Die Nuwe FAK-sangbundel

Kommentaar (0)

Wat is in en wat is uit?
Alle oë is tans op die FAK gefokus met die vrystelling van die Nuwe FAK-sangbundel. Vir maande al maak hulle ons lus daarvoor. Dit word hierdie maand vrygestel met 'n groot konsert by Aardklop: FAK Fantasties!
Die bekende FAK-sangbundel is vanjaar reeds 75 jaar met ons. Met die nuwe bundel is die bedoeling nie om die vorige een te vervang nie, maar eerder erkenning te gee aan die ontwikkeling van Afrikaanse musiek sedert 1979. Die ouer een kry dus net 'n boetie / sussie by.
As ons na die geweldige skatkis kyk van ”nuwe” oorspronklike Afrikaanse liedjies sedert 1979, moes dit sekerlik kopkrap gekos het om te besluit wat is in en wat is uit. Dalk 'n onbegonne taak?
Gelukkig is daar iemand by die FAK met hare op sy tande. Danie Langner, die uitvoerende hoof van die FAK, sal in die volgende maand moet bontstaan om komplimente en kritiek aan te hoor. Dankie vir mense soos jy, Danie!
Of jy gaan saamstem of verskil met hierdie versameling van immergroen-, geestelike, kinder-, kuns-, koor- en kleinkunsliedere, maak nie werklik saak nie. Wat saak maak, is dat ons uiteindelik 'n bundel het met eietydse Afrikaanse musiek wat die afgelope 33 ”storm-en-drang” jare verteenwoordigend bevat.
Die bundel gaan beslis 'n leemte vul op ons boekrak!
Dankie FAK!