►Voorspoedige 2020 | Ditsem Nuus kantoor weer oop | Teken in op die DitsemBlits vir daaglikse Nuushooftrekke en weeklikse Nuuskommentaar►

Sowat 500 000 Chinese onwettig in Suid-Afrika

Jy sien hulle oral in SA, selfs in feitlik elke klein dorpie - Chinese winkels klein en groot. Daar moet eenvoudig baie van hulle in die land wees, maar met korrupsie in die regering wat hoogty vier, wie sal kan sê wat die korrekte statistiese situasie is?
Volgens inligting wat Ditsem Nuus ontvang het, wat uiteraard nie moontlik is om bo alle twyfel te verifieer nie, maar wat uit die blote aard daarvan as geloofwaardig geag kan word, is daar tans tot soveel as 500 000 Chinese onwettig in SA.
Hulle is hoofsaaklik afkomstig van die oorbevolkte Fujian-provinsie in China en word op georkestreerde wyse na SA verskeep in samewerking met sowel die Chinese as SA owerhede. Na skatting het reeds tussen 6 000 en 12 00 Chinese winkels in SA a.g.v. hierdie proses opgeskiet.
Prof. Colin McCarthy, afgetrede hoogleraar van die Universiteit van Stellenbosch, het die sg. "Chinese kolonialisering" die eerste opgehaal. Hy word soos volg aangehaal (vertaal): "Al die getuienis dui daarop dat die projek om so 'n uitgebreide netwerk van Chinese winkels, almal volgende dieselfde patroon en almal geteiken op dieselfde mark, deeglik nagevors, goedbepland, goedgeorganiseerd en goedgefinansierd moet wees."
Dit is meestal jong werklose egpare wat uit die Fujian-provinsie ingevoer word en in hul winkels verkoop hulle goedkoop Chinese plastiekware, klere en ander produkte, wat 'n florerende kleinhandelsbedryf daarstel veel groter as Pick n Pay, Pep of Edgars.
Om die kroon te span, is die meeste van hierdie winkels nie geregistreer vir BTW of enige ander belasting of oorbetalings nie en betaal hulle selfs nie eers invoer- of aksynsbelasting nie.
Amptelike Chinese syfers het klerasie-uitvoere na SA in 2010 op sowat R11,3 miljard gestel, terwyl die twyfelagtige syfer van die SA regering vir dieselfde kategorie slegs R6,7 miljard is, d.w.s. in een enkele jaar moes Chinese klerasie ter waarde van ongeveer R4,6 miljard die land onwettig binnegekom het.
Na bewering het die SA owerhede op 'n stadium regop gesit toe 'n beampte van die SAID tydens 'n klopjag op 'n Chinese winkel R1,2 miljoen in kontant onder die toonbank gevind het.
Janet Wilhelm van die WNNR, wat 'n studie van Chinese in SA gemaak het, skryf: "Dit is verstommend hoe soveel mense 'n land skynbaar onopgemerk kan binnekom." Volgens haar het die SAPD Eenheid vir Vreemdelinge-ondersoek verklaar: "Baie Chinese reis na SA via Mbabane, Maputo en Maseru, vanwaar hulle SA per pad met vals identiteitsdokumente binnegaan".
Patrick Chong, voorsitter van die Chinese Vereniging van SA, sê: "Talle Chinese kom SA binne op toeriste- of studentevisums en bly dan eenvoudig hier aan."
Die tydskrif Noseweek het 'n familie van Chens nagespoor waar een pionier onwettig in SA gevestig het en binne vier jaar 172 van sy familielede die land ingesmokkel het, hoofsaaklik deur Lesotho.
Wat die normale verstand te bowe gaan, is dat Chinese in SA deur die ANC-regering toegelaat en behandel word as "ere-swartes" en dat hulle vrygestel is van regstellende aksie, swart ekonomiese bemagtiging en kwotas. Dít terwyl blanke SA burgers wat hier gebore is, selfs dié ná 1994, onder al hierdie laste gebuk moet gaan.
Waarnemers is dit eens dat die hele "Chinese eksperiment" omsigtig beplan en krimineel bemagtig word. Groot somme geld is betrokke en invloedryke politici baat daarby.
Die verskynsel moet ook gesien word teen die aandrang in politieke slagkrete dat die minerale rykdomme van die land, tesame met ander bates en eiendom en selfs grond, genasionalisëer moet word. Trouens, dit is presies wat die regering tans deur verskeie stukke wetgewing deur die Parlement stoot.
Die Chinese manifestasie in SA geskied ook volgens die patroon in die res van Afrika, waar China sy fisiese, ekonomiese en politieke invloed al sterker laat geld. Internasioneel word wyd gewaarsku teen Chinese imperialisme in Afrika. As een voorbeeld: Daar word gesê dat die Chinese in Zimbabwe vir pres. Mugabe in die kussings hou - in ruil vir vergoeding komende uit die ryk onwettige Marange-diamantvelde.
Dit gaan egter in SA nog verder: Na raming is daar sowat 500 000 Indiërs, Pakistanis en Bangladesjis en tot soveel as 10 miljoen mense uit Zimbabwe, Nigerië, Mosambiek, Angola, Zambië en ander Afrikalande onwettig in SA.
Dit lyk inderdaad of die aard van die stryd nog dieselfde is as die afgelope sowat vier dekades, nl. dat dit eintlik gaan om die minerale skatkis van SA - op R25 triljard na raming die rykste ter wêreld - en beheer oor die hoogs strategiese ligging van SA en die Kaapse seeroete. In die nuwe internasionale politieke magspel tussen Rusland, China en die VSA kan hierdie faktore des te meer betekenis kry.
Laastens is dit opmerklik dat in hierdie hele situasie die Afrikaner as eens die bewindshebber nou slegs 'n toeskouer is en geen deelnemer nie - dit is nou afgesien van sy moontlike ekonomiese invloed.

Gradeer die artikel
(0 stemme)

Lewer kommentaar

Vul al die vereiste velde in (*)

Go to top