n laaste rusplek. Ek het daar ook vertoef by die grafte van president Steyn, generaal De Wet, ds Kestell en Emily Hobhouse. Lank vertoef, want die stilte daar bring jou tot besinning oor watter prys gevra is, en in watter gesindheid dit betaal is.

Professor Strauss, dis nie die plek of die geleentheid vir ‘n Rockfees met ‘n kontantkroeg nie. Dis nie aanvaarbaar om te sê: “Ja maar ons gaan kerse brand en ‘n minuut van stilte handhaaf om die 30 000 vroue en kinders in konsentrasiekampkerkhowe te herdenk…. en daarna verkoop ons drank en rock ons” nie. En verseker stuur dit ‘n baie verwronge boodskap aan die wêreld oor hierdie volk se begrip van eerbied en respek. Ek kan my gewoon nie voorstel dat ‘n Rockfees gehou sal word by Gettysburg of Oradour-sur-Glane nie. Waarom moet ons dit dan hier doen? Oorlogswonde genees nie deur daarop te dans nie.

Die gedagte daaraan het my enersyds met ‘n diep emosionele pyn vervul ter wille van hulle vir wie daardie ‘n laaste rusplek is, maar ook met intense weersin by die gedagte daaraan dat die vorm van die vieringe so lynreg indruis teen die boodskap wat daar versinnelbeeld word.

Ons is ‘n beskaafde volk. ‘n Beskaafde volk huldig sy erfenis met respek, met deernis, met ootmoed en met waardigheid. Vir rockfeeste is daar sale en dansklubs en stadions die hele Vrystaat vol.

Ons is dit met u volkome eens dat die uitbreek van die Oorlog 120 jaar gelede herdenk moet word en dat dit die ideale geleentheid is om opnuut belangstelling te wek in daardie spesifieke gedeelte van ons geskiedenis. Ons wil egter ‘n dringende beroep op u doen om hierdie herdenking op ‘n meer gepaste, meer waardige en meer eerbiedige wyse te vier. En daarmee sal ons u bystaan met alles wat ons moontlik kan bydra. Front Nasionaal sal ons mense aanmoedig om deel te vorm daarvan. Ons sal u ondersteun net waar ons kan.

Dit is egter nie vir ons aanvaarbaar dat ‘n Rockfees met drankverkope by ‘n plek gehou word wat opgerig is om die ellende van die Oorlog en die offers, die lyding, smart en verlies te gedenk nie. En sekerlik nie waar die laaste rusplek van ons volkshelde is nie.

Ons wil u dan net ook vriendelik daarop wys dat die advertensie aandui dat die Afrikaanse sanger, Adam Tas, by die feesgeleentheid gaan optree. Ons het ondertussen ‘n boodskap van hom ontvang waarin hy ontken dat hy ooit genader is om op te tree en geen kennis dra van enige betrokkenheid by die gemelde Rockfees nie.

Ons verneem graag van u in hierdie verband.

Met beste wense

Daniël Lötter

Gradeer die artikel
(0 stemme)

4 opmerkings

  • Nelia Kirsten - Saterdag, 04 Mei 2019

    Wat n skande dat daar selfs net oorweging gegee word aan so n misdryf! Duidelik weet diegene wat hierdie voorstel steun NIKS van ons smartvolle geskiedenis nie! Of hul is so afgestomp deur die reënboognasie dat hul niks voel nie. Ons volk huiwer reeds op die afgrond. Indien daarmee voortgegaan word, sal ons verseker oor die afgrond tuimel.

    Report
  • Lynette Schultz - Saterdag, 04 Mei 2019

    As dit bloot net vir julle oor fondse gaan, het ek 'n voorstel: MITS JULLE DIE ROCK-FEES KANSELLEER, sal ek bereid wees om R500 te skenk en ek is seker almal wat dit teenstaan sal bereid wees om 'n donasie te maak (geen voorgeskrewe bedrag nie). Ek sal my stem op sosiale media gebruik om mense te vra vir skenkings en ek is ook seker ander mense sal dieselfde doen.

    As ons dan die slagoffers vd konsentrasiekampe se vrede moet koop, dan doen ons dit.

    Moet ASSEBLIEF net nie voortgaan met hierdie onvanpaste 'fees' nie!

    Report
  • Lynette Schultz - Saterdag, 04 Mei 2019

    My familie is AFGEMAAI id konsentrasiekampe. Ons het nie eens 'n graf om te besoek om 'n krans te lê nie, want niemand weet presies in watter 'gedeelde graf' hul begrawe is nie.

    Vir ons is die Vrouemonument die plek waar ons hulle onthou - IN GEWYDE STILTE, MET DIE EERBIED EN RESPEK WAT GEPAS IS BY SO 'N PLEK WAT ONS VOOROUERS SE SMART VERSINNEBEELD.

    Dit is beslis nie gepas om 'n Rock-fees daar te hou nie. Die blote feit dat iemand dit kan OORWEEG laat mens besef hoe min julle van ons geskiedenis weet.

    Julle sal nie 'n rock-fees op die 9/11 'Memorial' of op die Auschwich-terrein hou nie.

    GUN MY FAMILIE EN DUISENDE ANDER SE FAMILIES DAARDIE RUIMTE WAAR HULLE IN VREDE EN STILTE MAG RUS NA ONBESKRYFLIKE SMART EN ELLENDE!

    Soos die Engelsman sê "Shame on you!"

    Report
  • Smof - Vrydag, 03 Mei 2019

    Ek kan net saamstem met front Nasionaal se beskaafde uiteensetting van hulle besware. Ekself is egter nie so beskaafd nie aangesien ons Volk deur politici en geleerde mense uitverkoop word aan barbare en 'n totale volksvreemde kultuur wat beslis NIE by die Afrikaner pas nie.

    Om met soet woordtjies en argumente te kom dat 'n rockfees weer belangstelling in die geskiedenis sal wek, is so eg aan die tydsgewrig van die dag dat alles oorboord gegooi word en dat almal sal inval by die nuwe "moderne' neigings. Dit is absolute snert dat 'n rockfees enige bydra sal kan lewer tot die volksbesef se waardes. Diegene wat dit organiseer is net so naief soos wat de Klerk was toe hy die verraad teen die Afrikanervolk gepleeg het.

    Indien die prof Strauss dieselfde een is wat hoofleier van die Voortrekkerbeweging was, dan begryp ek heeltemal die sentiment wat geopenbaar word met die aanbieding van 'n rockfees by 'n gedenk museum van die Afrikaner. Ek onthou nog goed dat die Voortrekkerbeweging destyds nie vinnig genoeg van die Republiekvlag ontslae kon raak en dit te vervang met 'n totale volksvreemde vlag van die sogenaamde "nuwe Suid Afrika" nie. destyds het ek my voortrekkerloopbaan van 25 jaar beeindig aangesien die sing van die Voortrekkers se vlaglied net nie te rym was met dit niksseggende vlag van die nuwe en vreemde regering nie.

    Ek kan maar net sê dat diegene wat medepligtig is aan hierdie rockfees, absoluut aandadig is aan die verval van die Afrikanervolk sover as wat daar nog enkele oorblyfsels is van so 'n volk.

    Dit is 'n verdomde skande en 'n vernedering wat die eens trotse en stoere ASfrikanervolk nie verdien nie. SIES !!!

    Report

Lewer kommentaar

Vul al die vereiste velde in (*)

Go to top